សៀមរាប : ព្រឹកថ្ងៃទី ០៧ ខែកក្កដា ឆ្នាំ២០១៤ ប្រជាពលរដ្ឋប្រមាណជាង៥០០នាក់ ក្នុងសង្កាត់ទឹលវិល និងសង្កាត់គោកចក ក្រុងសៀមរាប បានចូលរួមកម្មវិធីវេទិការសាធារណៈ ក្រោមអធិបតីភាព ឯ.ឧ សរ សុវណ្ណ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និង
ជាប្រធានក្រុមការងារថ្នាក់ក្រុង ដោយមានការចូលរួមពីសំណាក់ ឯ.ឧ លោកជំទាវ គណៈអភិបាលក្រុង មន្ទីរ-អង្គភាព ស្ថាប័នមានការពាក់ព័ន្ធ ផងដែរ។ បន្ទាប់ពីមតិស្វាគមន៍របស់លោក ស៊ូ ប្លាតុង អភិបាលស្តីទីក្រុងសៀមរាប ក្នុងអង្គពិធីរួចមក មានប្រសាសន៍នោះដែរ ឯ.ឧ សរ សុវណ្ណ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារថ្នាក់ក្រុង បានមានប្រសាសន៍ថា ដើម្បីគាំទ្រ និងរួមចំណែកជំរុញការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី០៣ ផែនការយុទ្ធសាស្ត្រអភិវឌ្ឍន៍ជាតិ
គោលនយោបាយ និងផែនការសកម្មភាពការងារ នីតិកាលទី៥ នៃរដ្ឋសភា រាជរដ្ឋាភិបាលបានចេញសេចក្តីសម្រេចបង្កើតក្រុមការងារចុះបេសកម្មតាមមូលដ្ឋាន ក្នុងគោលបំណងដើម្បីឲ្យកម្មវិធីនយោបាយខាងលើនេះ បានអនុវត្តប្រកបដោយប្រសិទ្ធភាពនៅគ្រប់មួលដ្ឋានទូទាំងប្រទេស។ ឯ.ឧ សរ សុវណ្ណ បានបន្តថា ក្នុងការបំពេញបេសកម្មនៅតាមមូលដ្ឋាន ក្រុមការងារមានតួនាទីលើកកម្ពស់កិច្ចសហការ សម្របសម្រួលក្នុងការដោះស្រាយបញ្ហានានា ដើម្បីបម្រើផលប្រយោជន៍ជូនប្រជាពលរដ្ឋតាមមូលដ្ឋាន , ផ្សារភ្ផាប់ទំនាក់ទំនងរវាង
រាជរដ្ឋាភិបាល និងប្រជាពលរដ្ឋ, លើកកម្ពស់ការទទួលខុសត្រូវរបស់ក្រសួង-ស្ថាប័ន ក៏ដូចជារដ្ឋបាលថ្នាក់ក្រោមជាតិ តាមរយៈការត្រួតពិនិត្យការអនុវត្តគម្រោង សកម្មភាពនានានៅតាមមូលដ្ឋាន , សហការជំរុញ និងលើកម្ពស់គណនេយ្យភាពក្នុងការផ្តល់សេវាសាធារណៈ និងអនុវត្តនៅតាមមូលដ្ឋានឲ្យមានប្រសិទ្ធភាព , សហការដោះស្រាយបញ្ហាប្រឈមនានា និងការលំបាករបស់ប្រជាពលរដ្ឋនៅមូលដ្ឋាន ដោយរៀបចំវេទិការសាធារណៈដូចថ្ងៃនេះ ដើម្បីស្តាប់សំណូមពរ និងសំណើររបស់បងប្អូន ដែលនៅទីនេះក្តី ឬពាំនាំនូវសំណើរ ដោយយកចិត្តទុកដាក់
ដោះស្រាយនូវរាល់សំណើរទាំងនោះ ដោយផ្អែកលើច្បាប់ និងបទដ្ឋានគតិយុត្តនានាជាធរមាន.។ ឯ.ឧ បានបញ្ផាក់ថា ក្នុងករណីមិនអាចដោះស្រាយបាន ក្រុមការងារនឹងទទួលយកសំណើរទាំងអស់ ហើយបូកសរុបរាយការណ៍ជូនក្រុមការងារថ្នាក់ជាតិចុះជួយខេត្តសៀមរាប ដើម្បីមានមូលដ្ឋានក្នុងការដោះស្រាយ ឬរាយការណ៍ជូនរាជរដ្ឋាភិបាលបន្តដោះស្រាយ៕ អត្ថបទ និង រូបភាព លោក អ៊ិន សីហរិទ្ធ