កំពង់ឆ្នាំង៖ ក្រុមអ្នកលេងអាប៉ោងមួយក្រុមមានគ្នាចំនួន៥នាក់ត្រូវបានកម្លាំងនគរបាលព្រហ្មទណ្ឌ័ កំរិតស្រាលរបស់ស្នងការដ្ឋាននគរបាលបាលខេត្ត ធ្វើការឡោមពទ្ឋ័ចាប់ខ្លួនបាននៅវេ លាម៉ោង ២និង៣០នាទីរសៀលថ្ងៃទី៣ ខែកក្កដា ឆ្នាំ២០១៤ នៅចំណុច ក្នុងព្រៃជើងភ្នំកញ្ចុះព្រៃ ស្ថិតក្នុង ភូមិអូ រល្ពៅ ឃុំក្រាំងស្គារ ស្រុកទឹកផុស ខេត្តកំពង់ឆ្នាំង។នៅដែលពួកគេនិងអ្នកញៀនល្បែងជាង២០នាក់ ទៀត កំពុងលេងអាប៉ោងនៅចំណុចខាងលើជាយូរថ្ងៃមកហើយ ។ 
លោក ប៉ុល វុទ្ឋី នាយការិយាល័យព្រហ្មទណ្ឌ័កំរិតស្រាលរបស់ស្នងការដ្ឋាន នគរបាលខេត្ត បាននិយាយអោយដឹងថាៈ ក្រោយពេលទទួលដំណឹងថា ក្រុមអ្នកញៀនល្បែងស៊ីសងទាំងនោះតែង តែប្រមូលផ្តុំគ្នាទៅលេងនៅចំណុចខាងលើនេះ លោកឧត្តមសេនីយ៏ត្រី ប្រាក់ វុឌ្ឍីស្នងការ នគរបាល ខេត្តកំពង់ឆ្នាំង និងមានការឯកភាពពីលោកអភិបាលខេត្ត បានបញ្ជារអោយលោក ដឹកនាំកម្លាំង សហ ការជាមួយមន្ត្រីនគរបាលមូលដ្ឋាន បានធ្វើការពទ្ឋ័ចាប់បានជនសង្ស័យចំនួន៥នាក់ក្នុងចំណោមគ្នាគេ ជាង២០នាក់ រួមនិងវត្ថុតាង មួយចំនួន ចំណែកមួយចំនួនទៀតដឹងខ្លួនទាន់បានរត់គេចខ្លួនបាត់ ។
អ្នកលេងអាប៉ោងទាំង៦នាក់រួមមាន១ឈ្មោះ នូ មន ភេទប្រុស អាយុ៣៦ឆ្នាំ ជាមេអាបាញ់ប៉ោង ២ឈ្មោះអុំ ស្រីនាង អាយុ៣៤ឆ្នាំ ទាំង២នាក់ជាប្តីប្រពន្ឋនិងគ្នា មានទីលំនៅភូមិរលួស ឃុំក្រាំងអំពិល ស្រុកសំរោងទង ខេត្តកំពង់ស្ពឺ, ៣ ឈ្មោះ ហេងសំអុន អាយុ៥១ឆ្នាំ ភេទប្រុស, ៤ឈ្មោះ ហែម គឹមហៀង អាយុ៤៨ឆ្នាំ ទាំង២នាក់ជាប្តីប្រពន្ឋនិងគ្នា មានទីលំនៅផ្សារ ឃុំក្បាលត្រាច ស្រុកក្រគរខេត្តពោធិសាត់ និង៥ឈ្មោះ គា វុទ្ឋា ភេទប្រុស អាយុ៣១ឆ្នាំ មានទីលំនៅភូមិកែឡាត ឃុំពន្លៃ ស្រុកបរិបូរណ៏ ។
ចំណែក វត្ថុតាងរឹបអូសបានរួមមាន មេអាប៉ោង៣គ្រាប់ រថយន្តកូរ៉ូឡាពណ៏ក្រហម ពាក់ស្លាកលេខភ្នំពេញ 2J.3413 ជាកម្មសិទ្ឋរបស់ឈ្មោះ នូ មន មួយគ្រឿង ម៉ូតូហុងដាឌ្រីមមួយគ្រឿង និងលុយចំនួន៣លានរៀល។ ជនសង្ស័យទាំង៥នាក់ រួមជាមួយវត្ថុតាង ត្រូវបានមន្ត្រីនគរបាល ព្រហ្មទ័ណ្ឌកំរិតស្រាល នៃ ស្នងការនគរបាលខេត្ត កសាងសំណុំរឿងបញ្ឃូនទៅតុលាការ ចាត់ការតាមនិតិវិធី នៅព្រឹកថ្ងៃទី ០៤ ខែកក្កដា ឆ្នាំ២០១៤នេះ ដើម្បីផ្តន្ទាទោសតាមផ្លូវច្បាប់។ មានការកត់សំគាល់ថា៖ក្រោយពេលលោកស្នងការទើបចូលកាន់ដំណែងថ្មីគេសង្កេតឃើញសមត្ថកិច្ចក្នុងខេត្តមានការបង្ក្រាបបទល្មើសបានជាបន្តបន្ទាប់ ដូចជា បង្ក្រាបថ្នាំញៀន ចាប់រំលោភ ចោរកម្ម និងល្បែងស៊ីសងនេះជាដើម៕
