អាគារមួយខ្នងកំពស់ពីរជាន់ ដែលជាអំណោយរបស់ទីភ្នាក់ងារអភិវឌ្ឍន៏ប្រទេសបារាំង ផ្ដល់ជូនដល់មន្ទីរពេទ្យបង្អែកខេត្តតាកែវ ត្រូវបានដាក់សម្ពោធឲ្យប្រើប្រាស់ជាផ្លូវការ នៅមន្ទីរសុខាភិបាលខេត្តតាកែវ បន្ទាប់ពីដំណើរការសាងសង់បានបញ្ចប់រួចរាល់ ។ មន្ត្រីជាន់ខ្ពស់របស់
ក្រសួងសុខាភិបាល ឯកឧត្តម អេង ហួត រដ្ឋលេខាធិការក្រសួងសុខាភិបាល រួមនិងប្រធានទីភ្នាក់ងារអភិវឌ្ឍន៏បារាំង ប្រចាំនៅកម្ពុជា បានចូលរួមធ្វើជាអធិបតី នៅក្នុងពិធីសម្ពោធអាគារនេះ ។ មានប្រសាសន៏នៅក្នុងឪកាស់នោះ ឯកឧត្ត អេង ហួត រដ្ឋលេខាធិការក្រសួងសុខាភិបាល បានចាត់ទុកសំណង់អាគារ ដែលជាជំនួយរបស់កម្មវិធីអភិវឌ្ឍន៏ របស់ប្រទេសបារាំង ដល់មន្តីរពេទ្យបង្អែកខេត្តតាកែវថា វាបានផ្ដល់ផលប្រយោជន៏យ៉ាងធំធេង ដល់ប្រជាជនកម្ពុជា ជាពិសេសដល់ប្រជាជន ដែលងាយរងគ្រោះ និយាយជារួម អាគារនេះវាបានធ្វើឲ្យស្ថានភាពសុខភាព របស់ប្រជាជនកម្ពុជា កាន់តែមានភាពប្រសើរឡើងជាក់ជាពុំខាន។
ឯកឧត្តម អេង ហួត បានបន្តថា ជានិច្ចជាកាលរដ្ឋាភិបាលបារាំង តែងតែគាំទ្រចំពោះដំណើរការ នៃប្រព័ន្ធសុខាភិបាល នៅប្រទេសកម្ពុជា ហេតុដូច្នោះហើយបានជារដ្ឋាភិបាលប្រទេសបារាំង បានផ្ដល់អាគារនេះ ព្រមទាំងសម្ភារៈនិងបញ្ចេកទេសថែមទៀតផង ដែលចំនួយទាំងអស់នេះ វាបានធានាសុខភាពជាមូលដ្ឋាន និងធ្វើឲ្យមានការរីកចម្រើន ផ្នែកសុខភាពសង្គមថែមទៀតផង ។
អាគារដែលមានសម្ភារៈគ្រប់គ្រាន់នេះ និងអាចទទួលស្ត្រីមកពិនិត្យផ្ទៃពោះ និងសំរាលបុត្រដោយមានឆ្មបជំនាញ កុមារអាចត្រូវបានទទួលការថែទាំ នៅពេលចាប់កំណើតភ្លាមៗ និងប្រជាពលរដ្ឋគ្រប់គ្នា អាចមកពិនិត្យសុខភាព ដែលសកម្មភាពទាំងអស់នេះ វាកាត់បន្ថយនូវឧបស័គ្គ និងរារាំងប្រជាពលរដ្ឋ ពីការធ្លាក់ចុះទៅក្នុងភាពក្រីក្រ ដែលជាការរាំងស្ទះដល់ការអភិវឌ្ឍន៏សេដ្ឋកិច្ចសង្គម នៅកម្ពុជាផងដែរ ៕
