ស្ទឹងត្រែង៖ស្ត្រីវ័យចំណាស់ម្នាក់ត្រូវបានកម្លាំងនគរបាលការិយាល័យនៃស្នងការដ្ឋាននគរបាលខេត្តស្ទឹងត្រែងធ្វើការឃាត់ខ្លួនតាដីការ៤៩២ចុះថ្ងៃទី២១ឧសភាឆ្នាំ២០១៤ពាក់ព័ន្ធពីបទជួញដូរសារធាតុញៀនដោយខុសច្បាប់ ដែលបានប្រព្រឹត្តកាលពីថ្ងៃទី៥ខែកុម្ភៈឆ្នាំ២០១៤កន្លងមករួច
រត់គេចខ្លួន។ ស្ត្រីពាក់ព័ន្ធក្នុងករណីខាងលើត្រូវបានសមត្ថកិច្ច ធ្វើការឃាត់ខ្លួនកាលពីវេលារ១៥និង៣០នាទីរសៀលថ្ងៃទី៩ខែកក្កដាឆ្នាំ២០១៤នៅផ្ទះស្ត្រីសង្ស័យស្ថិតក្នុងភូមិអន្លុងស្វាយ ឃុំព្រះរំកិល ស្រុកថាឡាបរិវ៉ាត់ខេត្តស្ទឹងត្រែង។ លោក នូ ហ៊ួរ នាយការិយាល័យប្រឆាំងគ្រឿងញៀនខេត្តបានឲ្យដឹងថាស្ត្រីសង្ស័យខាងលើនេះមានឈ្មោះ ខ្លូត សំប៊ុន ភេទស្រី អាយុ៥៤ឆ្នាំ រស់នៅភូមិ អន្លង់ស្វាយ ឃុំព្រះរំកិល ស្រុកថាលាបរិវ៉ាត់ ខេត្តស្ទឹងត្រែង។
លោកនាយការិយាល័យបានបន្តថាការឃាត់ខ្លួនស្ត្រីសង្ស័យខាងលើគឺ ចាប់តាមដីការ៤៩២ ចុះថ្ងៃទី២១ ខែឧសភាឆ្នាំ២០១៤ ដោយលោក សាយ សារ៉ុន ចៅក្រមស៊ើបសួរនៃសាលាដំបូងខេត្តស្ទឹងត្រែង។ ចោទពីបទជួញដូរសារធាតុញៀនដោយខុសច្បាប់ ដែលបានប្រព្រឹតកាលពីថ្ងៃទី៥ ខែគុម្ភៈ ឆ្នាំ២០១៤ នៅភូមិអន្លង់ស្វាយ ឃុំព្រះរំកិល ស្រុកថាឡាបរិវ៉ាត់ រួចគេចខ្លួន ពេលត្រឡប់មកផ្ទះវិញ ក៏ត្រូវបានសមត្ថកិច្ចឃាត់ខ្លួនតែម្តង។ នៅព្រឹកថ្ងៃទី១០កក្កដានេះ ស្ត្រីសង្ស័យពាក់ព័ន្ធការជួញដូរសារធាតុញៀនខុសច្បាប់ ត្រូវបានសមត្ថកិច្ចចំនាញ បានរៀបចំសំណុំរឿង បញ្ជូនខ្លួនទៅកាន់តុលាការ ដើម្បីចាត់ការតាមនីតិវិធី។