ក្លិបបាល់ទាត់ Atletico Madrid ត្រូវបានគេរាយការណ៍ថា បានឈានដល់កិច្ចព្រមព្រៀងលើការនាំយក ខ្សែប្រយុទ្ធរបស់ក្លិបយក្ស Bayern Munich គឺកីឡាករ Mario Mandzukic ជាមួយតម្លៃពលកម្មប្រមាណ ១៧.៥លានផោន ។ Mandzukic ត្រូវបានគេដឹងថា មានបំណងចង់ចាកចេញពីក្លិប Bayern Munich ជាយូរណាស់មកហើយ ក្រោយពេលការមកដល់របស់កីឡាករ Robert Lewandowski ពីក្លិប Borussia Dortmund ។ យោងតាមគេហទំព័រ Bild បានផ្សព្វផ្សាយថា ក្លិប Atletico បានឈានដល់កិច្ចព្រមព្រៀងជាមួយខ្សែប្រយុទ្ធ សញ្ជាតិក្រូអាតរូបនេះក្នុងកិច្ចសន្យារយៈពេល៥ឆ្នាំ ។
គួរបញ្ជាក់ថា ក្រុមរបស់លោក Diego Simeone កំពុងតែស្វែងរកខ្សែប្រយុទ្ធបន្ថែមទៀតមកកាន់ទឹកដី Vicente Calderon បន្ទាប់ពីកីឡាករ Diego Costa ត្រូវបានលក់ទៅឲ្យ Chelsea ហើយក្លិបក៏កំពុងធ្វើការទាក់ទងខ្សែប្រយុទ្ធ Alvaro Negredo របស់ក្លិប Manchester City ផងដែរ ៕