នគរបាល កម្លាំងអាវុធហត្ថ ប្រជាការពារ និងមន្រ្តីពាក់ព័ន្ធជាច្រើននាក់ ផ្សេងទៀត បានបើកប្រតិបត្តិការទាំងយប់ ត្រួតពិនិត្យ អាវុធជាតិផ្ទុះ តាមដងផ្លូវជាតិលេខ២ ខាងមុខផ្សារទួលរការ សង្កាត់ចាក់អង្រែក្រោម ខណ្ឌមានជ័យ ដើម្បីចូលរួម រក្សាសន្តិសុខ និងសវុត្ថិភាព សម្រាប់ថ្ងៃដង្ហែក្បួនព្រះអដ្ឋិ ។
លោក ហៀក ចាន់លៀង បានថ្លែងឲ្យដឹងថា ដោយមានការណែនាំពីអភិបាលរាជធានីភ្នំពេញ ឯកឧត្តម ប៉ា សុជាតិវង្ស ក្នុងនាមលោកជាអជ្ញារធ័ខណ្ឌ បានដឹកនាំកម្លាំងសមត្ថកិច្ចទាំងនគរបាល អាវុធហត្ថ និងមន្រ្តីអាជ្ញាធរ មូលដ្ឋាន ចុះត្រួតពិនិត្យ តាមដងផ្លូវ នាយប់ថ្ងៃទី៩ ខែកក្កដា ឆ្នាំ២០១៤ដើម្បីឆែកអាវុធជាតិផ្ទុះ ចំពោះអ្នកធ្វើដំណើរ ដែលចូលមករាជធានីភ្នំពេញ ក្នុងគោល បំណង ត្រៀមរក្សាសន្តិសុខ និម្តងថកិច្ចសុវត្ថិភាព ចំពោះថ្ងៃដង្ហែក្បួនព្រះអដ្ឋិ នាថ្ងៃទី១១ ខែកក្កដា ឆ្នាំ២០១៤ខាងមុខនេះ។
អភិបាលរង ខណ្ឌមានជ័យ បានបន្តទៀត ប្រតិបត្តិការខាងលើនេះ ធ្វើឡើងក៏ដើម្បីចូលរួម ទប់ស្កាត់បទល្មើស ខណៈសកម្មភាពឆក់ ប្លន់ បានកើតឡើង ក្នុងរយះពេលកន្លងទៅនេះ ។ ក្នុងប្រតិបត្តការនេះសមត្ថកិច្ចឃាត់រថយន្តដើម្បីត្រួតនិត្យមានចំនួន៧៤គ្រឿងនិងម៉ូតូចំនួន៨២គ្រឿងរកឃើញអាវុធខ្លីចំនួន៣ដើម ហើយអាវុធទាំងអស់នេះសុទ្ធតែមានត្រឹមត្រូវ។
សូមបញ្ជាក់ថា កម្លាំងសមត្ថកិច្ច ទាំងនគរបាល និងអាវុធហត្ថ តាមបណ្តាខណ្ឌ តែងតែចុះត្រួតពិនិត្យ អាវុធជាតិផ្ទុះ នៅតាមដងផ្លូវក្នុងគោលបំណងជួយទប់ស្កាត់ ការធ្វើសកម្មភាពផ្សេងៗ របស់ក្រុមជនល្មើស នៅក្នុងរាជធានីភ្នំពេញ ។
ជាមួយគ្នានេះ ការចុះត្រួតពិនិត្យ អាវុធជាតិផ្ទុះ ខាងលើនេះ ក៏ដើម្បី ពិនិត្យមើល ការបើកបរ របស់ប្រជាពលរដ្ឋ ឲ្យគោរពច្បាប់ ចរាចរណ៍ផងដែរ ៕ ប៊ុនធី
