កំពង់ឆ្នាំង៖សាលាពុទ្ធកៈបឋមសិក្សានិងសាលាឆាន់មួយខ្នងរបស់ព្រសង្ឃគង់វត្តនៅពាមឆ្កោក ស្ថិតនៅក្នុងភូមិពាមឆ្កោក ឃុំពាមឆ្កោក ស្រុកជលគិរី ខេត្តកំពង់ឆ្នាំង ត្រូវបានព្រះសង្ឃ ពុទ្ធបរិស័ទចំណុះជើងវត្ត និងប្រជាពលរដ្ឋនៅក្នុងមូលដ្ឋានបាននាំគ្នាសាងសង់រយះពេល១៣ឆ្នាំហើយកសាងបានតែពាក់កណ្ដាលប៉ុណ្ណោះ។ដោយមានសេចក្ដីខ្វះខាតព្រះសង្ឃនិងប្រជាពលរដ្ឋសូមអំពាវនាវនិងសំណូមពរដល់សប្បុរសជនក្នុងនិងក្រៅប្រទេស មេត្តាជួយកសាងសាលាពុទ្ធកៈបឋមសិក្សានិងសាលាឆាន់វត្តពាមឆ្កោកដោយសេចក្ដីអនុគ្រោះ។ 
ដើម្បីស្វែងយល់នូវសេចក្ដីខ្វះខាតខាងលើ នៅព្រឹកថ្ងៃទី១០ ខែកក្កដា ឆ្នាំ២០១៤ អ្នកយកព័ត៌មានយើងប្រចាំខេត្តកំពង់ឆ្នាំង បានចុះទៅយកព័ត៌មានដោយផ្ទាល់នៅក្នុងមូលដ្ឋាន។ ព្រះសង្ឃព្រះនាម ពិន ទត ឥន្ទៈសិរីជាព្រះគ្រូសូត្រស្ដាំគង់ក្នុងវត្តពាមឆ្កោកបានមានថេរដីកាអោយក្រុមអ្នកយកព័ត៌មានយើងដឹងថា៖ អាគារថ្មមួយខ្នងដែលជាសាលាពុទ្ធកៈបឋមសិក្សានិងជាសាលាឆាន់បានកសាងតាំងពីឆ្នាំ២០០១ មកដល់ពេលនេះមានរយះពេល១៣ឆ្នាំហើយ គឺកសាងបានតែពាក់កណ្ដាលប៉ុណ្ណោះ។ប្រសិនបើធ្វើអោយរួចរាល់ត្រូវការចំណាយថវិកាប្រមាណ៤ម៉ឺនដុល្លាទៀត ហេតុដូចនេះព្រះអង្គសំណូមពរ ដល់សប្បុ រសជននៅក្នុងប្រទេសនិងក្រៅប្រទេសមេត្តាជួយកសាងសាលាពុទ្ធកៈបឋមសិក្សានិងជាសាលាឆាន់ ប្រ គេនព្រះអង្គផង ព្រោះថាពុទ្ធបរិស័ទ្ធចំណុះនិងប្រជាពលរដ្ឋនៅក្នុងមូលដ្ឋានមានជីវភាពខ្វះខាតក្រីក្រពុំមានលទ្ធភាពកសាងអោយហើយទេ។ 
លោក ចាន់ ថន ប្រធានគណៈកម្មការវត្តពាមឆ្កោកបាននិយាយអោយដឹងថា៖សាលាពុទ្ធកៈបឋមសិក្សានិងជាសាលាឆាន់ មានទំហំ បណ្ដោយ៤៨ម៉ែត្រ និងទទឹង២៤ម៉ែត្រ មកដល់ពេលនេះគឺធ្វើបាន តែពាក់កណ្ដាលទេ ការងារដែលត្រូវធ្វើបន្ត គឺត្រូវចាក់ពិដានបង្ហើយ២ល្វែងទៀត ត្រូវរៀបជញ្ជាំង បូកជញ្ជាំង លាបថ្នាំជញ្ជាំង បិតការ៉ូ ដាក់បង្អួចទ្វារ គូរព្រះបទ។ល។កិច្ចការងារខាងលើនេះត្រូវចំណាយថវិកាប្រមាណជាង៤ម៉ឺនដុល្លាទៀតទើបកសាងហើយ។ 
នៅក្នុងពេលផ្ដល់ព័ត៌មានអោយក្រុមអ្នកយកព័ត៌មានយើង គណៈកម្មការអាចារ្យវត្ត និងលោក យាយលោកតាពុទ្ធបរិស័ទ្ធចំណុះជើងវត្តប្រមាណជាង២០នាក់បាននាំគ្នាលើកដៃសំពះសំណូមពរដល់សប្បុរសជននៅក្នុងប្រទេសនិងក្រៅប្រទេស មេត្តាជួយឧបត្ថម្ភថវិកានិងបច្ច័យតាមសទ្ធាជួយកសាងសា លាពុទ្ធកៈបឋមសិក្សា និងជាសាលាឆាន់វត្តពាមឆ្កោក ប្រគេនព្រះសង្ឃនិងជូនប្រជាពលរដ្ឋនៅក្នុង ភូមិពាមឆ្កោក ឃុំពាមឆ្កោក ដោយសេចក្ដីអនុគ្រោះផង ដើម្បីលើកស្ទួយវិស័យព្រះពុទ្ធសាសនារបស់ជាតិ អោយបានរីកចំរើនថ្កុំថ្កើងរុងរឿង៕
