ខេត្តព្រះសីហនុ កូនកោងកាងចំនួន១០.០០០ដើម ត្រូវបានខណ្ឌរដ្ឋបាលជលផលកំពង់សោម ធ្វើការដាំដុះនៅលើផ្ទៃដីចំនួន ១៣ហិកតា នៅក្នុងសហគមន៌នេសាទភូមិជំពូខ្មៅ ស្ថិតក្នុងឃុំទួលទទឹង ស្រុកព្រៃនប់ ខេត្តព្រះសីហនុ ។ ពិធីដាំកូនកោងកាងនេះបានធ្វើឡើងកាលពីថ្ងៃទី
០៩ ខែកក្កដា ឆ្នាំ២០១៤ ដោយមានការអញ្ជើញចូលរួមពីឯកឧត្តម ណៅ ធួក ប្រតិភូរាជរដ្ឋាភិបាល ទទួលបន្ទុកប្រធានរដ្ឋបាលជលផល ឯកឧត្តម ឈិត សុខុន អភិបាលនៃគណះអភិបាលខេត្តព្រះសីហនុ និងមន្ត្រីរាជការ លោកគ្រួ អ្នកគ្រូ សិស្សានុសិស្ស និងប្រជាពលរដ្ឋយើងច្រើនកុះករ ។ លោក នេន ចំរើន នាយ នាយខណ្ឌរដ្ឋបាលជលផលកំពង់សោម មានប្រសាសន៌ថា ការដាំដុះកូនកោងកាងនាពេលនេះ ដើម្បីអោយប្រជាពលរដ្ឋនៅក្នុងមូលដ្ឋានចូលរួមថែរក្សា អភិរក្សការពារព្រៃកោងកាងអោយបានវង់វង្ស ជាផលប្រយោជន៌រួមរបស់យើងទាំង អស់គ្នា ។ 
លោកនាយខណ្ឌរដ្ឋបាលជលផលកំពង់សោម មានប្រសាសន៌បន្តទៀតថា ការដាំដុះព្រៃកោងកាងឡើងវិញពិតជាមានសារះសំខាន់ណាស់ ព្រោះព្រៃកោងកាងជាជម្រកមច្ឆាជាតិគ្រប់ប្រភេទបង្កកំណើតពង កូន នៅពេលវាធំធាត់ពួកមច្ឆាជាតិនឹងចេញទៅតាមទីកន្លែងផ្សេងៗក្នុងដែនសមុទ្រ ។ ព្រៃកោងកាងអាចជួយស្រូបយកឧស្មន័ផ្ទះកញ្ចក់បានជាង ៥០% ដោយឡែកព្រៃឈើស្រូបយកឧស្ម័នផ្ទះកញ្ចក់បានតែ៤០%ប៉ុណ្ណោះ ។ ព្រៃកោងកាង ជួយការពាទប់ស្កាត់ខ្សល់ និងជំនន់ទឹកសមុទ្រហូរចូលស្រូវស្រែរបស់ប្រជាកសិករនៅក្នុង ប៊ុលឌាក្នុងស្រុកព្រៃនប់បានយ៉ាងច្រើន ។ 
ហើយម្យ៉ាងទៀតព្រៃកោងកាងមានផលប្រយោជន៌សម្រាប់ប្រជាពលរដ្ឋពួកគាត់មានការចូលរួមគាំទ្រយ៉ាងពេញទំហឹងចំពោះការដាំដុះកូនកោងកាង និងធានាជួយថែរក្សាការពារព្រៃកោងកាង ព្រោះកូនចៅរបស់ពួកគាត់ ក្រៅពីសិក្សា ពួកគេអាចទៅរាវរកចាប់ក្តាម និងងាវជាដើមនៅតាមព្រៃកោងកាង ដើម្បីជួយផ្គត់ផ្គង់ក្នុងជីវភាពគ្រួសារបានថែមទៀតផង ។ លោក នេន ចំរើន បានបញ្ជាក់ថា ខណ្ឌរដ្ឋបាលជលផលកំពង់សោមបាននឹងកំពុងរៀបចំសួនកោងកាងអាពាហ៌ពិពាហ៌មួយកន្លែងទៀតនៅក្នុងសហគមន៌នេសាទព្រៃនប់២ ដើម្បីអោយយុវវ័យដែលត្រូវរៀបអាពាហ៌ពិពាហ៌ ត្រូវចូលរួមដាំកូនកោងកាងមួយដើម ដែលជា និមិត្តរូបក្នុងការចូលរួមថែរក្សាការពា អភិរក្សព្រៃឈើនៅក្នុងខេត្តព្រះសីហនុឲ្យមានពណ៌បៃតង ។ 
លោកនេន ចំរើនបានបញ្ជាក់ទៀតថា ខណ្ឌរដ្ឋបាលជលផលកំពង់សោកនបន្តដាំដុះព្រៃកោងកាងបន្ថែមទៀតលើផ្ទៃដីដែលរងការកាប់បំផ្លាញ ព្រមទាំងបំផុសប្រជាពលរដ្ឋនៅតាមសហគមន៌នេសាទទាំងអស់ ចូលរួមថែរក្សា ការពារ និងដាំកូនកោងកាងឡើងវិញ ព្រោះព្រៃកោងកាងមានសារះសំខាន់សម្រាប់ប្រជានេសាទ ។ ប្រសិនបើយើងនាំគ្នាការពារនិងដាំដុះព្រៃកោងកាងបានច្រើន ធ្វើអោយទិន្នផលមច្ឆាជាតិសម្បូរ ហើយភ្ញៀវទេសចរមកលេងកំសាន្តនៅខេត្តព្រះសីហនុ សំដៅទៅលើឆ្មេរសមុទ្រសរស្អាត និងម្ហូបអាហារសមុទ្រស្រស់មានដូចជា ក្តាម បង្គារ ជាដើម និងជិះទូកទស្សនាកំសាន្តព្រៃកោងកាង ៕
