ខ្សែការពាររបស់ក្លិបសារិការព្រៃ Newcastle គឺកីឡាករ Mathieu Debuchy ត្រូវបានគេអះអាងថា កំពុងតែ បើកកិច្ចពិភាក្សាជាមួយក្លិបកាំភ្លើងធំ Arsenal បន្ទាប់ពីរូបគេអស់ភារកិច្ចជាមួយក្រុមមាន់គកបារាំងក្នុងការប្រកួត World Cup ។ គ្រូបង្វឹក Arsenal លោក Arsene Wenger កំពុងតែស្វែងរកខ្សែការពារស្លាបស្តាំថ្មីម្នាក់ដើម្បីជំនួសកីឡាករ Bacary Sagna បន្ទាប់ពីរូបគេយល់ព្រមផ្លាស់ទៅកាន់ក្លិបមេឃខៀវ Manchester City ។
ទោះបីជាយ៉ាងណាក៏ដោយ Debuchy បានលើកឡើងថា រូបគេមិនទាន់សម្រេចចិត្តផ្លាស់ទៅកាន់ទឹកដី Emirates នៅឡើយទេថ្វីបើគេបានបង្ហាញលើទំព័រ Instagram របស់ខ្លួនថា “លាហើយប្រេស៊ីល ស្វាគមន៍ Arsenal ” ក៏ដោយ ។ គួរបញ្ជាក់ថា បើសិនជាអតីតកីឡាកររបស់ក្លិប Lille (លីល) រូបនេះព្រមព្រៀងផ្លាស់មកកាន់ Arsenal មែននោះ បានន័យថា Debuchy នឹងក្លាយជាកីឡាករដំបូងគេដែល Arsenal ទិញបាននីរដូវក្តៅនេះ ៕