ខេត្តប៉ៃលិន៖ នៅសាលប្រជុំ វិទ្យាល័យក្រុងទេពនិម្មិត ហ៊ុន សែន ព្រឹកថ្ងៃទី៤ ខែមិថុនា ឆ្នាំ២០១៤ មានកិច្ចប្រជុំគណៈកម្មការទ្រទ្រង់សាលា ក្នុងគោលបំណង បង្កើនសមត្ថភាពរបស់ គណៈកម្មការទ្រទ្រង់ស្តីពីតួនាទី និងភារកិច្ចក្នុងការចូលរួមអភិវឌ្ឍសាលារៀន ក្រោមអធិបតីភាព លោក តង់ ធារ៉ា ប្រធានមន្ទីរ អប់រំ យុវជននិងកីឡាខេត្ត ព្រមទាំងមានការចូលរួមពីលោកប្រធានការិយាល័យអបរំក្រុង/ស្រុក លោកគ្រូ អ្នកគ្រូ និងប្រជាពលរដ្ឋប្រមាណជាង៦០នាក់ ។ ថ្លែងទៅកាន់ កិច្ចប្រជុំពិភាក្សា គណៈកម្មការទ្រទ្រង់សាលា លោក តង់ ធារ៉ា ប្រធានមន្ទីរអប់រំ យុវជន និងកីឡា ខេត្តប៉ៃលិន បានមានប្រសាសន៏ឲ្យដឹងថា៖ បញ្ហាមួយចំនួន ពិសេសការងារគណៈកម្មការទ្រទ្រង់សាលា ត្រូវតែសកម្មក្នុងការ ជួយត្រួតពិនិត្យ សកម្មភាពផ្សេងៗរបស់សាលានិងសិស្ស ជំរុញឱ្យអាណាព្យាបាលនិងពលរដ្ឋ ជឿទុកចិត្តលើវិស័យអប់រំ។
លោកបន្តថា៖ សាលាមិនអាចខ្វះបាននូវការជួយទ្រទ្រង់ពីលោកពូ អ្នកមីង អាណាព្យាបាល ពិសេសគឺជួយពីការខ្វះខាត ក្នុងសាលា ហើយបើសាលានោះមានបញ្ហាអ្វី លោកពូ អ្នកមីង អាចស្នើសុំ មកខាងមន្ទីរ ដើម្បីឲ្យជួយ នេះគឺសម្រាប់កូនចៅយើងទាំងអស់គ្នា ជួយប្រាប់កូនៗអំពីការចូលរៀន ជួយតាមដានការសិក្សា របស់កូនៗ ។ ចំពោះលោកគ្រូ អ្នកគ្រូ ត្រួវតែសហការគ្នាជាមួយសហគមន៏ ក្នុងការតាមដាន ត្រួតពិនិត្យ ការសិក្សារបស់សិស្ស ។ លោកប្រធានមន្ទីរមានប្រសាសន៏បន្តទៀតថា៖ ពាក់ពន្ធ័ការប្រលង ក្នុងឆ្នាំនេះក្រសួងមានយន្តការថ្មី គឺសាលាជាអ្នកទទូលខុសត្រួវក្នុងការប្រលង ហើយគណៈមេប្រយោគគឺក្រសួងជាអ្នករៀបចំ ខ្លួនឯង ។
ពេលប្រលងម្តងៗនៅខេត្តប៉ៃលិន មិនមានការបែកធ្លាយ វិញ្ញាសារប្រលងនោះទេ ក្នុងឆ្នាំនេះដែរ ការប្រលងក្រសួងមានដាក់ភ្នាក់ងារអង្គភាពប្រឆាំងអំពើពុករលួយ ដើម្បីចូលរួមសង្កេតការណ៏ ព្រមទាំងមានអង្គការជាតិ -អន្តរជាតិ ចូលរួមសង្កេតការណ៏ ផងដែរ ។ ជាមួយគ្នានោះដែរលោកប្រធានមន្ទីរ បានលើឡើងនូវពាក្យបណ្តឹង ពីបុគ្គលិកដែលបានប្តឹងថាខាងការិយាល័យស្រុក និងមន្ទីរឃុបឃិតគ្នា រឿងមិនលុបឈ្មោះបុគ្គលិកដែលមិនបានបំរើការងារជាយូរមកហើយនោះត្រូវលោក បកស្រាយថា គ្រូដែលអវត្តមានមិនដឹងមូលហេតុ រយៈពេល៣ខែទៅ៦ខែ ត្រូវព្យួរឈ្មោះជាបណ្តោះអាសន្ន បន្ទាប់មកបើអត់ឃើញមកតវ៉ា ខាងមន្ទីរត្រូវលុបឈ្មោះចោល ដោយស្វ័យប្រវត្តន៍ ចំណែកថវិការវិញ មិនមានអ្នកណាហ៊ានប៉ះពាល់ នេះទេ ។
លោកប្រធានមន្ទីរបានរំលឹកថា អ្នកដែលបញ្ចេញរឿងនេះ មានការអាក់អន់ចិត្ត ក្នុងរឿងប្តូរតួនាទី របស់គាត់ ហើយបើការិយាល័យណាប្រព្រឹត្តមិនប្រក្រតី ខាងមន្ទីរត្រូវប្តូរទីកន្លែងធ្វើការ។លោកថានេះគឺជារឿងធម្មតាទេ មិនមានអ្វីធំដុំឡើយ ព្រោះគេអន់ចិត្ត ចេះតែនិយាយបង្កាច់បង្ខូតយើងទៅ។លោកបន្តថា បញ្ហានេះលោកមិនខឹងគេទេ ព្រោះនេះជាសិទ្ធក្នុងការបញ្ចេញមតិរបស់សាធារណជន។ អត្ថបទ សេង សុវណ្ណារិទ្ធ