ខេត្តក្រចេះ ការវិនិយោគសណ្ឋាគារដ៏ស្រស់ប្រណីត មានលក្ខណៈស្តង់ដារ គឺជាសមិទ្ធិផលថ្មីមួយបន្ថែមទៀត សំរាប់ខេត្តក្រចេះ ដែលស្ថិតនៅភូមិភាគឦសាន ហើយមានសក្តានុពលផ្នែកវិស័យកសិកម្ម និង ទេសចរណ៍ ដ៏ល្បីល្បាញរបស់កម្ពុជា នោះគឺ សណ្ឋាគារមេគង្គដលហ្វីន ដ៏
ប្រណីត និង ធំស្កឹមស្កៃ ត្រូវបានសម្ពោធ ក្រោមអធិបតី លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និង អធិការកិច្ច នៅភូមិផ្សារវែង សង្កាត់ក្រចេះ ក្រុងក្រចេះ ខេត្តក្រចេះ កាលពីព្រឹកថ្ងៃទី ៨ ខែកក្កដា ឆ្នាំ២០១៤ ។
ឯកឧត្តម សរ ចំរុង អភិបាល នៃគណៈអភិបាលខេត្តក្រចេះ បានឲ្យដឹងថា ខេត្តបាននឹងកំពុងអនុវត្តផែនការយកចិត្តទុកដាក់ បំពេញតាមសូចនាករ និង លក្ខណៈវិនិច្ឆ័យទីក្រុងស្អាត ដើម្បីទាក់ទាញភ្ញៀវទេសចរណ៍ជាតិ និង អន្តរជាតិ មកទស្សនាខេត្តក្រចេះ ។ ដោយឡែក រយៈពេលឆមាសទី១ ដើមឆ្នាំ២០១៤ ខេត្តក្រចេះទទួលបានភ្ញៀវទេសចរណ៍ អន្តរជាតិបាន១២.៦៦២ នាក់ ធៀបនឹងឆ្នាំ២០១៣ មានចំនួន១១.៥៤១ នាក់ មានការកើនឡើង ៩,៧១% និង ភ្ញៀវជាតិ ១៩៩,៧១២ នាក់ ធៀបនឹង ២០១៣ មាន ១៩០,០០២ នាក់ មានការកើនឡើង ៩,៧១០នាក់ ស្មើនឹង ៥.១១% ។
លោកជំទាវ ម៉ែន សំអន មានប្រសាសន៍ថា រយៈពេលប៉ុន្មានឆ្នាំចុងក្រោយនេះ កម្ពុជាមានកំណើនសេដ្ឋកិច្ច ជាមធ្យម៧% ហើយតាមរយៈរបាយការ របស់ ឯកឧត្តម សរ ចំរុង សរបញ្ជាក់ថា ក្រោមចង្កូតនាវារបស់ប្រមុខដឹកនាំ ដែលមានសម្តេចទាំង៣ ធ្វើឲ្យកម្ពុជា បោះជំហានទៅមុខជាលំដាប់ ប្រជាជនរស់នៅ ប្របដោយភាពងាយស្រួល ទំនើប ស៊ីវីល័យ និង សេវាកម្មដ៏ល្អប្រសើរ ក្នុងនាម កម្ពុជា ជាព្រះរាជាណាចក្រអច្ឆរិយៈ ដែលមានសក្តានុពល លើវិស័យទេសចរណ៍ វប្បធម៌ និង ធម្មជាតិ ។ 
លោកជំទាវ បន្តថា ការប្រកួតប្រជែង នៃឥទ្ធិពលសកលភាវូបនីយកម្ម ជាកក្តាធ្វើឲ្យយើងខិតខំ ស្របដៃជើងគ្នា ក្នុងការទាក់ទាញភ្ញៀវ ទេសចរណ៍ ឲ្យបង្វែទិស មកទស្សនាប្រទេសកម្ពុជាយើង ដែលឧស្សាហកម្មទេសចរណ៍មួយនេះ ទាមទារឲ្យដៃគូពាក់ព័ន្ធ ប្រឹងលើកកំពស់ គុណភាព សេវាកម្ម ការឃោសនាផ្សព្វផ្សាយ និង មគ្គុទេសទេសចរណ៍ ជាពិសេសតំលៃសមរម្យ ដើម្បីផលប្រយោជន៍រយៈពេលយូរអង្វែង ។
លោកជំទាវ ម៉ែន សំអន ក៏បានសាទរចំពោះសមិទ្ធិផលថ្មីរបស់ ឯកឧត្តម ទូច ណារ៉ុថ លើទុនវិនិយោគធ្វើអាជីវកម្ម និង សេវាកម្មសណ្ឋាគារថ្មីនេះ ក្នុងការរួមចំណែកបំរើដល់វិស័យទេសចរណ៍ និង ការកាត់បន្ថយភាពក្រីក្រ ក្នុងខេត្តក្រចេះ ស្របតាមយុទ្ធចតុកោណដំណាក់កាលទី៣ របស់រាជរដ្ឋាភិបាលកម្ពុជា ៕
