អតីតខ្សែការពារឆ្វេងរបស់ក្រុមជម្រើសជាតិអង់គ្លេសកីឡាករ Ashley Cole (អាស្លី ខូល) បានសម្រេចចិត្ត ប្តូរទ្រនំថ្មីនៅជាមួយក្លិបចចកព្រៃ Roma បន្ទាប់ពីរូបគេបានបញ្ចប់កិច្ចសន្យាជាមួយក្លិបតោខៀវ Chelsea ។ យោងតាមគេហទំព័រ Goal.com បានផ្សព្វផ្សាយថា Cole បានធ្វើដំណើរមកដល់ប្រទេសអ៊ីតាលី កាលពីថ្ងៃច័ន្ទដើម្បីចុះកិច្ចព្រមព្រៀងជាមួយក្លិប Roma លើកិច្ចសន្យារយៈពេល២ឆ្នាំជាមួយនឹងតម្លៃពលកម្មប្រមាណ ៣៨,០០០ ផោនក្នុងមួយសប្តាហ៍ ។
ក្លិប Roma បានបង្ហោះលើគេហទំព័ររបស់ខ្លួនថា “កីឡាករ Cole បានមកដល់ទីក្រុងរ៉ូមហើយបានព្រមព្រៀង លក្ខ័ណ និងធ្វើការពិនិត្យសុខភាពរួចរាល់ហើយ” ។ គួរបញ្ជាក់ថា Cole បានចំណាយពេលរួមរស់ជាមួយក្លិបតោខៀវ Chelsea អស់រយៈពេល ៨ ឆ្នាំបន្ទាប់ពីរូបគេ ផ្លាស់ចេញពីក្លិបកាំភ្លើងធំ Arsenal ក្នុងឆ្នាំ ២០០៦ ៕
