លោក Vahid Halilhodzic (វ៉ាហ៊ីដ ហាលីហូដហ្ស៊ីក) បានប្រកាសថា លោកសម្រេចចិត្តចុះចេញពីតំណែង គ្រូបង្វឹកក្រុមជម្រើសជាតិអាល់ហ្សេរី ។ បុរសសញ្ជាតិបូស្នៀរូបនេះបានដឹកនាំក្រុមបាល់ទាត់នៅតំបន់អាហ្វ្រិកមួយនេះឲ្យបានឡើងទៅកាន់វគ្គ១៦ក្រុមចុងក្រោយនៃការប្រកួតពានរង្វាន់ World Cup ប៉ុន្តែពួកគេត្រូវធ្លាក់ចេញក្រោមស្នាដៃរបស់ក្រុមឥន្ទ្រីដែកអាល្លឺម៉ង់ ។ លោក Halilhodzic មានវ័យ៦១ឆ្នាំដែលបានចូលដឹកនាំក្រុមអាល់ហ្សេរីក្នុងឆ្នាំ ២០១១ បាននិយាយប្រាប់ គេហទំព័ររបស់សហព័ន្ធបាល់ទាត់អាល់ហ្សេរីថា “ក្រោយពេលរួមរស់ជាមួយក្រុមអស់រយៈពេល៣ឆ្នាំមក ខ្ញុំបានសម្រេចចិត្តចាកចេញនៅពេលនេះហើយខ្ញុំពិតជាមានមោទនភាពចំពោះការដឹកនាំនេះ” ។ គួរបញ្ជាក់ថា អាល់ហ្សេរីបានប្រកួតឆ្លងផុតវគ្គចែកពូលជាលើកដំបូងក្នុងប្រវត្តិសាស្ត្ររបស់ខ្លួនក្នុងព្រឹត្តិការណ៍ World Cup ឆ្នាំនេះ ៕
