ប៉ោយប៉ែត៖ កាលពីថ្ងៃទី០៧ខែកក្កដាឆ្នាំ២០១៤សមត្ថកិច្ចជំនាញប្រឆាំងបទល្មើសសេដ្ឋកិច្ចខេត្តបន្ទាយមានជ័យសហការជាមួយគយរដ្ឋករប្រចាំច្រកទ្វារអន្តរជាតិប៉ោយប៉ែត បានចុះបង្ក្រាប់ទីតាំងលក់ម៉ូតូចំនួន០៥កន្លែងក្នុងពព្រិចភ្នែក ។ ទីតាំងលក់ម៉ូតូដែលសមត្ថកិច្ចចម្រុះ
ចុះបង្ក្រាបនោះនៅចំណុចក្បែរចំណតរថយន្តក្រុងប៉ោយប៉ែតនិងបេនចានដកហូតបានម៉ូតូអត់ពន្ធចំនួន០៥គ្រឿងយកទៅរក្សាទុកនៅអធិការដ្ឋាននគរបាលក្រុងប៉ោយប៉ែត ។
នៅក្នុងកិច្ចចុះបង្ក្រាបទីតាំងលក់ម៉ូតូនោះធើ្វឲ្យប្រជាពលរដ្ឋមានការសង្ស័យលើក្រុមសមត្ថកិច្ចជំនាញទាំងនោះផងដែរ ពោលគឺទីតាំងលក់ម៉ូតូក្តៅ(កាប់ដាវយកមកពីប្រទេសថៃ)ភាគច្រលើនមិនបានបង្ក្រាបនោះទេ ព្រោះម្ចាស់បានបិទទ្វារតូបមុនអស់ហើយ ។សូមបញ្ជាក់ថា៖ទីតាំងលក់ម៉ូតូក្តៅដែលគេសង្ស័យថាបែកព្រុយ៉ុងទាំងនោះរួមមាន៖ផ្លូវដើមពុទ្រាចំនួន០៣កន្លែង និងមុខវត្តបាលិលេយ្យដែលគេស្គាល់អ្នកនាំម៉ូតូក្តៅមកពីប្រទេសថៃឈ្មោះ ធូចំនួន១កន្លែង ចំណែកទីតាំងមួយកន្លែងទៀតនៅចំណុចហាងលក់បបរសជាប់និងផ្សាររាត្រីក្រុងប៉ោយប៉ែតតែម្តង ។
ស្ត្រីអ្នកលក់ម៉ូតូម្នាក់ដែលរងនូវការបង្ក្រាបពីសមត្ថកិច្ចខាងលើបានបង្ហើបឲ្យដឹងថា៖ឈ្មោះធូនៅមុខវត្តបាលិលេយ្យគឺជាឈ្មួញកណ្តាលមួយដ៏ធំនៅក្រុងប៉ោយប៉ែតនេះប៉ុន្តែការរកស៊ីរបស់គេហាក់បានចែកចុងចែកដើមគ្នាជាមួយមន្ត្រីជំជាញទាំងនោះ ហើយរាល់ពេលការចុះបង្ក្រាបម្តងៗគេពុំដែលឃើញសមត្ថកិច្ចជំនាញចុះឆែកទីតាំងស្តប់ម៉ូតូរបស់ឈ្មោះធូនោះទេ ពោលគឺសមត្ថកិច្ចដើរហួសទៅហួសជានិច្ច ។ លោក ចាប សុផារិទ្ធ ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តបន្ទាយមានជ័យដែលជាប់ឈ្មោះខាងចេញមុខកាង អ្នកនាំចូលម៉ូតូគេចពន្ធចូលប្រភេទពីប្រទេសថៃនោះមិនអាចទាក់ទងសុំការបំភ្លឺបានទេនៅថ្ងៃទី០៧ខែកក្កដាឆ្នាំ២០១៤នេះពាក់ពន្ធ័និងការចុះបង្ក្រាបម៉ូតូបែកព្រុយ៉ុងនៅក្រុងប៉ោយប៉ែត ។
ចំណែកមន្ត្រីគយម្នាក់បានឲ្យដឹងថា៖ករណីចុះបង្ក្រាបនេះគឺខាងនគរបាលជាអ្នកធើ្វទេភាគីខាងលោកគ្រាន់តែសហការពាក់ពន្ធ័និងម៉ូតូរួចពន្ធតែប៉ុណ្ណោះ ។ ចំណែកប្រជាពលរដ្ឋអ្នកនៅកន្លែងហេតុការណ៏ចុះបង្ក្រាបបានលើកឡើងថា៖បើសមត្ថកិច្ចមិនជាប់ជំពាក់និងរឿងពុករលួយទេនោះសមត្ថកិច្ចនឹងរកចំណូលចូលរដ្ឋពីការបង្ក្រាបនេះតែសកម្មភាពបង្ក្រាបហាក់ដើរវេចចកតែប៉ុណ្ណោះពោលគឺពួកគេមិនមានឆន្ទពិតប្រាកដនោះទេ ។ ប្រជាពលរដ្ឋនៅក្រុងប៉ោយប៉ែតដដែលបានលើកឡើងទៀតថា៖ក្រុមអ្នករកស៊ីម៉ូតូក្តៅមួយចំនួនធំ បានបិទទ្វារមុនការបង្ក្រាបមួយថ្ងៃ បញ្ហានេះបានឆ្លុះបញ្ចាំងឲ្យឃើញថា៖ការចុះបង្ក្រាបនេះគឺពិតជាបានធ្លាយព្រុយ៉ុងជាក់ជាមិនខាន ។ ដោយ៖មហាយក្ខជាយដែន