ភ្នំពេញ៖ ក្រោយពីបណ្ដាញសារពត៌មានមួយចំនួន ចេញផ្សាយជាបន្តបន្ទាប់ពាក់ព័ន្ធទៅនឹងស្ត្រីទុរគតម្នាក់ បានសម្រាល កូននៅនឹងផ្ទះ ដោយសារតែគ្រួសារ មានជីវភាពខ្វះខាតយ៉ាងខ្លាំងនោះ នារសៀលថ្ងៃទី១១ ខែកក្កដា ឆ្នាំ២០១៤ លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួង
ទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានចាត់តាំង លោក ណុប ចាន់ណារិន ធ្វើជាតំណាងតំណាង ដើម្បីនាំយកអំណោយសប្បុរសធម៌ របស់លោកជំទាវផ្ទាល់ ទៅផ្ដល់ជូនដល់ក្រុមគ្រួសារ ដែលមានជីវភាពខ្វះខាតមួយនេះ ដែលកំពុងស្នាក់នៅសំរាកព្យាបាល ក្នុងមណ្ឌលសុខភាពស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
អំណោយសប្បុរសធម៌ ប្រកបដោយក្តី អាណិតស្រឡាញ់របស់លោកជំទាវ ម៉ែន សំអន ឧបនាយករដ្ឋមន្ត្រី នាពេលនេះមាន អង្ករ ៥០Kg សាច់ក្រក់ ២Kg ត្រីងៀត ២Kg មីយើង ២កេស ទឹកដោះគោ ១០កំប៉ុង ស្ករស ៥Kg និងថវិកា ៨១ម៉ឺនរៀល ។ គួរំលឹកផងដែរថា ស្ដ្រីដែលសម្រាលកូនខាងលើនេះមានឈ្មោះហៀក សុខេង អាយុ៣២ឆ្នាំ មានស្រុកកំណើតនៅភូមិបង្គង ឃុំកោះជុំ ស្រុកក្រគរ ខេត្តពោធិ៍សាត់មានប្ដីឈ្មោះ គឹម លី អាយុ៤៣ឆ្នាំ មានមុខរបរជាអ្នករើសអេតចាយ មានស្រុកំណើតនៅភូមិឈើទាល ឃុំឈើទាល ស្រុកស្វាយជ្រុំ ខេត្តស្វាយរៀង ទាំង២នាក់ប្ដីប្រពន្ធ ស្នាក់នៅផ្ទះជួល ក្នុងភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
កាលពីព្រឹកថ្ងៃទី១០ ខែកក្កដា ឆ្នាំ២០១៤ ស្ដ្រីរងគ្រោះឈឺបត់ជើង រួចក៏ចូលទៅក្នុងបន្ទប់ទឹក ស្រាប់តែឈឺពោះ ក៏សម្រេចចិត្តសម្រាលកូនតែម្នាក់ឯង បង្កឱ្យមានការភ្ញាក់ផ្អើលដល់ប្រជាពលរដ្ឋនៅក្បែរខាង រួចក៏រាយការណ៍ទៅអាជ្ញាធរមូលដ្ឋានឱ្យចុះមកជួយ និងដឹកស្ដ្រីរងគ្រោះទៅព្យាបាលបន្ដនៅមណ្ឌលសុខភាពស្ទឹងមានជ័យ ដោយមើលឃើញពីស្ថានភាពលំបាកដំបូង លោកសេង សាញ់ ចៅសង្កាត់ស្ទឹងមានជ័យ បានឧបត្ថម្ភថវិកាដល់ស្ដ្រីរងគ្រោះនិងប្ដីចំនួន ១០ម៉ឺនរៀលព្រមទាំងជួយចេញថ្លៃព្យាបាល និងការស្នាក់នៅក្នុងមណ្ឌលសុខភាព ដោយមានការពិនិត្យ និងជួយសង្គ្រោះពីសំណាក់ក្រុមគ្រូពេទ្យនៅទីនោះផងដែរ ។
បន្ទាប់ពីបានជូនអំណោយរួចមក លោក ណុប ចាន់ណារិន ក្នុងនាមលោកជំទាវ ម៉ែន សំអន បានមានប្រសាសន៍ ផ្តាំផ្ញើ ពីការសាកសួរសុខទុក្ខ និងការយកចិត្តទុកដាក់ ប្រកបដោយក្ដីអាណិត អាសូរ ដែលជានិច្ចកាល លោកជំទាវ ម៉ែន សំអន តែងតែបានរួមចំណែក ចែករំលែករាល់ទុក្ខលំបាក របស់ប្រជាជននៅទូទាំងប្រទេស ពិសេសលើស្ត្រី ដែលជួបប្រទះការខ្វះខាត និងទុរគតភាព បើទោះបីជាបង្កឡើងដោយមនុស្សក្តី ឬធម្មជាតិក្តី លោកជំទាវ ឧបនាយករដ្ឋមន្ត្រី ម៉ែន សំអន បានចែករំលែកតាមលទ្ធភាព និងស្ថានភាពជាក់ស្តែង ដោយមិនគិតពីជាតិសាសន៍ ឬព៌ណសម្បុរនោះឡើយ ។ អ្នកស្រី ហៀក សុខេង បានថ្លែងអំណគុណចំពោះសន្តានចិត្តសប្បុរសធម៌ របស់លោកជំទាវ ម៉ែន សំអន និងក្រួសារ ហើយអំណោយដែលអ្នកស្រីទទួលបាននាពេលនេះ នឹងផ្តល់ប្រយោជន៍យ៉ាងធំធេង មិនអាចកាត់ថ្លៃបានឡើយ ៕
