កោះកុង ៖ កូនទាហានដែលមិនសូវជាមានទ្រព្យសម្បត្តិចំនួន៣គូរ ត្រូវបានលោកឧត្តមសេនីយ៍ត្រី យន្ត មីន មេបញ្ជាការតំបន់ប្រតិបត្តិការសឹករងខេត្តកោះកុង រៀបចំអាពាហ៏ពិពាហ៏រួមគ្នាឲ្យ កាលពីថ្ងៃទី១០ កក្កដា ឆ្នាំ២០១៤ កន្លងទៅ។ នៅក្នុងពិធីដ៏កម្រនោះ លោកឧត្តមសេនីយ៏ត្រី យន្ត
មីន បានថ្លែងថា ដោយសារពួកគេបានស្រឡាញ់គ្នាអស់មួយរយៈពេលមកហើយ តែគ្រួសារមានជីវភាពក្រីក្រពុំអាចរកថវិកាមករៀបការឲ្យសមរម្យបាន លោកក៏បានលើកសំណើរទៅកាន់លោកមេបញ្ជាការយោធភូមិភាគបីហើយលោកមេបញ្ជាការក៏បានឯកភាព និងមានការគាំទ្រពីសំណាក់លោកប៊ុន លើតអភិបាលខេត្តព្រមទាំងថ្នាក់ដឹកនាំខេត្តឯទៀតៗជាពិសេសមានការយល់ព្រមពីសំណាក់មាតា បីតាខាងកូនកម្លោះនិងកូនក្រមុំទាំងសងខាន ក្នុងនាមរូបលោកជាមេបញ្ជាការក៏ដូចជាឪពុកទីពីរក៏បានរៀបចំពីធីនេះឡើង ដើម្បីឲ្យ ពួកគេបានរស់នៅនិងសាងអនាគតជាមួយគ្នាក្នុងនាមជាអជីពយោធា។ 
លោកមេបញ្ជាការបានឲ្យដឹងទៀតថា ពលទាហានទាំងបីគូរដែលបានស័គ្រចិត្តចូលរោងការនៅថ្ងៃតែមួយដូចគ្នា គឺគូរទីមួយមានឈ្មោះ ពលបាលត្រី សូត្រ សោភ័ណ្ឌ ជាគូរនិងកញ្ញាពលបាលឯក ពិន សុធិតា។គូរទីពីរគឺពលបាលទោ ស៊ុម សំណាង ជាគូរ និងកញ្ញាពលបាលទោ ហាន់ នយនិងគូរទីបីគឺពលបាលទោគង់ គាតជាគូរនិងកញ្ញាទូច វិចិត្រយ៉ាដា។
លោកឧត្តមសេនីយ៏ត្រី យន្ត មីន បានថ្លែងទៀតថា ដោយមានការអាណិតស្រឡាញ់លោក ហ៊ុន ម៉ាណែត មេបញ្ជាការរងកងទ័ពជើងគោក ក៏បានផ្ញើចំណងដៃចំនួនបីលានរៀលផងដែរតាមតំណាងរបស់លោកគឺលោក ហាក់ ឡេង ដោយចងដៃគូរស្រករថី្មក្នុងមួយគូរៗចំនួនមួយលានរៀលហើយចំពោះចំណងដៃដែលទទួលបានពីភ្ញៀវចូលរួមលោកមិនយកមកទូទាត់ទេ លោកនឹងចងដៃជូនពួកគេទាំងបីគូរនូវចំណែកសើ្មៗគ្នាដើម្បីឲ្យពួកគេទុកធើ្វដើមទុនរកស៊ីទៅថ្ងៃមុខ៕
