ភ្នំពេញ៖ ករណីគ្រោះថ្នាក់ចរាចរណ៏រវាងអ្នកជិះម៉ូតូនិងម៉ូតូបុកគ្នាពេញទំហឹងបណ្តាលឲ្យរបួស ធ្ងន់ធ្ងរទាំងសងខាងដោយមូលហេតុជិះវ៉ារថយន្តមិនប្រយ័ត្ន។ ហេតុការណ៏គ្រោះថ្នាក់ចរាចរ នេះបានកើតឡើងនៅវេលាម៉ោង១៦និង៣០នាទី ល្ងាចថ្ងៃទី១៧ ខែកុម្ភៈ ឆ្នាំ២០១៤ នៅភូមិ ទួលសំបូរ សង្កាត់ព្រៃវែង ខណ្ឌដង្កោ រាជធានីភ្នំពេញ។ សមត្ថកិច្ចនគរបាលប៉ុសិ្តរដ្ឋបាលព្រៃវែងម្នាក់ដែលបានចុះដល់កន្លែងកើតហេតុបានប្រាប់ឲ្យដឹងថា ជនរងគ្រោះម្នាក់មានឈ្មោះ សឿន ម៉ៅ ភេទប្រុស អាយុ៣៦ឆ្នាំ មានទីលំនៅភូមិទួលសំបូរ សង្កាត់ព្រៃវែង ខណ្ឌដង្កោជិះម៉ូតូម៉ាក ហុងដាឌ្រីម សេ១២៥ ពណ៌ខ្មៅ ពាក់ស្លាកលេខ តាកែវ1B-5714 ធ្វើដំណើរពីជើងទៅត្បូង។ ចំណែកជនរងគ្រោះម្នាក់ទៀត មានឈ្មោះ ផា ណាឃីម ភេទប្រុស អាយុ១៨ឆ្នាំ រស់នៅភូមិគោកឪឡឹក សង្កាត់ស្ពានថ្ម ខណ្ឌ ដង្កោ ជិះម៉ូតូម៉ាកScoopy ពណ៌ស ពាក់ស្លាកលេខ ភ្នំពេញ1BP-0845 ធ្វើដំណើរពីត្បូងទៅជើង។
ប្រភពដដែលបន្តថា មុនពេលកើតហេតុ ជនបង្កហេតុដែលជិះម៉ូតូScoopyនោះជិះឌុបគ្នាស្រីម្នាក់ពីត្បូងទៅជើង លុះជិះមកដល់ចំណុចកើតហេតុត្រង់ផ្លូវបត់ ក៏ជិះវ៉ារថយន្តមួយ គ្រឿងទិសដៅស្របគ្នា ហើយដោយការជិះវ៉ាមិនប្រយ័ត្នបែបនេះមិនបានមើលភាគីរងគ្រោះ ម្ខាងទៀត ក៏បុកពេញគ្នាពេញទំហឹងតែម្តង បណ្តាលឲ្យរងរបួសធ្ងន់ធ្ងរទាំងសងខាង និងខូចម៉ូតូយ៉ាងធ្ងន់ធ្ងរផងដែរ។
ប្រភពពីសមត្ថកិច្ចដដែលបានបន្តទៀតថា ក្រោយមកកម្លាំងសមត្ថកិច្ចនគរបាលចរាចរ ណ៏ខណ្ឌដង្កោក៏បានចុះដល់កន្លែងកើតហេតុធ្វើការវាស់វែង រួចយកម៉ូតូទាំង២គ្រឿងមករក្សាទុកនៅអធិការដ្ឋាននគរបាលខណ្ឌដង្កោ រង់ចាំការដោះស្រាយគ្នាតាមច្បាប់ ចំណែកជនរងគ្រោះក៏ត្រូវបានរថយន្តសង្គ្រោះបន្ទាន់ដឹកយកទៅមន្ទីរពេទ្យព្រះកុសមៈ។
គួរបញ្ជាក់ឲ្យដឹងផងដែរថា ករណីគ្រោះថ្នាក់ចរាចរណ៏រវាងម៉ូតូនិងម៉ូតូក៏បានកើតឡើង ផងដែរកាលពីវេលាម៉ោង៧ព្រឹក ថ្ងៃទី១៧កុម្ភៈនៅផ្លូវជាតិលេខ២ មុខបុរីកាំងម៉េង ត្រង់ចំណុច ស្ពានបាក់ ភូមិក្រាំងស្វាយ សង្កាត់ព្រែកកំពឹស ខណ្ឌដង្កោ។
ប្រភពពីសមត្ថកិច្ចប៉ុសិ្តរដ្ឋបាលព្រែកកំពឹសបានឲ្យដឹងថា ជនរងគ្រោះជាអតីតមន្ត្រីក្រសួងសេដ្ឋកិច្ចពេលនេះគាត់ចូលនិវត្តន៏ហើយ។ បច្ចុប្បន្នកំពុងព្យាបាលនៅមន្ទីរពេទ្យឯកជនក្រុងតាខ្មៅ។ ចំណែកម៉ូតូក៏ត្រូវបានយក មករក្សាទុកនៅអធិការដ្ឋាននគរបាលខណ្ឌដង្កោដែរ៕ 
