ឧត្តរមានជ័យ. ក្រុមការងារគណៈបក្សប្រជាជនកម្ពុជា ដឹកនាំដោយឯកឧត្តមអ្នកឧកញ៉ា លឹម ហេង ប្រធានកិត្តិយសគណបក្សប្រជាជនខេត្ត និងជាអគ្គនាយកក្រុមហ៊ុន លឹម ហេង គ្រុប និងឯកឧត្តម វ៉ាត ប៉ារ៉ានីន សមាជិកអចិន្ត្រៃយ៍គណកម្មការបក្សប្រជាជនខេត្ត និងជាសមាជិក
ក្រុមការងារចុះជួយស្រុកអន្លង់វែង ព្រមទាំងក្រុមការងារថ្នាក់មូលដ្ឋាននៃគណបក្សប្រជាជនកម្ពុជាស្រុកអន្លង់វែង បាននាំយកទៀនព្រះវស្សា និងទ័យទានប្រគេនដល់ព្រះសង្ឃ ដែលគង់ចាំព្រះវស្សា ដល់វត្តចំនួន១៥វត្ត ក្នុងស្រុកចំនួន២គឺស្រុកអន្លង់វែង និងស្រុកបន្ទាយអំពិល ក្នុងឱកាសនោះក្រុមការងារ ក៏បានរៀបចំពិធីប្រគល់ជារួម នាព្រឹកថ្ងៃទី១១ ខែកក្កដា ឆ្នាំ២០១៤ នៅវត្តជ័យទឹកជុំ ហៅវត្តអន្លង់វែង ស្ថិតនៅក្នុងឃុំអន្លង់វែង ស្រុកអន្លង់វែង ខេត្តឧត្តរមានជ័យ។ 
បន្ទាប់ពីព្រះសង្ឃនៈមសក្ការៈព្រះរតនត្រ័យ ហើយក្រុមការងារក៏បានប្រគេនទេយ្យទានវត្ថុដល់ព្រះសង្ឃ ទៅតាមទំនៀមទំលាប់ប្រពៃណីព្រះពុទ្ឋសាសនារួចមក ឯកឧត្តម វ៉ាត ប៉ារ៉ានីន បានមានប្រសាសន៍ថា ដើម្បីចូលរួមលើកម្ពស់វិស័យព្រះពុទ្ធសាសនាដែលជាសាសនារបស់រដ្ឋ យើងបានជួបជុំធ្វើបុណ្យដង្ហែរទៀនព្រះវស្សានៅពេលនេះ គឺអាស្រ័យដោយប្រទេសជាតិយើងទទួលបាននូវសុខសន្តិភាព ស្ថេរភាពនយោបាយពេញលេញទូទាំងប្រទេស ព្រមទាំងមានការីកចំរើនលូតលាស់ទាំងផ្នែកពុទ្ឋចក្រ និងផ្នែកអាណាចក្រ ជាក់ស្ដែងនៅបច្ចុប្បន្ននេះ នៅទូទាំងប្រទេសកម្ពុជាយើងមានវត្តជាង ៤ពាន់វត្ត ហើយក្នុងខេត្តឧត្តរមានជ័យ ក៏មានការកើនឡើងទាំងវត្តអារាម និងព្រះសង្ឃគួរអោយកត់សំគាល់ផងដែរ។
ឯកឧត្តមបន្តថា ពិធីបុណ្យចូលព្រះវស្សា គឺជាបុណ្យប្រពៃណីរបស់ ខ្មែរយើង មានតាំងពីយូរយារណាស់មកហើយ ហើយក្នុងថ្ងៃនេះក្រុមការងារគណបក្សប្រជាជនកម្ពុជាខេត្តឧត្តរមានជ័យ ក៏បានកៀងគរជាថវិកា និងសំភារៈ ដូចជាទៀនវស្សា និងទេយ្យវត្ថុមកប្រគនព្រះសង្ឃនៅពេលនេះ ដើម្បីរួមចំណែកផ្គត់ផ្គង់ដល់ព្រះសង្ឃដែលគង់ចាំព្រះវស្សារយៈពេលបីខែ និងសំរាប់ប្រើប្រាស់កសាងទីវត្តអារាមមួយចំនួនដែលកំពុងជួបការការខ្វះខាត ទោះបីជាបច្ច័យ និងទេយ្យវត្ថុ វាតិចតួចក្តីតែវាអាចសម្រួលតម្រូវការរបស់ព្រះសង្ឃ និងកសាងវត្តបានមួយចំណែកផងដែរ។
ក្នុងឱកាសនោះក្រុមការងារគណបក្សប្រជាជនកម្ពុជាខេត្ត ក៏នាំយកអំណោយទៀនវស្សា និងទេយ្យ វត្ថុដល់វត្តទាំង ១៥វត្ត ដោយក្នុង១វត្តទទួលបានថវិកា១លានរៀល ទៀន០១គូរ អង្ករ៥បាវ ត្រីខ២កេះ តែកញ្ចប់ធំ៥កញ្ចប់ ស្ករ១០Kg ប្រេងមាស៊ូត៣០លីត មី៥កេះ ទឹកត្រី១០យួរ ទឹកស៊ីអ៊ីវ១០យួរ ទឹកសុទ្ធ១០យួរ ប៊ីចេង៥Kg ទឹកដោះគោ១កេះ ទឹកក្រូច-ទឹកផ្លែឈ១កេះ ព្រះសង្ឃចំនួន៣០អង្គ ក្នុងមួយអង្គថវិកា ៥ម៉ឺនរៀល យាយជីតាជី ប្រជាពលរដ្ឋ និង សិស្ស ក្នុងម្នាក់ៗថវិកា ២ម៉ឺនរៀល។
បន្ទាប់មកឯកឧត្តមអ្នកឧកញ៉ា លឹម ហេង ប្រធានកិត្តិយសគណបក្សប្រជាជនកម្ពុជាខេត្ត និងឯកឧត្តម វ៉ាតប៉ារ៉ានីន សមាជិកក្រុមការងារចុះជួយស្រុកអន្លង់វែង បានអញ្ជើញទៅពិនិត្យមើលការដ្ឋានសាងសងព្រះវិហារជ័យទឹកជុំហៅវត្តអន្លង់វែង ដែលបច្ចុប្បន្នពុំទាន់សាងសងរួចរាល់នៅឡើយទេ ហើយឯកឧត្តមអ្នកឧកញ៉ា លឹម ហេង ក៏បានឧបត្ថម្ភថវិកាចំនួន ១ម៉ឺនដុល្លា ដល់ព្រះគ្រូចៅអធិការ សោម សារ៉ន ដើម្បីចាត់ចែងប្រើប្រាស់ក្នុងការសាងសង់ព្រះវហារវត្តជ័យទឹកជុំ ហៅវត្តអន្លង់វែង នេះឱ្យរួចរាល់ជាស្ថាពរ។
