ក្រុងប៉ោយប៉ែត៖ ពលករខ្មែរប្រុសស្រីចំនួន១៣នាក់ឆ្លងដែនទៅប្រទេសថៃជួបគ្រោះថ្នាក់ចរាចរណ៏នៅខេត្តប្រាជិនបូរីកាលពីយប់ថ្ងៃទី០៦ខែកក្កដាឆ្នាំ២០១៤ ហេតុការណ៏គ្រោះថ្នាក់នោះបានបង្កឲ្យពលករខ្មែប្រុសស្រីចំនួន១១នាក់បានរងរបួសធ្ងន់និង២នាក់ផ្សេងទៀតបានស្លាប់បាត់បង់ជីវិត ។ ចំណោមពលករទាំងនោះមាន៤នាក់មកពីតំបន់បឹង៥ខេត្តបាត់ដំបង និងដោយឡែក០៩នាក់ផ្សេងទៀតមិនទាន់បានដឹងអត្តសញ្ញាណនៅឡើយទេ ស្ត្រីម្នាក់ឈ្មោះសាមឿនមានអាយុ៥៩ឆ្នាំត្រូវជាម្តាយជនរងគ្រោះបានឲ្យដឹងថា៖មនុស្សចំនួន០៤នាក់ក្នុងចំណោមទាំងនោះត្រូវជាកូនរបស់គាត់ហើយម្នាក់ឈ្មោះឡាច សុភាមានអាយុ២៩ឆ្នាំបានស្លាប់បាត់បង់ជីវិតដោយគ្រោះថ្នាក់ចរាចរណ៏នៅក្នុងប្រទេសថៃកាលពីយប់ថ្ងៃទី០៦ខែកក្កដាឆ្នាំ២០១៤នោះ។
ស្ត្រីដដែលបានប្រាប់ទៀតថា៖នៅក្នុងគ្រោះថ្នាក់ចរាចរណ៏នោះបានសម្លាប់ពលករខ្មែរចំនួន០២នាក់ ម្នាក់ត្រូវជាកូនរបស់គាត់ ចំណែកអ្នកដែលរងរបួសធ្ងន់មាន៣នាក់ក៏ជាកូនរបស់គាត់ដែរ ។១ឈ្មោះឡាចសុធីភេទប្រុសខេត្តបាត់ដំបង២ឈ្មោះសនស៊យភេទស្រីខេត្តបាត់ដំបងត្រូវជាកូនប្រសារនិងទី៣ឈ្មោះសេងញេណភេទស្រីខេត្តបាត់ដំបងក៏ជាកូនប្រសារដែរហើយពេលនេះកំពុងតែដឹកទៅសង្គ្រោះនៅមន្ទីរពេទ្យនៅក្នុងប្រទេសថៃ ។
ចំណែកយុវជនឈ្មោះឡាចចំរើនត្រូវជាកូនទី០៤របស់លោកយាយសាយសាមឿនបានឲ្យដឹងថា៖ មូលហេតុដែលក្រុមគ្រួសាររបស់ខ្លួនប្រថុយប្រថានទៅរកការងារធើ្វនៅប្រទេសថៃនោះ ព្រោះដីធ្លីបន្តិចបន្តូចនៅខេត្តបាត់ដំបងក្នុងតំបន់បឹង៥នោះត្រូវបានក្រុមហ៊ុននិងអ្នកមានអំណាចរំលោភយកអស់ហើយ។
កត្តាដូច្នេះទើបជាហេតុធើ្វឲ្យក្រុមគ្រួសាររបស់គេដាក់ចិត្តទៅរកការងារធើ្វនៅប្រទេសថៃ ប៉ុន្តែជាអកុសលគ្រួសារមួយនេះបានជួបរឿងអាក្រក់ដោយបងប្អូនមានគ្រោះថ្នាក់ចរាចរណ៏ស្លាប់និងរងរបួសនៅប្រទេសថៃ ចំរើនបាននិយាយបណ្តើរបង្ហូរទឹកភ្នែកបណ្តើរដោយអ៊ូលដើមករបញ្ចេញសម្លេងខ្សឹបខ្សេវ ថា៖ចាប់ពីថ្ងៃនេះតទៅក្នុងគ្រួសាររបស់គេមានតែជនពិការច្រើនជាងមិនមានមនុស្សល្អទៀតឡើយ ក្រៅពីខ្លួនគេនិងម្តាយចំណាស់ស្ថិតក្នុងវ័យ៥៩ឆ្នាំនោះ ។
ដោយជីវភាពលំបាកខ្លាំងពេក ឡាច ចំរើននិងម្តាយចំណាស់បានព្រមព្រៀងគ្នាយកសាកសពបងប្រុសរបស់ខ្លួនដែលរដ្ឋាភិបាលថៃដឹកមកប្រគល់ឲ្យនោះបូជានៅក្នុងវត្តបាលិលេយ្យឯក្រុងប៉ោយប៉ែតតែម្តង ។
ចំណែកលោក អនុសេនីយ៏ឯកឈុន ណា មន្ត្រីការិយាល័យទំនាក់ទំនងព្រំដែនកម្ពុជាថៃ បានឲ្យដឹងនៅថ្ងៃទី០៨ខែកក្កឆ្នាំ២០១៤នេះថា៖ ហេតុការគ្រោះថ្នាក់ចរាចរណ៏ខាងលើបានបង្កឲ្យពលករខ្មែរ១១នាក់រងរបួសក្នុងនោះមានប្រុស៨នាក់និង២នាក់បានស្លាប់បាត់បង់ជីវិតមន្ត្រីដដែលបានបញ្ជាក់ថាជនរងគ្រោះទាំងនោះបានលួចចូលទៅប្រទេសថៃតាមច្រករបៀងហើយពួកគេមានការដឹកនាំដោយមេខ្យល់ដែលមានទំនាក់ទំនងជាមួយសមត្ថកិច្ចឈរជើងនៅតាមបន្ទាត់ព្រំដែនកម្ពុជាថៃ លោកឈុន ណាថាជនរងគ្រោះបានចំណាយថវិកាម្នាក់ចំនួន៣០០០បាតប្រាក់ថៃ ឲ្យទៅក្រុមមេខ្យល់ ។
