ម៉ាយឌូហ្គូរីៈ ស្ត្រីនិងក្មេងស្រីជាង៦០នាក់ដែលត្រូវបានចាប់ពង្រត់កាលពីខែមុន ដោយពួកសកម្មប្រយុទ្ធបូកូហារ៉ាម (Boko Haram) នៅប្រទេសនីហ្សេរីយ៉ាភាគឦសាននោះ បានរត់គេចខ្លួនរួចពីពួកអ្នកចាប់ខ្លួនពួកគេហើយវិលត្រឡប់មកផ្ទះវិញហើយ។ នេះបើតាមប្រភពព័ត៌មានបានរាយការណ៍ កាលពីថ្ងៃអាទិត្យ ហើយត្រូវបានវេបសាយបរទេសអាល់ហ្សាហ្សីរ៉ា ផ្សាយកាលពីចន្ទ ទី 7 កក្កដា 2014។
ប្រជាការពារមូលដ្ឋានលោក អាប់បាស ហ្កាវ៉ា បាននិយាយថា លោកបានទទួលការជូនដំណឹងថា ស្ត្រី និងក្មេងស្ត្រីប្រមាណ៦៣នាក់ដែល ត្រូវចាប់ពង្រត់ពីមុនមកនោះបានវិលមកផ្ទះរបស់គេកាលពីយប់ថ្ងៃសុក្រ។ ប្រភពព័ត៌មានសន្តិសុខថ្នាក់ខ្ពស់មួយនៅទីក្រុងម៉ាយឌូហ្គូរី ក៏បានអះអាងអំពីការរត់គេចខ្លួននេះដែរ។
សូមរំឭកថា ពួកសកម្មប្រយុទ្ធបូកូហារ៉ាម បានចាប់ស្ត្រី និងក្មេងស្រីភាគច្រើនជាសិស្សចេញពីសាលារៀនមួយប្រមាណជា២០០នាក់ ក្រោយមកពួកដដែលនេះបានចាប់ខ្លួន បន្ថែមប្រមាណ៥០នាក់ ។ ទោះបីជាមានការទទូច និងអំពាវនាវពីប្រមុខដឹកនាំប្រទេសនីហ្សេរីយ៉ា និងអង្គការអន្តរជាតិ ក៏ដូចជាប្រមុខរដ្ឋបណ្តា ប្រទេសមួយចំនួនសុំឲ្យដោះលែងពួកគេក្តីក៏ពួកសកម្មប្រយុទ្ធបូកូហារ៉ាម មិនព្រមដោះលែងពួកគេនោះទេ ពួកបូកូហារ៉ាមអះអាងថា ពួកគេដោះលែងដរាបណា អាជ្ញាធរនីហ្សេរីយ៉ាដោះលែងពួកសកម្មប្រយុទ្ធដែលនៅជាប់ឃុំទាំងអស់នោះជាថ្នូរវិញដែរ។ ប៉ុន្តែសំណើទាំងនេះត្រូវបានបដិសេធ ៕
