សាលាខេត្តត្បូងឃ្មុំ បានរៀបចំពិធីប្រកាសចូលកាន់តំណែង ប្រធាន អនុប្រធានមន្ទីរ ប្រធាន អនុប្រធានការិយាល័យ និងមន្ត្រីនៃមន្ទីរអភិវឌ្ឍន៍ជនបទខេត្ត ក្រោមអធិបតីភាព ឯកឧត្ដម ទ្រី ម៉េង រដ្ឋលេខាធិការ ក្រសួងអភិវឌ្ឍន៍ជនបទ ។ អញ្ជើញចូលរួមនាឱកាសនោះ មាន
ឯកឧត្ដមអភិបាលរងខេត្ត ឯកឧត្ដមសមាជិកក្រុមប្រឹក្សាខេត្តត្បូងឃ្មុំ តំណាងអគ្គនាយករងក្រសួងអភិវឌ្ឍន៍ ថ្នាក់ដឹកនាំមន្ទី អង្គភាព ជុំវិញខេត្ត ព្រមទាំង អភិបាល អភិបាលរងក្រុង ស្រុក និងមន្ត្រីរាជការ យ៉ាងច្រើនកុះករ ។ យោងតាមប្រកាសលេខ១២៩ ក.អ.ជ.ប្រ.ក របស់ក្រសួងអភិវឌ្ឍន៍ជនបទ ចុះថ្ងៃទី៣០ ខែមេសា ឆ្នាំ២០១៤ បានតែងតាំងលោក អាន ស៊ីណា ជាប្រធានមន្ទីរអភិវឌ្ឍន៍ជនបទ ខេត្តត្បូងឃ្មុំ និងថ្នាក់អនុប្រធានមន្ទីរ៣រូប ព្រមទាំង ថ្នាក់ប្រធាន អនុប្រធានការិយាល័យ ចំណុះមន្ទីរអភិវឌ្ឍន៍ជនបទ១៤រូប និងថ្នាក់ប្រធាន អនុប្រធានការិយាល័យ អភិវឌ្ឍន៍ជនបទក្រុង ស្រុក ក្នុងខេត្តត្បូងឃ្មុំ ចំនួន១៧រូប ។ 
លោក អាន ស៊ីណា ប្រធានមន្ទីរ ទើបបានតែងតាំងថ្មី និងតំណាងមន្ត្រីរាជការ មន្ទីរអភិវឌ្ឍន៍ជនបទ ខេត្តត្បូងឃ្មុំទាំងអស់ បានឡើងប្ដេជ្ញាចិត្ត គោរពច្បាប់រដ្ឋ និងអនុវត្តគោលនយោយបាយយុទ្ធសាស្ត្រ ចតុកោណទី៣ និងកំណែទម្រង់ស៊ីជម្រៅលើគ្រប់វិស័យ របស់រាជរដ្ឋាភិបាល ខិតខំបំពេញតួនាទី ជាប្រធានមន្ទីរ ទៅតាមបណ្ដាំផ្ញើ និងអនុសាសន៍ របស់ឯកឧត្ដមអភិបាលខេត្ត ឯកឧត្ដមរដ្ឋមន្ត្រី ប្រែក្លាយទៅជាសកម្មភាពប្រតិបត្តិការជាក់ស្ដែង យ៉ាងសកម្ម និងល្អប្រសើរ ហើយចូលរួមសហការជាមួយមន្ទីរ និងអាជ្ញាធរមូលដ្ឋានគ្រប់លំដាប់ថ្នាក់ ដើម្បីជម្រុញប្រសិទ្ធភាពការងារ ឲ្យបានកាន់តែល្អប្រសើរឡើង ។ 
បន្ទាប់ពីសុន្ទរកថាស្វាគមន៍ របស់ឯកឧត្ដម សុខ មករា អភិបាលរងខេត្តត្បូងឃ្មុំរួចមក ឯកឧត្ដម ទ្រី ម៉េង បានសាទរចំពោះថ្នាក់ដឹកនាំមន្ទីរ ក៏ដូចជាមន្ត្រីគ្រប់ថ្នាក់ នៃមន្ទីរអភិវឌ្ឍន៍ជនបទទាំងអស់ ដែលបានប្រកាសបំពេញការងារ ទៅតាមរចនាសម្ព័ន្ធ របស់មន្ទីរពេលនេះ ។ ឯកឧត្ដមមានប្រសាសន៍បញ្ជាក់ថា នេះគឺជាយន្តការដ៏មានសារៈសំខាន់ និងជាគោលនយោបាយ របស់រាជរដ្ឋាភិបាលកម្ពុជា អាណត្តិទី៥ ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ក៏ដូចជាក្រសួងអភិវឌ្ឍន៍ជនបទ ក្នុងការបង្កើតឲ្យមានមន្ទីរ និងក្បាលម៉ាស៊ីន ដឹកនាំស្ថាប័នជំនាញខ្សែបណ្ដោយរបស់ខ្លួន បន្ទាប់ពីខេត្តត្បូងឃ្មុំ ទើបបានបង្កើតថ្មី ។ 
ឯកឧត្ដមបន្តថា មួយវិញទៀត ការបង្កើតស្ថាប័ននីមួយៗ គឺទាមទារឲ្យមានខាងតែបាន នូវមន្ត្រីគ្រប់គ្រង ជាក្បាលម៉ាស៊ីន ដឹកនាំមន្ត្រីជំនាញក្រោមឱវាទ ដើម្បីឲ្យស្ថាប័ននោះ ដំណើរការ ឆ្លើយតបទៅនឹងគោលនយោបាយ របស់រាជរដ្ឋាភិបាល ជាពិសេស ការបំពេញភារកិច្ចស្នូល របស់មន្ទីរអភិវឌ្ឍន៍ជនបទ គឺការកសាង និងអភិវឌ្ឍន៍ហេដ្ឋារចនាសម្ព័ន្ធជនបទ ការលើកកម្ពស់សុខភាពអនាម័យ និងសេដ្ឋកិច្ចជនបទជាដើម ដើម្បីឆ្លើយតបទៅនឹងសេចក្ដីត្រូវការ របស់ប្រជាពរដ្ឋនៅក្នុងមូលដ្ឋានជាក់ស្ដែង ។
ជាមួយនឹងការសាទរនោះដែរ ឯកឧត្ដម ទ្រី ម៉េង ក៏បានផ្ដល់នូវអនុសាសន៍ ដល់ថ្នាក់ដឹកនាំមន្ទីរ និងមន្ត្រីគ្រប់លំដាប់ថ្នាក់ ត្រូវពង្រឹងសមត្ថភាពជំនាញរបស់ខ្លួន ។ មានសាមគ្គីភាពផ្ទៃក្នុងអង្គភាព និងទំនាក់ទំនងសហការល្អ ជាមួយមន្ទីរអង្គភាព ស្ថាប័ននានា ជុំវិញខេត្ត អាជ្ញាធរដែនដីគ្រប់លំដាប់ថ្នាក់ ដើម្បីឲ្យការងាររបស់ខ្លួន មានប្រសិទ្ធភាព តម្លាភាព និងគណនេយ្យភាព ជូនរាជរដ្ឋាភិបាល សាមីក្រសួង ក្រុមប្រឹក្សា និងគណៈអភិបាលខេត្ត និងមន្ត្រីរាជការទាំងអស់ផងដែរ ៕
