កំពង់ឆ្នាំង៖ ជនឆបោកឈ្មោះ នៅ សារី ត្រូវបានសមត្ថកិច្ចអាវុធហត្ថខេត្តព្រះសហីនុ ប្រគល់មកអោយសមត្ថកិច្ចខេត្តកំពង់ឆ្នាំង និង បាននាំខ្លួនមកដល់សាលាដំបូងខេត្ត នៅវេលាម៉ោងជាង១៥រសៀល ថ្ងៃទី១០ ខែកក្កដា ឆ្នាំ២០១៤ ដើម្បីចាត់ការបន្តទៅតាមនីតិវិធី ។
មេឈ្មួញបោកប្រាស់ម្នាក់ ដែលចុះប្រមូលទិញមើមដំឡូងមីស្រស់ ពីប្រជាកសិករ នៅតាមបណ្តាខេត្តនានា មិនអោយលុយនោះ ត្រូវបានកម្លាំងសម្ថកិច្ចកងរាជអាវុធហត្ថខេត្តព្រះសីហនុ ធ្វើការរុករកឃើញហើយឃាត់ខ្លួន បន្ទាប់ពីដឹងថាជនឆបោកខាងលើនេះ បានគេចខ្លួនពីការតាមចាប់របស់សមត្ថកិច្ចខេត្តកំពង់ឆ្នាំង ហើយមកលាក់ខ្លួន នៅខេត្តព្រះសីហនុ ។
មេឈ្មូញបោកប្រាស់ដែលត្រូវចាប់ខ្លួននេះឈ្មោះនៅ សារី ភេទប្រុស អាយុ៤៣ឆ្នាំ មានទីលំនៅក្នុងឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។ ត្រូវកម្លាំងអាវុធហត្ថឃាត់ខ្លួនបានកាលពីវេលាម៉ោងជាង១៥រសៀល ថ្ងៃទី៩ ខែកក្កដា ឆ្នាំ២០១៤ នៅក្នុងភោជនីយ៌ដ្ឋាន ឆ្នេរថ្មី ភូមិបី សង្កាត់លេខ៣ ក្រុង ខេត្តព្រះសីហនុ ។
ការចាប់ខ្លួនជនឆបោកម្នាក់នេះធ្វើឡើង ដោយអនុវត្តតាមដីកា អោយនាំខ្លួនរបស់ សាលាដំបូងខេត្តកំពង់ឆ្នាំង ពីបទព្រហ្មទណ្ឌ ពាក់ព័ន្ធនិងករណីឆបោក រឿងប្រមូលទិញមើមដំឡូងមីស្រស់និងស្ងួត ពីប្រជាកសិករ នៅតាមបណ្តាខេត្តនានា មិនអោយលុយ នាពេលកន្លងមក ។ ហើយនៅល្ងាចថ្ងៃទី១០ ខែកក្កដា ឆ្នាំ២០១៤ តុលាការខេត្តកំពង់ឆ្នាំង បានសម្រេចបញ្ជូន មេឈ្មួញឆបោកនៅ សារី ទៅឃុំខ្លួននៅព័ន្ធនាគារខេត្តកំពង់ឆ្នាំង នៅវេលាម៉ោង៤ និង ១៥នាទី ។
គួរំឮកថា មានប្រជាពលរដ្ឋជាច្រើននាក់នៅតាមបណ្តាខេត្តនានា បានចាញ់បោកឈ្មួញឈ្មោះ នៅ សារី ដែលចុះទៅប្រមូលទិញមើមដំឡូងមី ពីពួកគាត់ហើយមិនអោយលុយ ដោយមេឈ្មួញម្នាក់នោះ ជួលទីតាំងព្រលានយន្តហោះនៅក្នុងខេត្តកំពង់ឆ្នាំង ដែលជាមូលដ្ឋានទ័ពអាកាស សម្រាប់ហាលនិងស្តុកមើមដំឡូងសម្រាប់លក់បន្ត និង បានយកឈ្មោះលោកកែវ វណ្ណដេត ដែលជាមេពញ្ជាការទ័ពអាកាស មកកាងមុបខរបរនេះផងដែរ ។
កាលពីរសៀលថ្ងៃទី៣០ ខែមិថុនា ឆ្នាំ២០១៤ មានប្រជាពលរដ្ឋជិត២០នាក់ មកពីខេត្តពោធិសាត់ ខេត្តព្រៃវែង និង ខេត្តកំពង់ចាម បានលើកគ្នាមកទាលុយពីមេឈ្មួញម្នាក់នោះនៅទីតាំងព្រលានយន្តហោះ ខេត្តកំពង់ឆ្នាំង ដោយបាននាំគ្នាឈរកាន់បដារស្រែកទាមទារអោយបន្រ្តីពាក់ព័ន្ធជួយអន្តរាគមន៍ផងដែរ ។
ប្រជាពលរដ្ឋបានអោយដឹងថា លុយដែលឈ្មោះនៅសារីជំពាក់ពួកគាត់ក្នុងម្នាក់ៗមានចំនួនរាប់ពាន់ដូល្លា ហើយមានរយះពេលរាប់ខែនិងខ្លះទៀតរាប់ឆ្នាំមកហើយ ទោះបីពួកគាត់មកទារជាច្រើនលើកក៏ឈ្មោះនៅ សារី និង ប្រពន្ធមិនដែលសងបានមួយរៀលមួយសេនដែរ ហើយមានប្រជាពលរដ្ឋនៅក្នុងភូមិ ស្រុករបស់គាត់ ជាច្រើននាក់ទៀត ក៏ត្រូវឈ្មោះ នៅ សារី បោកប្រាស់ទីញមើមដំឡូងមីមិនអោយលុយដូចពួកគាត់ដែរ ។ ប្រភពដោយឡែកមួយទៀតបានអោយដឹងថា ឈ្មោះនៅ សារី រកស៊ីមុខរបរនេះបានយកឈ្មោះកែវ វណ្ណដេត ជាមេបញ្ជាការទ័ពអាកាស នៅពីក្រោយខ្នង និងបានជួលអគារនិងទីតាំងព្រលានយន្តហោះ នៅក្នុងខេត្តកំពង់ឆ្នាំង សម្រាប់ហាលសម្ងួតមើមដំឡូង និង ស្តុកមើមដំឡូងមី ដែលគេប្រមូលទិញបានពីតាមបណ្តាខេត្តនានាផងដែរ ។ ទីតាំងនេះត្រូវឈ្មោះនៅ សារី ជួលក្នុងតម្លៃ២ម៉ីនដុល្លាក្នុងមួយឆ្នាំ ហើយក្នុងកិច្ចសន្យាមានរយះពេល៣ឆ្នាំ ។