បន្ទាយមានជ័យ៖ ( ដោយ គៀនច័ន្ទហ៊ីន) ពលករខ្មែរដែលចាញ់បោកមេខ្សល់ចំនួន១4នាក់ត្រូវបានកម្លាំងសត្ថកិច្ចថៃចាប់ឃុំឃាំងនោះពេលនេះអាជ្ញាធរថៃបានដោះលែងពួកគេឲ្យមកវិញតាមតាមច្រកទ្វារព្រំដែនអន្តរជាតិប៉ោយប៉ែត្របន្ទាប់ពីមានការសម្របសម្រួលពីអាជ្ញាធរកម្ពុជា ។ លោកនេតសេរីអគ្គកុងស៊ុលកម្ពុជាប្រចាំខេត្តស្រះកែវនិងលោកង៉ោម៉េងជ្រួនអភិបាលក្រុងប៉ោយប៉ែតបានឲ្យដឹងថាពលករខ្មែរទាំង ១៤នាក់នោះ ត្រូវបានអាជ្ញាធរថៃ ចាប់ឃុំខ្លួន ដោយចោទប្រកាន់ពីបទ កាន់ឯកសារឆ្លងដែនក្លែងក្លាយ តាមរយៈការចាញ់បោកមេខ្យល់តែប៉ុណ្ណោះ។
ដូច្នេះតុលាការខេត្តស្រះកែវ បានសម្រេចទម្លាក់ការចោទប្រកាន់លើពួកគេវិញ។ហើយ ពលករខ្មែរដែលចាញ់បោកមេខ្សល់ ១៤ នាក់នោះ មានស្រី ១០ នាក់ ប្រុស ៤ នាក់ ស្ថិតនៅខេត្តសៀមរាប ពោធិ៍សាត់ និងបាត់ដំបង។ ជាមួយគ្នានេះអាជ្ញាធរដែនដីនៃខេត្តបន្ទាយមានជ័យបាន ជួបសំណេះសំណាល ពីអាជ្ញាធរ ក្រុងនិងអាជ្ញាធរ ខេត្តបន្ទាយមានជ័យ ទៅកាន់ពលករខ្មែរទាំង១៤នាក់នោះនិងបានណែនាំឲ្យរកការងារធ្វើនៅក្នុងស្រុកវិញប្រសើរជាងឬបើ “ចង់វិលត្រឡប់ទៅធ្វើការនៅប្រទេសថៃវិញត្រូវទៅឲ្យមានច្បាប់ ជៀសវាងដូចករណីដែលកើតមានកន្លងមកក៏ដូចជាពេល នេះ”។
គួរបញ្ជាក់ថាពលករខ្មែរដែលចាញ់បោកមេខ្សល់ចំនួន១៤នាក់នេះក្នុងម្នាក់បានទទួលថវិកា១លានរៀលពីប្រមុខថ្នាក់ដឹកនាំរាជរដ្ឋាភិបាលកម្ពុជាសម្រាប់ឲ្យបងប្អូនទាំងនោះជាមធ្យបាយវិលត្រឡប់មកភូមិកំណើតពួកគេវិញ៕