សៀមរាប : កូនឈើជាប្រភេទកូនឈើគគី បេង ក្រញូង ឈើទាល កកោះ និង ធ្នុង ត្រូវបានខណ្ឌរដ្ឋបាលព្រៃឈើសៀមរាប រៀបចំធ្វើពិធីដាំដុះនៅ ភូមិអង្កាញ់ ឃុំស្វាយលើ ស្រុកស្វាយលើ ខេត្តសៀមរាប កាលពីព្រឹកថ្ងៃទី ០៤ ខែ កក្កដា ឆ្នាំ២០១៤ ក្រោមអធិបតីភាពឯកឧត្តម នូ ផល្លា ប្រធានក្រុមប្រឹក្សាខេត្តសៀមរាប ឯ.ឧ ស៊ិន រុន អភិបាលរងខេត្តសៀមរាប ដោយមានការនិមន្ត អញ្ជើញចូលរួមពីសំណាក់ព្រះសង្ឃ ឯកឧត្តម លោកជំទាវ អស់លោក លោកស្រី ជាថ្នាក់ដឹកនាំមន្ទីរ ស្ថាប័ន អង្គភាព នាយខណ្ឌរដ្ឋបាលព្រៃឈើ និង អស់លោក លោកស្រី ជាអាជ្ញាធរក្រុង ស្រុក មន្ត្រីនៃខណ្ឌរដ្ឋបាលព្រៃឈើ សៀមរាប រួមទាំងមន្ត្រីរាជការ កងកម្លាំងប្រដាប់អាវុធ អង្គការមិនមែនរដ្ឋាភិបាល និង ក្រុមយុវជនកាយរឹទ្ធ យុវជនកាក បាទក្រហមកម្ពុជា សិស្សានុសិស្ស លោកគ្រូអ្នកគ្រូ និង ប្រជាពលរដ្ឋប្រមាណជាង៤០០នាក់បានចូលរួមផងដែរ ។
យោងតាមរបាយការណ៍របស់លោក ទា គឹមសុទ្ធ នាយខណ្ឌរដ្ឋបាលព្រៃឈើសៀមរាប បានបញ្ជាក់ថា ព្រៃឈើជាប្រភពតែមួយគត់ ដែលបានបញ្ចេញឧស្ម័នទៅក្នុងបរិយាកាស សម្រាប់ដំណើរការដកដង្ហើមរបស់មនុស្ស សត្វ និង សម្រាប់ទ្រទ្រង់ជីវិតមនុស្ស សត្វ។ បើព្រៃឈើត្រូវបាត់បង់អស់ មនុស្ស សត្វ ក៏គ្មានជីវិតនៅលើផែនដីនេះផងដែរ។
លោកនាយខណ្ឌបានបន្តទៀតថា ក្នុងទិសដៅបន្តវេនដ៏ប្រពៃ រាជរដ្ឋាភិបាលបានធ្វើកំណែទម្រង់វិស័យ ព្រៃឈើយ៉ាងសកម្ម ដោយបានខិតខំពុះពារគ្រប់ឧបសគ្គ និង ផ្តោតការយកចិត្តទុកដាក់យ៉ាងខ្លាំងក្លា លើការគ្រប់ គ្រងធនធានធម្មជាតិ ប្រកបដោយចីរភាព និង ការលុបបំបាត់ភាពអនាធិបតេយ្យគ្រប់រូបភាព ។ ក្នុងរបាយការណ៍ របស់លោកនាយខណ្ឌរដ្ឋ បាលព្រៃឈើសៀមរាប បានបញ្ជាក់បន្ថែមថា ពីការងារទប់ស្កាត់ បង្ក្រាបបទល្មើសព្រៃឈើ ក្នុងឆមាសទី១ ឆ្នាំ២០១៤ មាន ២៦ករណី ក្នុងនោះករណីបទល្មើសព្រៃឈើ ២០ករណី និង ដីព្រៃឈើ ០៥ករណី, សត្វព្រៃ០១ករណី, ព្រម ទាំងការបណ្តុះកូនឈើគ្រប់ ប្រភេទ ក្នុងមួយឆ្នាំចំនួន១លានដើម សម្រាប់ធ្វើការដាំដុះបន្តផងដែរ ។
ឯ.ឧ នូ ផល្លា ក៏បានមានប្រសាសន៍សំណេះសំណាលក្នុងពិធីដាំដើមឈើនាឱកាស នោះ ដោយលើកឡើងថា ថ្ងៃទី៩កក្កដាត្រូវបានបង្កើតជាទិវាពលកម្មដាំដើមឈើ ហៅថារុក្ខទិវា សំដៅបំផុសស្មារតីឲ្យប្រជាពលរដ្ឋចេះស្រឡាញ់ព្រៃឈើ លើកកម្ពស់ឡើងវិញ ដើម្បីសុភមង្គល និងសេចក្តីសុខចំរើននៃប្រទេសជាតិយើង។ ឯកឧត្តមក៏មាន ប្រសាសន៍ឲ្យដឹងបន្ថែមថា ពិធីបុណ្យរុក្ខទិវាជាប្រពៃណីដ៏ល្អរបស់ប្រទេសកម្ពុជា បានរៀបចំប្រារព្ធឡើងជារៀងរាល់ឆ្នាំ តាំងពីសម័យសង្គមរាស្ត្រនិយមក្រោមព្រះរាជកិច្ច ដឹកនាំរបស់ព្រះករុណាព្រះមហាវីរក្សត្រ ព្រះនរោត្តមសីហនុ ព្រះបរម រតនៈកោដ្ឋិ ជាទីគោរពសក្ការៈ ដែលព្រះអង្គតែងតែយកព្រះទ័យទុកដាក់ដល់ព្រៃឈើ និង ការដាំដើមឈើជាអាទិភាព ចំបង ក្នុងពិធីបុណ្យរុក្ខទិវាជាតិជារៀងរហូតមក ។
ឯ.ឧ នូ ផល្លា ក៏បានបញ្ជាក់ ថា តាមរយៈពិធីបុណ្យរុក្ខទិវាដែលប្រារព្ធឡើង ប្រជាជាតិកម្ពុជាបានយល់យ៉ាងច្បាស់ និងកាន់តែស៊ីជម្រៅបន្ថែមទៀត អំពីការលើកកម្ពស់ការដាំដុះដើមឈើ និង ការថែរក្សានិរន្តរភាពព្រៃឈើនៅព្រះរាជាណាចក្រកម្ពុជា។ ម្យ៉ាង ទៀតព្រឹត្តិការណ៍រុក្ខទិវានៅលើទឹកដីប្រវត្តិសាស្ត្រ សៀមរាបនាថ្ងៃនេះ ក៏ជាការឆ្លុះបញ្ចាំងនូវការភ្ញាក់រលឹករបស់ ប្រជាជាតិយើងទាំងមូល ក្នុងការប្រឈមមុខដោះស្រាយ គ្រោះមហន្តរាយ ដោយការបាត់បង់ព្រៃឈើ ។ ដោយកត្តានេះ ហើយ ដើម្បីសម្រាប់អ្នកជំនាន់ក្រោយយើង មិន ត្រូវបង្អែរបង្អង់ឡើយ នូវផែនការស្តារព្រៃឈើឡើងវិញ និង ដាំឈើឡើង វិញជាខ្សែចង្វាក់គ្រប់ទិសទី ដើម្បីឲ្យមាតុ ភូមិយើង ខេត្តយើងរក្សាបាននូវលំនឹងបរិស្ថានធម្មជាតិ ឲ្យមានសម្រស់ស្រស់ បំព្រង ប្រកបដោយរុក្ខជាតិពណ៌ បៃតងឡើងវិញ ។
ឯ.ឧ បានមានប្រសាសន៍ផ្តាំផ្ញើ និងសំណូមពរ ដល់សមាជិក សមាជិកានៅក្នុងពិធី ក៏ដូចជាបងប្អូនប្រជាពលរដ្ឋដែលមានការពាក់ព័ន្ធជាមួយការកាប់រុករានទន្ទ្រានព្រៃឈើ ឈូសឆាយដីព្រៃឈើ ដើម្បីកាន់កាប់ដីធ្លី និងសកម្មភាពបទល្មើសព្រៃឈើផ្សេងៗទៀត ត្រូវបញ្ឈប់សកម្មភាពខុសច្បាប់ទាំងនោះជាបន្ទាន់ ហើយត្រូវប្រគល់នូវអតីតដីព្រៃឈើទាំងនោះ មកទុកជាសម្បត្តិសាធារណៈរបស់រដ្ឋ ដើម្បីការស្តារដាំដុះដើមឈើឡើងវិញ និង បង្កើនគម្របព្រៃនៅកម្ពុជាឲ្យកាន់តែច្រើនឡើងៗ ព្រមទាំងបង្កើតបានបរិយាកាសមួយ ប្រកប ដោយ មនសិការទទួលខុសត្រូវ
ខ្ពស់ នៃកិច្ចការពារថែរក្សាលំនឹង បរិស្ថានធម្មជាតិ និង ភោគសម្បត្តិធម្មជាតិរបស់ជាតិ ហើយបណ្តាអង្គការមិនមែនរដ្ឋាភិបាល ដែលបានកំពុងយកចិត្តទុកដាក់ ជួយដល់ខេត្តសៀមរាប ក្នុងកិច្ចថែរក្សាធនធានធម្មជាតិ សម្ខាន់ព្រៃឈើដែលជាបញ្ហាចំបង និង មានសារៈសម្ខាន់ដល់ការរស់រាន និង ការអភិវឌ្ឍន៍សង្គមជាតិកម្ពុជា ទាំង ពេលបច្ចុប្បន្ន និង ទៅអនាគតផងដែរ ។ បន្ទាប់ពីគណៈអធិបតីធ្វើការប្រគល់កូនឈើជានិមិត្តរូប ជូនដល់អាជ្ញាធរក្រុង ស្រុករួចមក គណៈអធិបតី និង ភ្ញៀវ កិត្តិយស ព្រមទាំងបងប្អូនចូលរួមក្នុងពិធី ក៏បានធ្វើការដាំដុះកូនឈើទាំង ០៦ប្រភេទ ផងដែរ ៕ អត្ថបទ និង រូបភាព លោក ខេង ខេមរា 
