កំពង់ឆ្នាំង៖ ពិធីបើកការប្រកួតកីឡាមហាជនជ្រើសរើសជើងឯកប្រចាំភូមិភាគលើប្រភេទកីឡាបាល់ទាត់ បាល់ទះ បាល់បោះ និងអត្តពលកម្មបុរសនារីឆ្នាំ២០១៤ បានធ្វើឡើងនៅព្រឹកថ្ងៃទី១២ ខែកក្កដា ឆ្នាំ២០១៤ នៅទីលានបាល់ទាត់ខេត្តកំពង់ឆ្នាំង ដោយមានការចូលរួមពីលោក
ណុះ ស្លេះ អនុរដ្ឋលេខាធិការក្រសួងអប់រំ និងលោក សៀក គឹមលៀង អភិបាលរងខេត្ត។ តាមរបាយការណ៍របស់គណៈកម្មាធិការរៀបចំការប្រកួតកីឡា របស់ក្រសួងអប់រំបានអោយដឹងថា៖កីឡាករដែលបានចូលរួម មកពីខេត្តចំនួន៦គឺ ខេត្តកណ្តាល,កំពង់ចាម,ព្រៃវែង,កំពង់ឆ្នាំង,ស្វាយរៀង និងខេត្តកំពង់ធំ ដែលមានកីឡាករសរុបចំនួន៣២៤នាក់ ក្នុងនោះមានកីឡាការនីចំនួន៣០នាក់។
ការប្រកួតកីឡាមហាជនជ្រើសរើសជើងឯកថ្នាក់ភូមិភាគនេះ នឹងប្រព្រឹត្តិទៅចាប់ពីថ្ងៃទី០៩ដល់២០ ខែកក្កដា ឆ្នាំ២០១៤។ លោក សៀក គឹមលៀង អភិបាលរងខេត្តបានថ្លែងក្នុងឳកាសនោះថា៖កីឡាករកីឡាការនីគឺជាទំពាំងស្នងឬស្សីក្នុងការអភិវឌ្ឍន៍ជាតិនាថ្ងៃអនាគតដែលមិនអាចខ្វះបាន។
ក្នុងនាមជាកីឡាករត្រូវយកចិត្តទុកដាក់ជាសំខាន់ចំពោះសុខភាពជាពិសេសគោរពអោយបានល្អនូវវិន័យក្នុងការប្រកួត សីលធម៌រស់នៅ ការដើរហើហូបចុក និងត្រូវចេះលើកស្ទួយនូវកិត្តិយសផ្ទាល់ខ្លួន ក៍ដូចជាកិត្តិយសខេត្តរបស់ខ្លួន ដោយត្រូវសាមគ្គីគ្នាអោយបានល្អទាំងក្នុងការប្រកួត និងទាំងក្នុងការស្នាក់នៅ។ក្នុងពេលនោះដែរលោកក៍បានសំណូមពរដល់អាជ្ញាធរ និងសមត្ថកិច្ចនៅក្នុងក្រុងកំពង់ឆ្នាំងត្រូវយកចិត្តទុកដាក់សណ្តាប់ធ្នាប់ សន្តិសុខ និងសុវត្ថិភាពអោយបានល្អដល់ក្រុមកីឡាកករកីឡានីទាំងអស់ដែលបានមកប្រកួតនៅក្នុងខេត្តកំពង់ឆ្នាំង។ 
ដោយឡែកលោក ណុះ ស្លេះ អនុរដ្ឋលេខាធិការក្រសួងអប់រំយុវជន និងកីឡា បានថ្លែងផ្តាំផ្ញើដល់ក្រុមកីឡាករ និងគណៈកម្មាការប្រកួតថា៖ការប្រកួតកីឡាជ្រើសរើសជើងឯកនៅក្នុងពេលនេះ គឺជាការប្រកួតដើម្បីផ្លាស់ប្តូរបទពិសោធន៍ពីគ្នាទៅវិញទៅមក ក្នុងន័យសាមគ្គីភាព មិត្តភាព និងចេះយោគយល់អធ្យាស្រ័យគ្នាទៅវិញទៅមក។វេទិកាកីឡា គឺជាកាលាអនុវត្តភាពប្រកបដោយសមធម៌ដែលផ្តល់អោយកីឡាករនិងគូប្រកួតមានឳកាសសាកល្បង បញ្ចេញសមត្ថភាពបច្ចេកទេស ទេពកោសល្យ និងល្បិចកលរបស់ខ្លួន ដើម្បីទទួលជ័យជំនះ។ 
ទន្ទឹមនេះដែរវិស័យកីឡាបានរួមចំណែកកាត់បន្ថយភាពអសកម្ម អំពើអបាយមុខក្នុងសង្គម ដូចជាការសេពគ្រឿងញៀន ល្បែងស៊ីសង អំពើហឹង្សាក្នុងគ្រួសារ និងបទល្មើសផ្សេងៗក្នុងសង្គមជាតិ។លោកក៍បានផ្តាំផ្ញើផងដែរដល់គណៈកម្មាការប្រកួតកីឡា គណៈប្រតិភូកីឡា គ្រប់ខេត្ត សូមសហការគ្នាអោយបានល្អក្នុងការប្រកួតកីឡាមហាជនក្នុងពេលនេះអោយទទួលបានជោគជ័យ និងលទ្ធ ផលល្អ និងសំរាប់ផ្តល់កិត្តិយសអោយខេត្តរបស់ខ្លួននិមួយៗផងដែរ៕
