មណ្ឌលគីរី=ខេត្តមណ្ឌលគិរីបានប្រារព្វពិធីអបអរសារទរទិវាអន្តជាតិប្រយុទ្ធប្រឆាំងគ្រឿងញៀនកាលពីព្រឹកថ្ងៃទី៧ខែកក្កដា២០១៤នៅសាលប្រជុំសាលាខេត្តក្រោមប្រធានបទ”រួមគ្នាបង្ការនិងព្យាបាលបញ្ហាគ្រឿងញៀន”ពីធីនេះមានការអញ្ជើញចូលរួមពី ឯ.ឧ ញ៉ារាំងចាន់ប្រធានក្រុមប្រឹក្សាខេត្ត និងឯ.ឧ អេងប៊ុនហ៊ាងអភិបាលនៃគណះអភិបាលខេត្តមណ្ឌលគិរីព្រមទាំងកងកម្លាំងមន្ត្រីរាជការលោកគ្រូអ្នកគ្រូសិស្សានុសិស្សចូលរួមចំនួន២៥០នាក់ផងដែរ។
លោកឧត្តមសេនីយ៍ត្រី ញ៉ែម វ៉ាន់នី ស្នងការនគបាលខេត្តបានឲ្យដឹងថាការប្រារព្វពិធីទិវាអន្តរជាតិប្រយុទ្ធប្រឆាំងគ្រឿងញៀនថ្ងៃទី២៦ខែមិថុនាឆ្នាំ២០១៤នេះឡើងគឺដើម្បីចូលរួមប្រឆាំងនិងការដាំដុះ ការផលិត ការចរាចរ ការរក្សាទុក ការជួញដូរ ការចែកចាយនិងការប្រើប្រាស់គ្រឿងញៀនខុសច្បាប់។
យើងទាំងអស់គ្នាពិតជាយល់បានយ៉ាងច្បាស់ពីឥទ្ឋិពលគ្រឿងញៀនព្រោះថាវាមានផលវិបាកអ្វីខ្លះដល់សង្គមគ្រួសារយើងដល់បងប្អូនយើងដលកូនក្មួយយើងដែលត្រូវទទួលរងនូវឥទ្ឋិពលគ្រឿងញៀនដ៏គ្រោះថ្នាក់នេះ។ ប្រសិនបើកើតមានក្នុងសង្គមគ្រួសារណាមួយនោះប្រាកដជាបាត់បង់អស់នូវសេចក្តីសុខ សុភមង្គលបាត់បង់នូវទ្រព្យសម្បត្តិ បាត់បង់កិត្តិយស សេចក្តីថ្លៃថ្នូរ ត្រូវទទួលបានមកវិញនូវវិបត្តិ សេចក្តីទុកសោកនិងការវិនាសព្រាត់ប្រាស់គ្នា។
លោកស្នងការបានបន្តថា ការប្រារព្វពិធីប្រយុទ្ធប្រឆាំងគ្រឿងញៀននេះពិតជាមានសារសំខាន់ណាស់ដើម្បីសំដែងនូវឆន្ទៈ និងការយកចិត្តទុកដាក់ខ្ពស់ ពីសំណាក់រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខក្នុងការអនុវត្តខ្លឹមសារនៃសេចក្តីថ្លែងការរួមរបស់អាស៊ានដែលបានចេញក្នុងកិច្ចប្រជុំ កំពូលអាស៊ានកាលពី ថ្ងៃទី៣,៤មេសា ២០១២ នៅរាជធានីភ្នំពេញកន្លងទៅនេះស្តីពីអាស៊ានគ្មានគ្រឿងញៀននៅឆ្នាំ២០១៥។
មានប្រសាសន៍ក្នុងឪកាសនោះ ឯកឧតម្ត អេង ប៊ុនហ៊ាងអភិបាលខេត្តមណ្ឌលគិរី បានជំរុញអោយអាជ្ញាធរគ្រប់លំដាប់ថ្នាក់ជាពិសេសអាជ្ញាធរស្រុក. ក្រុង ឃុំ. សង្កាត់ត្រូវជំរុញផ្សព្វផ្សាយអោយបានទូលំទូលាយ ដើម្បីអោយប្រជាពលរដ្ឋយល់ដឹងនឹងជួយទប់ស្កាត់រាល់ការចែកចាយនិងសេពគ្រឿងញៀនដែលកើតមាននៅក្នុងភូមិ ឃុំរបស់ពួកគាត់ សកម្មភាពទាំងអស់នេះហើយដែលធ្វើអោយភូមិ ឃុំ មានសុវត្ថភាពសេចក្តីសុខសាន្តទៅថ្ងៃអនាគត់។
