ព្រះសីហនុ៖នាយទាហាន នាយទាហានរង និង ពលទាហានចំនួន៦០នាក់ មកពីគ្រប់ការិយាល័យចំណុះអោយទីបញ្ជាការតំបន់ប្រតិបត្តិការសឹករងខេត្តព្រះសីហនុ បានបញ្ចប់កម្មសិក្សាហើយបន្ទាប់ពីទទួលការហ្វឹកហ្វឺនរយះពេល៤៥ថ្ងៃ ក្នុងមុខវិជ្ជាចំនួន៤។ មានប្រសាសន៏នៅក្នុងពិធី បិទ
វគ្គហ្វឹកហ្វឺន បំប៉នដល់ នាយទាហាន នាយទាហានរង និង ពលទាហាន ឯកឧត្តម ឧត្តមសេនីយ៏ឯក យឿង សុខុនមេបញ្ជាការរងកងទ័ពជើងគោក និង ជាមេបញ្ជាការយោធភូមិទី៣បានបញ្ជាក់ថា វគ្គហ្វឹកហ្វឺននេះធ្វើឡើងក្នុងគោលបំណងពង្រឹងបន្ថែមនូវចំណេះដឹងបញ្ញាស្មារតី និង រំលឹងឡើងវិញនូវក្បួនយុទ្ឋសាស្ត្រ វិន័យ សណ្តាប់ធ្នាប់ ក្នុងជួរកងយោធពលខេមរភូមិន្ទ ដើម្បីបង្កើនសមត្ថភាពអោយបានគ្រប់គ្រាន់របស់ នាយទាហាន នាយទាហានរង និង ពលទាហាន សំរាប់យកទៅបំពេញការងារ ភារកិច្ចការពារជាតិមាតុភូមិរបស់ខ្លួននិង រួមចំណែកក្នុងការ អភិវឌ្ឌ្យន៏សង្គមជាតិឲ្យបានរីកចំរើន។
ឯកឧត្តមក៏បានមានប្រសាសន៏ដោយសង្កត់ធ្ងន់ថាសូមអស់លោកដែលជាសិក្ខាកាមត្រូវចងចាំថា ពាក្យថាបំប៉នគឺមានន័យថាបំប៉មពីតូចទៅធំ ពី ស្គមទៅធាត់ ពីមិនចេះទៅចេះ ដូចនេះក្រោយពីបញ្ចប់វគ្គនេះទៅឯកឧត្តមសង្ឃឹមថាអស់លោកដែលជាសិក្ខាកាម នឹងយកចំណេះដឹងដែលទទួលបានកន្លងមកនេះ ទៅធ្វើការបំរើប្រទេសជាតិ បំរើសេចក្តីសុខសាន្តរបស់ប្រជាពលរដ្ឋ ត្រូវមានឆន្ទះ ស្មារតីស្រលាញ់ជាតិ មាតុភូមិ ការពារបូរណភាពទឹកដី ត្រូវមានមនសិការស៊ូស្លាប់ដើម្បីជាតិ និង ប្រជាពលរដ្ឋទាំងមូល។
