កំពង់ឆ្នាំង៖ ដើមព្រីងមួយដើមនៅក្នុងដីភូមិប្រជាពលរដ្ឋម្នាក់ ត្រូវបានអ្នកផ្សេងមកលួចកាប់បំពានយកទៅប្រើប្រាស់ ដោយអះអាងថាជាដើមឈើសាធារណៈរបស់រដ្ឋ ហើយនៅក្នុងរឿងនេះអាជ្ញាធរមូលដ្ឋានមិនបានសំរបសំរួលបញ្ចប់នោះទេ ធ្វើអោយរឿងតូចតាចសោះក្លាយទៅជា
រឿងធំ និងបានឡើងដល់តុលាការ ដែលរឿងនេះបានកើតឡើងនៅក្នុងអំឡុងខែមករា ឆ្នាំ២០១៤ ក្នុងភូមិទឹកល្អក់ ឃុំក្រាំងលាវ ស្រុករលាប្អៀរ ខេត្តកំពង់ឆ្នាំង។
យោងតាមពាក្យបណ្តឹងរបស់លោក សុខ ហឿន អាយុ៤០ឆ្នាំ មានទីលំនៅភូមិទឹកល្អក់ ឃុំក្រាំងលាវ ស្រុករលាប្អៀរ បានរៀបរាប់អោយដឹងថា៖កាលពីថ្ងៃទី១ ខែមករា ឆ្នាំ២០១៤ ឈ្មោះ ប៉ុល ង៉ែត បានឃុបឃិតជាមួយឈ្មោះ យ៉ាន់ សារិទ្ធ ជាអនុប្រធានភូមិទឹកល្អក់ រស់នៅក្នុងភូមិឃុំជាមួយគ្នា បានលួចកាប់យកដើមព្រីង១ដើមនៅក្នុងដីភូមិរបស់ខ្លួន។ក្នុងរឿងនេះលោកមេភូមិ មេឃុំមិនបានដោះស្រាយបញ្ចប់រឿងដ៍តូចតាចនេះទេ ដែលដើមព្រីងនេះមានតំលៃត្រឹមតែ៥០ម៉ឺនរៀលតែប៉ុណ្ណោះ ទើបឈ្មោះ សុខ ហឿន ជាម្ចាស់ដីភូមិនិងដើមព្រីងបានដាក់ពាក្យបណ្តឹងមកសាលាដំបូងខេត្តកំពង់ឆ្នាំងដោយប្តឹងទាមទារជំងឺចិត្ត១៥០០ដុល្លា និងសុំអោយផ្តន្ទាទោសជនល្មើសនិងបក្ខពួកទៅតាមផ្លូវច្បាប់។ 
ប្រភពព័ត៌មានពីសមត្ថកិច្ចប៉ុស្តិមូលដ្ឋានបានអោយដឹងថា៖រឿងខាងលើនេះសមត្ថកិច្ចបានសំរបសំរួលរួចម្តងមកហើយដែរជាមួយភាគីទាំង២ ដោយឈ្មោះ សុខ ហឿន បានសុំយកតែដើមព្រីងមកវិញទេ តែភាគីដែលលួចកាប់ដើមឈើគេនោះបែរជាមិនព្រម ហើយបានបោះសំដីថា«ប្តឹងចាំយកផេះទៅ»។ករណីនេះត្រូវបានគេបង្ហើបអោយដឹងថា ឈ្មោះ យ៉ាន់ សារិទ្ធ មានមេភូមិ មេឃុំ នៅពីក្រោយខ្នងទើបឈ្មោះនេះមិនព្រមទទួលកំហុសរបស់ខ្លួន ដោយសំអាងថា ដើមព្រីងនេះជាដើមព្រីងសាធារណៈរបស់រដ្ឋ។ 
នៅព្រឹកថ្ងៃទី១១ ខែកក្កដា ឆ្នាំ២០១៤នេះ លោក កែ រិន មេឃុំក្រាំងលាវបាននិយាយអោយអ្នកយកព័ត៌មានយើងដឹងថា៖រឿងដើមព្រីងនេះលោកមិនបានដឹងច្បាស់ថា វាស្ថិតនៅក្នុងដីភូមិឬស្ថិតនៅក្នុងដីសាធារណៈរបស់រដ្ឋនោះឡើយ ហើយថែមទាំងនិយាយរបៀបកាន់ជើងឈ្មោះ យ៉ាន់ សារិទ្ធ និងឈ្មោះ ប៉ុល ង៉ែតទៅវិញ មិនព្រមសំរបសំរួលដោះស្រាយរឿងហេតុកំប៉ិកកំប៉ុកនោះឡើយ។ 
លោក សុខ ហឿង បានអោយដឹងថា៖ដើមព្រីងនេះបានដុះនៅលើដីរបស់ខ្លួនតាំងពីឆ្នាំ១៩៧៩មក ហើយត្រូវបានឳពុកម្តាយផ្ទេរសិទ្ធអោយលោកកាន់កាប់ដីភូមិនេះ។ដីភូមិនេះត្រូវបានមន្ត្រីជំនាញវាស់វែងរួចហើយដើម្បីចេញប្លង់កម្មសិទ្ធស្របច្បាប់ ហើយនៅពេលដឹងលោកប្តឹងទៅតុលាការ ដើមព្រីងនេះត្រូវបានគេដឹកយកមកទម្លាក់ចោលនៅក្បែររបងភូមិលោកវិញ។ករណីនេះលោកសំណូមពរតុលាការខេត្តមេត្តាជួយរកយុត្តិធម៌ជូនលោកផង៕
