ពិធីសម្ពោធដាក់ឲ្យប្រើប្រាស់ជាផ្លូវការអគារខ័ណ្ឌរដ្ឋបាលព្រៃឈើព្រះវិហារ ក្រោមជំនួយជាផ្លូវការរបស់រាជរដ្ឋាភិបាលជប៉ុនដោយមានការសំរបសំរួលពីអង្គការITTO គំរោងគ្រប់គ្រងព្រៃការពារតំបន់ត្រីកោណមរកត ដើម្បីលើកកំពស់កិច្ចសហប្រតិបត្តិការអភិរក្សជីវចម្រុះតាមបណ្តោយព្រំដែនរវាងប្រទេសថៃ កម្ពុជា ឡាវ ។ ពិធីនេះបានប្រព្រឹត្តទៅកាលពីព្រឹកថ្ងៃទី០៨ ខែកក្កដា ឆ្នាំ២០១៤ក្រោមអធិបតីភាពឯកឧត្តមបណ្ឌិត ឆេង គឹមស៊ុន ប្រតិភូរាជរដ្ឋាភិបាលទទួលបន្ទុកអគ្គនាយករដ្ឋបាលព្រៃឈើ ។
លោក អ៊ិត ភូម្រា នាយខ័ណ្ឌរដ្ឋបាលព្រៃឈើព្រះវិហារអានរបាយការណ៍សង្ខេបអំពីប្រវត្តិ និងការសាងសង់អគាររដ្ឋបាលព្រៃឈើ របាយការណ៍បានបញ្ជាក់ថាៈ អគារខ័ណ្ឌរដ្ឋបាលព្រៃឈើព្រះវិហារដែលកំពុងដាក់សម្ពោធថ្ងៃនេះគឺក្រោមជំនួយឧបត្ថម្ភរាជរដ្ឋាភិបាលជប៉ុន សម្របសម្រួលដោយគំរោងITTO ហើយក៍បានចាប់ផ្តើមសាងសង់នៅខែមិនា ឆ្នាំ២០១២ និងបានបញ្ចប់ជាស្ថាពរនៅខែមេសា ឆ្នាំ២០១៤ ដែលមានកំពស់២ជាន់ ដោយមានបន្ទប់ធ្វើការ និងបន្ទប់ប្រជុំ សរុបចំនួន១១បន្ទប់ ដែលចំណាយថវិការរបស់គំរោងចំនួន ១៤១.០០០ដុល្លារ និងទិញសំភារៈចំនួន ១៦០០០ដុល្លារ ។
បន្ទាប់មកខ័ណ្ឌរដ្ឋបាលព្រៃឈើព្រះវិហារក៍បានរៀបចំសាងសង់សាលប្រជុំបន្ថែមមួយទៀត បានចាក់សាបក្នុងទីធ្លា និងរៀបខឿនជុំវិញរបងខាងក្រៅបំពាក់តុ កៅអី ឧបករណ៍បំពងសំលេង និងសំភារៈការិយាល័យមួយចំនួនទៀត ចំណាយថវិការចំនួន ៥៣០០០ដុល្លារ គឺជាថវិការលើកទឹកចិត្តរបស់រដ្ឋបាលព្រៃឈើ និងថវិការមួយចំនួនទៀតគឺជាការរួមចំណែករបស់សប្បុរសជន ។ ដូច្នេះសរុបថវិការចំណាយទាំងអស់នៅលើអគារខ័ណ្ឌរដ្ឋបាលថ្មីនេះគឺមានទឹកប្រាក់ចំនួន ២១ ម៉ឺនដុល្លារ ។
អគារដែលបានសាងសង់រួចនេះ គឺជាការរួមចំណែកមួយក្នុងការគ្រប់គ្រង និងអភិវឌ្ឍន៍វិស័យព្រៃឈើឲ្យមាននិរន្តភាព លើកកំពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ ដើម្បីធ្វើឲ្យសំរេចបាននូវគោលនយោបាយវិស័យព្រៃឈើជាតិ រដ្ឋបាលព្រៃឈើបានដាក់ចេញនូវកម្មវិធីព្រៃឈើជាតិសំរាប់តម្រង់ទិសដើម្បីឈានទៅរកការគ្រប់គ្រងព្រៃឈើ និងអភិវឌ្ឍន៍វិស័យព្រៃឈើនៅកម្ពុជាប្រកបដោយចិរភាពសំរាប់មនុស្សជំនាន់ក្រោយៗទៀត ។
ឯកឧត្តម អ៊ុំ ម៉ារ៉ា អភិបាលនៃគណអភិបាលខេត្តព្រះវិហារមានប្រសាសន៍ថា គោលបំណងនៃការអភិវឌ្ឍន៍សំរាប់ដំណាក់កាលទី៣ របស់គម្រោងស្តីពីការគ្រប់គ្រងតំបន់ព្រៃការពារត្រីកោណមរតក ដើម្បីជំរុញកិច្ចសហប្រតិបត្តិការតាមបណ្តោយព្រំដែនកម្ពុជា ថៃ ឡាវ គឺដើម្បីចូលរួចំណែកក្នុងការអភិរក្សជីវចម្រុះតាមបណ្តោយព្រំដែននៃតំបន់ព្រៃការពារត្រីកោណមរកត រវាងព្រះរាជាណាចក្រកម្ពុជា ព្រះរាជាណាចក្រថៃ និងសាធារណរដ្ឋប្រជាធិបតេយ្យ ប្រជាមានិតឡាវ ។
គោលបំណងជាក់លាក់របស់គំរោងគឺដើម្បីពង្រឹងការការពារតាមបណ្តោយព្រំដែនរួម នៅទីជំរកនៃប្រភេទសត្វព្រៃដ៍ច្រើនចម្រុះនៅក្នុងតំបន់ត្រីកោណមរកត ។ ឯកឧត្តម ឆេង គឹមស៊ុន មានប្រសាសន៍ថាៈ កិច្ចសហប្រតិបត្តិការធ្វេរភាគីរវាងកម្ពុជា និងជប៉ុន ក្នុងវិស័យកសិកម្មបានចាប់ផ្តើមតាំងពីឆ្នាំ១៩៩៣មកម្លេះរហូតមកដល់ពេលបច្ចុប្បន្ននេះ យើងទទួលបានជំនួយលើការបណ្តុះបណ្តាល និងអភិវឌ្ឍធនធានមនុស្ស ផ្តល់នូវជំនាញដើម្បីជួយពង្រឹងសមត្ថភាពផ្នែកទីផ្សារកសិកម្ម ការងារស្រាវជ្រាវកសិកម្ម និងការផ្តល់នូវជំនួយអភិវឌ្ឍន៍ជូនដល់រដ្ឋបាលព្រៃឈើ និងអង្គភាពជំនាញសំខាន់ៗក្រោមឱវាតក្រសួងកសិកម្ម រុក្ខាប្រមាញ់ និងនេសាទ ។
ឯកឧត្តម ក៍បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល និងប្រជាជនជប៉ុន ដែលបានជួយគាំទ្រដល់រាជរដ្ឋភិបាលកម្ពុជាក្នុងកម្មវិធីថែរក្សាព្រៃឈើ ដែលមានថវិការចំនួន៩០០លានយ៉េន និងគម្រោងគ្រប់គ្រងព្រៃការពារត្រីកោណមរកត ដើម្បីលើកកំពស់កិច្ចសហប្រតិបត្តិការអភិរក្សជីវៈចម្រុះតាមបណ្តោយព្រំដែនរួមជំហានទី៣ ផ្នែកអនុវត្តគំរោងកម្ពុជាចំនួន ១.៣លានដុល្លារ ជាការឆ្លើយតបទៅនឹងការជួយឧបត្ថម្ភទាំងនេះក្រសួងកសិកម្ម រុក្ខាប្រមាញ់ និងនេសាទ ដែលមានរដ្ឋបាលព្រៃឈើជាសេនាធិការ និងខិតខំប្រឹងប្រែងពង្រឹងលើការអភិរក្សព្រៃឈើឲ្យបានជោគជ័យ ពិសេសតាមរយៈកម្មវិធីព្រៃឈើជាតិ២០១០.២០២៩ ។
