នៅទីបំផុតក្រុមបាល់ទាត់ម្ចាស់ទ្វីបគឺតុងហ្គោអាហ្សង់ទីនបានឡើងទៅកាន់វគ្គផ្តាច់ព្រ័ត្រត្រូវជួបជាមួយក្រុម មកពីតំបន់អឺរ៉ុបគឺឥន្ទ្រីដែកអាល្លឺម៉ង់ បន្ទាប់ពីអាហ្សង់ទីនប្រកួតឈ្នះក្រុមមច្ចុរាជពណ៌ទឹកក្រូចហូឡង់ ដោយបាល់ប៉េណាល់ទីក្នុងលទ្ធផល៤-២ ។ ការប្រកួតរវាងអាហ្សង់ទីននិងហូឡង់កាលពីយប់មិញនេះត្រូវបានធ្វើឡើងនៅកីឡាដ្ឋាន Arena de Sao Paulo ដែលមានទស្សនិកជនចូលរួមទស្សនាផ្ទាល់ប្រមាណ ៦៣២០០ នាក់ដែលមានលោកអាជ្ញាកណ្តាល គូនីត កាគឺ (Cuneyt Cakir) សញ្ជាតិទួរគីជាអ្នកកាត់សេចក្តី ។
ក្នុងការប្រកួតនេះក្រុមអាហ្សង់ទីនជាអ្នកមានឱកាសសម្រុកច្រើនជាងនៅតង់ទី១ប៉ុន្តែពួកគេមិនមានឱកាស ស៊ុតបញ្ចូលទីក្រុមហូឡង់ឡើយ។លុះចូលដល់តង់ទី២ក្រុមហូឡង់បានផ្លាស់ប្តូរទម្រង់លេង ហើយមានឱកាសវាយបក ទៅក្រុមអាហ្សង់ទីនវិញ តែមិនមានគ្រាប់ស៊ុតបញ្ចូលទីដូចគ្នា ។ ចប់ការប្រកួតទាំងពីរតង់ក្រុមទាំងពីរស្មើគ្នា០-០ ។ ការប្រកួតបានឈានដល់ម៉ោងបន្ថែម១៥នាទីពីរដងប៉ុន្តែក្រុមទាំងពីរនៅតែមិនអាចបំបែកពងមាន់បានរហូត ដល់ការប្រកួតឈានដល់ការស៊ុតបាល់ប៉េណាល់ទី ។ សម្រាប់ការស៊ុតប៉េណាល់ទីនេះក្រុមអាហ្សង់ទីនគឺធ្វើបានល្អជាងដោយបានយកឈ្នះហូឡង់ក្នុងលទ្ធផល៤-២ ។
អាហ្សង់ទីនស៊ុតមិនមានភ្លាត់គ្រាប់ណាមួយឡើយប៉ុន្តែហូឡង់ស៊ុតមិនចូលពីរគ្រាប់ដោយកីឡាករ រុន វីឡា (Ron Vlaar) និងកីឡាករ វ៉េស្លី ស្នាយឌ័រ (Wesley Sneijder) ។ គួរបញ្ជាក់ថា ការប្រកួតដណ្តើមលេខ៣រវាងម្ចាស់ផ្ទះប្រេស៊ីលជាមួយហូឡង់នឹងត្រូវធ្វើឡើងនៅថ្ងៃសៅរ៍ ទី១៣ (ម៉ោង៣ទៀបភ្លឺ) ចំណែកការប្រកួតវគ្គផ្តាច់ព្រ័ត្ររវាងអាល្លឺម៉ង់ និងអាហ្សង់ទីន នៅថ្ងៃអាទិត្យទី១៤ (ម៉ោង២យប់) ៕