ខេត្តកែបៈគណៈប្រតិភូខេត្តគៀងយ៉ាងនៃសាធារណរដ្ឋសង្គមនិយមវៀតណាមដឹកនាំដោយលោកស្រីដាំងទ្វៀតឯមអនុប្រធានគណៈកម្មាធិការប្រជាជននិងជាប្រធានគណៈកម្មការជំនាញខេត្តគៀងយ៉ាងបើកប្រជុំកិច្ចសហប្រត្តិបត្តិការនិងគណៈប្រតិភូខេត្តកែបនៃព្រះរាជាណាចក្រកម្ពុជា
ដឹកនាំដោយ លោក អ៊ឹង ឆាយ អភិបាលរង និង ជាប្រធានគណៈកម្មការជំនាញខេត្តកែប ។
ព្រឹកថ្ងៃទី១០ ខែកក្កដា ឆ្នាំ២០១៤ នៅសាលប្រជុំសាលាខេត្តកែប បើកកិច្ច ប្រជុំ វាយតម្លៃលទ្ធផលកិច្ចសហប្រតិបត្តិការរុករកការគាស់និងធ្វើមាតុភូមិនិវត្តន៍នៃអដ្ឋិធាតុកងទ័ពស្ម័គ្រចិត្តនិងជំនាញការវៀតណាមដែលបានពលីជីវិតក្នុងសម័យសង្គ្រាមនៅលើភូមិសាស្ត្រទឹកដីខេត្ត កែបក្នុងរដូវប្រាំងឆ្នាំ២០១៤និងលើកទិសដៅសម្រាប់អនុវត្តន៍បន្តនៅរដូវប្រាំងឆ្នាំ.២០១៥ រវាង ភាគីទាំងពីរ បានពិភាក្សាផ្លាស់ប្តូរយោបល់គ្នា និង វាយតម្លៃខ្ពស់ចំពោះលទ្ធផល នៃការអនុវត្តន៍សន្ធិសញ្ញារវាងរដ្ឋាភិបាលប្រទេសទាំងពីរ កម្ពុជា.វៀតណាម និង កិច្ច ព្រម ព្រៀង
សហប្រតិបត្តិការរវាងគណៈកម្មការជំនាញខេត្តទាំងពីរ កែប.គៀងយ៉ាង កន្លងមក ដោយបានបង្កលក្ខណៈដល់ក្រុម K92 ខេត្តគៀងយ៉ាង បានរុករក គាស់ និង ធ្វើមាតុភូមិនិវត្តន៍នូវអដ្ឋិធាតុកងទ័ពស្ម័គ្រចិត្ត និង ជំនាញការវៀតណាម ដែលពលីជីវិត កាលពីសម័យសង្គ្រាមនៅកម្ពុជា លើសមរភូមិក្នុងភូមិសាស្ត្រទឹកដីខេត្តកែប បានចំនួន ១០៨ អដ្ឋិធាតុ ដោយឡែកក្នុងរដូវប្រាំងឆ្នាំ២០១៣.២០១៤បានចំនួន ១៤ អដ្ឋិធាតុ ។ ព្រមជាមួយនេះ ភាគីទាំងពីរ ក៏បានឯកភាព និង ចុះហត្ថលេខាលើកិច្ចព្រមព្រៀងបន្តសហប្រតិបត្តិការ រុករក គាស់ និងធ្វើមាតុភូមិនិវត្តន៍នូវអដ្ឋិធាតុកងទ័ពស្ម័គ្រចិត្តនិងជំនាញការវៀតណាមដែលពលីក្នុងទឹកដីខេត្តកែប សម្រាប់ រដូវប្រាំងឆ្នាំ២០១៤.២០១៥ ។
ក្នុងនោះគណៈកម្មការជំនាញរបស់ខេត្តកែប នឹងបន្តបង្កើន ការអប់រំ មន្ត្រី រាជការស៊ីវិល កងកម្លាំងប្រដាប់អាវុធ ប្រជាពលរដ្ឋ និង អាជ្ញាធរគ្រប់ថ្នាក់ឲ្យបានយល់ច្បាស់ថែមទៀតពីសន្ធិសញ្ញានៃប្រទេសទាំងពីរហើយបង្កលក្ខណៈងាយស្រួលគ្រប់បែបយ៉ាងដល់ក្រុមK92របស់ខេត្តគៀងយ៉ាងឲ្យអនុវត្តភារកិច្ចទទួលបានលទ្ធផលល្អតាមផែនការ ។ ភាគីទាំងពីរក៏បានលើកឡើងពីការលំបាកក្នុងបេសកកម្មរុករកនេះដែលពីមួយឆ្នាំទៅមួយឆ្នាំកាន់តែស្មុគ្រស្មាញទៅៗដោយសារតែមូលហេតុទីតាំងភូមិសាស្ត្រមានការផ្លាស់ប្តូរប្រែប្រួលខ្លាំងអ្នកស្គាល់ទីតាំងចាស់ជរា ស្លាប់ ឬ ផ្លាស់ប្តូរទីលំនៅទៅទីឆ្ងាយ ជាដើម ។
ប៉ុន្តែទោះជាយ៉ាងណាក៏ក្រុមK92របស់ខេត្តគៀងយ៉ាងនឹងនៅតែបង្កើនកិច្ចសហការជិតស្និទ្ធ ជាមួយអង្គភាព ពាក់ព័ន្ធ អាជ្ញាធរដែនដីគ្រប់ថ្នាក់ ដើម្បីធ្វើផែនការ កម្មវិធីសកម្មភាព និង ចលនាប្រជាពលរដ្ឋចូលរួមផ្តល់ព័ត៌មានឲ្យបានច្បាស់លាស់ពីទីកន្លែងដែលបញ្ចុះសពដើម្បីធានា អនុវត្ថ ភារកិច្ច រុករក គាស់ និង ធ្វើមាតុភូមិនិវត្តន៍នៃអដ្ឋិធាតុ កងទ័ពស្ម័គ្រចិត្ត និង ជំនាញការ វៀតណាមដែលបានពលីជីវិតក្នុងសម័យសង្គ្រាមលើទឹកដីខេត្តកែបសម្រាប់រដូវប្រាំងឆ្នាំ២០១៤.២០១៥ឲ្យទទួលបានលទ្ធផល ប្រសិទ្ធខ្ពស់ ។