ខេត្តកណ្តាល៖ ជនសង្ស័យ២នាក់ ត្រូវនគរបាលប៉ុស្តិ៍ចាក់អង្រែក្រោម ឃាត់ខ្លួនភ្លាម បន្ទាប់ពីពួកគេធ្វើសកម្មភាព កាច់កម៉ូតូរបស់ជនរងគ្រោះពីភូមិដើមមៀន ក្រុងតាខ្មៅ ហើយត្រូវម្ចាស់ម៉ូតូ ស្រែកឲ្យសមត្ថកិច្ចជួយចាប់កាលពីវេលាម៉ោង៥ និង៣០ នាទីល្ងាច ថ្ងៃទី៩ ខែកក្កដា
ឆ្នាំ២០១៤នៅភូមិព្រែកតាឡុង សង្កាត់ចាក់ អង្រែក្រោម ខណ្ឌមានជ័យ ។
នាយនគរបាលប៉ុស្តិ៍ លោក ឡោ លីនណូបានឲ្យដឹងថាជនរងគ្រោះជាម្ចាស់ម៉ូតូមានឈ្មោះ ស៊ឹម សុផល ភេទប្រុស អាយុ ៥៣ឆ្នាំមុខរបរលក់គ្រឿងសង្ហារឹម ស្នាក់នៅភូមិដើមមៀន សង្កាត់ដើមមៀន ក្រុងតាខ្មៅខេត្តកណ្តាល ។
លោកបានបញ្ជាក់ថា បើតាមបុរសម្ចាស់ ម៉ូតូ បាននិយាយថា មុនពេលកើតហេតុ គាត់បានទុកដាក់ ម៉ូតូនៅមុខផ្ទះ ហើយក៏ដើរចូលក្នុងផ្ទះ មិនទាន់ផុតផងស្រាប់តែក្រឡែកក្រោយ ក៏ឃើញជនសង្ស័យ បណ្តើរចេញបានប្រមាណ១០-២០ម៉ែត្រ ឃើញដូច្នេះ គាត់ក៏ស្រែកថាចោរ ផ្អើលឆោឡោ ដល់ប្រជាពលរដ្ឋ និងសមត្ថកិច្ចដេញ ស្ទាក់ចាប់បានភ្លាមៗតែម្តង ។
នាយនគរបាល លោក ឡោ លីនណូ បានឲ្យដឹងថា ជនសង្ស័យមាន ឈ្មោះ សុខថា ភេទប្រុស អាយុ ២៨ឆ្នាំ មុខរបរមិនពិតប្រាកដស្នាក់នៅភូមិកោះដាច់ សង្កាត់កោះដាច់ ខណ្ឌជ្រោយចង្វា និងម្នាក់ទៀត ដែលជាអ្នកធ្វើ សកម្មភាពផ្ទាល់ចូលកាច់កម៉ូតូ ឈ្មោះ នុត ជា ភេទប្រុស អាយុ៣៥ឆ្នាំ ជាកសិកររស់នៅភូមិ-ឃុំខ្សែប ស្រុកកំពង់រោរ៍ ខេត្តស្វាយរៀង ។
ជាមួយគ្នានោះសមត្ថកិច្ច ធ្វើការដកហូតបានម៉ូតូសេ១២៥ ស៊េរី២០១១ ពណ៌ខ្មៅ ពាក់ស្លាកលេខភ្នំពេញ 1AN-0168 មួយគ្រឿង និងឧបករណ៍កាច់កម៉ូតូមួយចំនួនទៀត ព្រមទាំងម៉ូតូក្រុម ជនសង្ស័យជិះធ្វើសកម្មភាព មួយគ្រឿងទៀតផងដែរ ។បច្ចុប្បន្នជនសង្ស័យ រួមជាមួយវត្ថុតាង ត្រូវបានបញ្ជូន ទៅកាន់អធិការដ្ឋានននគរបាលក្រុងតាខ្មៅ ដើម្បីចាត់ ការបន្ត តាមច្បាប់ជាធរមាន ៕
