កីឡាករ Toni Kroos មានជំនឿចិត្តយ៉ាងមុតមាំថា ក្រុមឥន្ទ្រីដែកអាល្លឺម៉ង់នឹងអាចលើកពាន World Cup នៅថ្ងៃអាទិត្យនេះបានបន្ទាប់ពីពួកគេបានបំបាក់ម្ចាស់ផ្ទះប្រេស៊ីលនៅវគ្គ៤ក្រុម ចុងក្រោយ ។ ខ្សែបម្រើរបស់ក្លិប Bayern Munich រូបនេះស៊ុតបាន២គ្រាប់ក្នុងការប្រកួតដែលអាល្លឺម៉ង់យកឈ្នះប្រេស៊ីល៧-១នៅទីក្រុង បេឡូហូរីហ្សង់តេ ហើយនេះជាបរាជ័យដ៏ធ្ងន់ធ្ងរបំផុតរបស់ប្រេស៊ីល ។
Kroos ត្រូវបានគេជ្រើសរើសជាកីឡាករលេងល្អបំផុតក្នុងការប្រកួតជាមួយប្រេស៊ីលហើយរូបគេបានលើកឡើងថា អាល្លឺម៉ង់ត្រូវតែរក្សាទម្រង់លេងដ៏ល្អបែបនេះទៀតក្នុងការប្រកួតវគ្គផ្តាច់ព្រ័ត្រ ជាមួយអាហ្សង់ទីនឬហូឡង់ក្នុងទីក្រុង រីយ៉ូឌឺជេណេរ៉ូ នៅចុងសប្តាហ៍នេះដើម្បីឆ្ពោះទៅរកការលើកពាន World Cup ជាលើកទី៤ ។
Kroos បញ្ជាក់ប្រាប់អ្នកសារព័ត៌មានថា “យើងមកទីនេះដើម្បីក្លាយជាជើងឯកពិភពលោក ហើយអាល្លឺម៉ង់ជាក្រុមដែលសក្តិសមជាងគេបំផុត” ៕