ភ្នំពេញៈ យុវជនម្នាក់ត្រូវរងរបួសធ្ងន់ធ្ងរបន្ទាប់ពីរូបគេជិះម៉ូតូមួយគ្រឿងម៉ាកគុបជ្រុងហើយ ត្រូវរថយន្តតាក់ស៊ី របស់ក្រុមហ៊ុនឆយ បើកបញ្ច្រាសផ្លូវបុកចំពីមុខពេញទំហឹងនៅចំណុចផ្លូវភ្លោះអូរឬស្សីកែងផ្លូវព្រះមុន្នីវង្ស ស្ថិតក្នុងសង្កាត់បឹងព្រលឹត ខណ្ឌ៧មករា
កាលពីវេលាម៉ោង២៣ និង៤៥នាទីយប់ថ្ងៃទី ៩ ខែកក្កដា ឆ្នាំ២០១៤។
យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេសង្គេតឃើញយុវជនខាងលើ ជិះម៉ូតូមួយគ្រឿងម៉ាកគុបជ្រុង ពណ៌ខៀវលាយស ពាក់ស្លាកលេខកណ្តាល 1C-4203 ជិះធ្វើដំណើរតាមបណ្តោយផ្លូវ ព្រះមុន្នីវង្ស ទិសដៅពីជើងទៅត្បូង ក្នុងល្បឿនយ៉ាងលឿន លុះមកដល់ចំណុចកើតហេតុស្រាប់តែមានរថយន្តតាក់ស៊ី របស់ក្រុមហ៊ុនឆយ មួយគ្រឿង ពណ៌លឿន ពាក់ស្លាកលេខភ្នំពេញ 2M-5206 បើកបរបញ្ច្រាសផ្លូវ ទិសដៅពីត្បូងទៅ ជើង ក្នុងល្បឿន បានបុកជាមួយម៉ូតូគុបពេញទំហឹងបណ្តាលឲ្យបុរសជាម្ចាស់ម៉ូតូត្រូវដួលបោកផ្ទប់ទៅនឹងថ្នល់រងរបួស ធ្ងន់ធ្ងរបានរថយន្តសាមុយរបស់មន្ទីរពេទ្យឃឹម រ៉ានី បញ្ចូនទៅសង្គ្រោះនៅមន្ទីរពេទ្យភ្លាមៗ ចំណែកឯរថយន្តនិង ម៉ូតូត្រូវរងការខូចខាត។
ក្រោយកើតហេតុសមត្ថកិច្ចមូលដ្ឋានបានចុះអន្តរាគមន៍វាស់វែង និងលើកយកទាំងម៉ូតូជនរងគ្រោះនិង រថយន្តទៅ រក្សាទុកនៅអធិការដ្ឋាននគរបាលខណ្ឌ៧មករា រងចាំដោះស្រាយនាពេលក្រោយ ចំណែកចំពោះអត្តសញ្ញាណជនរងគ្រោះ សមត្ថកិច្ចនៅមិនទាន់អាចបញ្ជាក់បាននៅឡើយទេ ព្រោះក្រោយកើតហេតុភ្លាមៗជនរងគ្រោះត្រូវបញ្ចូនទៅសង្គ្រោះ។
សូមបញ្ជាក់ថា ករណីគ្រោះថ្នាក់ខាងលើនេះគឺបង្កឡើងដោយសារភាគីខាងរថយន្តតាក់ស៊ីឆយ បើកបរក្នុង ទិសដៅបញ្ច្រាស ហើយភាគីខាងម៉ូតូវិញហាងតែខ្លួនបើកត្រូវផ្លូវ បើកបរក្នុងល្បឿនលឿនហួសល្បឿនកំណត់ ទើបណ្តាលឲ្យមានរឿងហេតុដូចនេះកើតឡើងតែម្តងទៅ៕