ភ្នំពេញ៖ រថយន្តស៊ីបមួយគ្រឿងដែលបើកបរដោយបុរសម្នាក់បានបុកម៉ូតូស្កូបពីមួយគ្រឿង ដែលជិះដោយមនុស្ស៣នាក់បណ្ដាលអោយរងរបួសធ្ងន់និងស្រាល តាំងពីចំណុចផ្លូវជាតិលេខ៥ ហើយរថយន្តបង្កនេះព្យាយាមបើករត់មកដល់ចំណុចផ្លូវ៦២ ក្នុងសង្កាត់ទួលសង្កែ ទល់មុខហាងយីហោ ស្រ៊ុន ក្លឹង ក៏ត្រូវបានសមត្ថកិច្ចនិងប្រជាពលរដ្ឋបានឃាត់បាន កាលពីវេលាម៉ោង១១និង១០នាទី យប់ថ្ងៃទី១៨ខែកុម្ភៈឆ្នាំ២០១៤ តាមបណ្ដោយផ្លូវជាតិលេខ៥ ស្ថិតក្នុងសង្កាត់ទួលសង្កែ ខណ្ឌឫស្សីកែវ។
ប្រភពព័ត៌មានពីសមត្ថកិច្ចបានអោយដឹងថា មុនពេលកើតហេតុគឺរថយន្តមួយគ្រឿងម៉ាកស៊ីប ពណ៌ត្រេអ៊ី គ្មានស្លាកលេខ បើកបរដោយបុរសម្នាក់បានធ្វើដំណើរតាមបណ្ដោយផ្លូវជាតិលេខ៥ ក្នុងទិសដៅពីត្បូងទៅជើង ស្រាប់តែមកដល់ចំណុចកើតហេតុខាងលើរថយន្តនេះ បានបត់ឆ្វេង ឆ្លងផ្លូវក៏បុកនិងម៉ូតូស្កូបពីមួយគ្រឿង ពណ៌ស គ្មានស្លាកលេខ ដែលជិះដោយមនុស្ស៣នាក់ នារី២នាក់និងបុរសម្នាក់កំពុងធ្វើដំណើរ
បញ្ច្រាស់គ្នាជាមួយរថយន្តខាងលើយ៉ាងពេញទំហឹង ធ្វើអោយ អ្នកជិះម៉ូតូរងរបួសធ្ងន់២នាក់និងស្រាលម្នាក់ ហើយរថយន្តបង្កហេតុនេះមិនបានឈប់ធ្វើការ ដោះស្រាយទេ គឺព្យាយាមបើករត់ពីកន្លែងកើតហេតុផ្លូវ៦២ ទល់មុខហាងយីហោ ស្រ៊ុន ក្លឹង ក៏ត្រូវបានប្រជាពលរដ្ឋឃើញហេតុការណ៍នេះដេញតាមរហូតក៏ឃាត់បាននៅចំណុចនេះ ដោយខឹងសម្បារពេកប្រជាពលរដ្ឋបាននាំគ្នាវាយមួយដៃមួយជើងម្នាក់ ធ្វើអោយ
ម្ចាស់រថយន្តបង្កនេះ រងរបួសបែកមុខហូរឈាមទើបប្រជាពលរដ្ឋរាយការណ៍ទៅសមត្ថកិច្ចអោយមកអន្តរាគមន៍យករថយន្ត បង្កនេះទៅធ្វើការដោះស្រាយ។បន្ទាប់ពីកើតហេតុជនរងគ្រោះខាងលើត្រូវបានរថយន្តសាមុយដឹកយកទៅមន្ទីរពេទ្យកាល់ម៉ែត្រដើម្បីសង្គ្រោះភ្លាមៗផងដែរ ហើយចំណែកម៉ូតូនិងរថយន្តបង្កត្រូវបាន សមត្ថកិច្ចជំនាញបានចុះមកវាស់វែងអូសយកនៅការិយាល័យចរាចរជើងគោករង់ចាំធ្វើការដោះស្រាយតាមផ្លូវច្បាប់។ 
