ខេត្តកំពង់ធំ៖ បទល្មើសបានកើតឡើងពេញបន្ទុក នៅក្នុងទឹកដីឃុំពាមបាង ស្រុកស្ទោង ខេត្តកំពង់ធំ ដែលត្រូវបានគេដឹងថា មានការបើកភ្លើងខៀវពីសំណាក់ លោក ហួន ផល នាយសង្កាត់រដ្ឋបាលជលផលពាមបាង ដែលបានឃុបឃិតគ្នា ជាមួយជនល្មើស បណ្តែតបណ្តោយឲ្យមានការ នេសាទត្រីក្នុងរដូវពងកូន ដោយពុំគិត ពីផលប្រយោជន៍ ធនធានមឆ្ឆាជាតិ គិតតែពីផលប្រយោជន៍ផ្ទាល់ខ្លួន។
លុះដល់ថ្ងៃទី១៣ ខែ កក្កដា ឆ្នាំ ២០១៤ ខណ្ទរដ្ឋបាលជលផលកំពង់ធំ បានបើកយុទ្ធនាការបង្ក្រាបបទល្មើស ជលផលនៅក្នុងភូមិសាស្ត្រឃុំពាមបាងស្ងាត់ៗ ដែលត្រូវបានដឹកនាំកំលាំងចុះបង្ក្រាបដោយ លោក ប៉ែន វណ្ណរិទ្ធ នាយខណ្ទរដ្ឋបាលជលផលកំពង់ធំ នឹងពុំមានការចូលរួមពីសំណាក់អ្នកសារពត៌មាននោះទេ ដែល ត្រូវបានគេដឹងថា ការបង្ក្រាបគ្រាន់តែជាពិធីបង្គ្រប់កិច្ចតែប៉ុណ្ណោះ បញ្ហាទាំងនេះត្រូវបានគេសង្កេតឃើញថា ការបង្ក្រាបរបស់សមត្ថកិច្ចជលផល ពុំមានការកាប់បំផ្លាញ ឬវះឧបករណ៍ចោលនោះទេ គឺសកម្មភាពគ្រាន់តែកាត់ចំណងទំលាក់ចូលក្នុងទឹក និងស្រាវដាក់ទូកមួយចំនួនតូចតែប៉ុណ្ណោះ ទង្វើបែបនេះគឺជាការបើកឳកាសឲ្យជនល្មើសដែល ត្រូវដងត្រូវផ្លែរគ្នាត្រឡប់មកបំពាក់លើបង្គោលសារឡើងវិញតែប៉ុណ្ណោះ ។
ទោះជាសង្កាត់រដ្ឋបាលជលផលពាមបាង បានបង្ហាញស្នាដៃកំប៉ិកកំប៉ុក ក្នុងការលាក់លៀមការចុះបង្ក្រាប បទល្មើសនេះ គឺលទ្ធផលដែលទទួលបានគឺ តាមរបាយការណ៍របស់ខណ្ទរដ្ឋបាលជលផលមាន រុះរើរបាំង សាច់អួនចំនួន ៤៥របាំង ប្រវែង៣៥០០ម៉ែត្រ បង្គោល១៥០០ដើម ឡុក៩០ លូ១៨០ ព្រលែងកូនត្រី ៥០០គ.ក របាយការណ៍នេះបានបញ្ជាក់ថា គ្រាន់តែជាការសណ្ឋាននោះទេ តែបើជាការពិត ពុំមានការណូតឯណា ដឹកអស់នោះទេ។
តាមប្រភពពត៌មាន ពីប្រជាពលរដ្ឋបានឲ្យដឹងថា បទល្មើសស្ថិតនៅក្នុងដែនគ្រប់គ្រងរបស់លោក ហួន ផល នាយសង្កាត់រដ្ឋបាលជលផល ពាមបាងបានកើតឡើងដូចផ្សិត ទាំងការដាក់បទល្មើសដោយប្រើប្រាស់ស្បៃ មុង លូ រ៉ាវ បំពាន់ច្បាប់ នៅមានការបើកភ្លើងខៀវ ឲ្យមានការចិញ្ចឹមកូនត្រីឆ្តោរ ស្ថិតនៅក្នុងភូមិដូនស្តើង រាប់រយបែរត្រី ពុំត្រូវបានបង្ក្រាបនោះទេ រហូតបានក្លាយទៅជាកន្លែងចែកចាយកូនត្រីឆ្តោរដ៏ធំបំផុត ស្ថិតនៅក្នុង ឃុំពាមបាង សម្រាប់ចែកចាយទូទៅក្នុងទន្លេសាប។