ខ្សែការពាររបស់ក្រុមមច្ចុរាជពណ៌ទឹកក្រូចហូឡង់កីឡាករ ដារីល ជេនម៉ាត់ (Daryl Janmaat) បានឈានដល់កិច្ចព្រមព្រៀង លើការផ្លាស់ទៅកាន់ក្លិបសារិការព្រៃ Newcastle United រួចរាល់ហើយ ។ កីឡាករវ័យ២៤ឆ្នាំរូបនេះនឹងចូលមកជំនួសតំណែងរបស់កីឡាករ Mathieu Debuchy នៅតំបន់ខ្សែការពារ ស្លាបខាងស្តាំបន្ទាប់ពីកីឡាករសញ្ជាតិបារាំងរូបនេះបានសម្រេចចិត្តផ្លាស់ទៅកាន់ក្លិបកាំភ្លើងធំ Arsenal ។ ជេនម៉ាត់ (Janmaat) បានព្រមព្រៀងចុះកិច្ចសន្យារយៈពេល៦ឆ្នាំនៅទឹកដី St James' Park បន្ទាប់ពីរូបគេចាកចេញ ពីក្លិប Feyenoord ក្នុងតម្លៃខ្លួន៦លានផោនហើយរូបគេបានក្លាយជាកីឡាករទី៥ ដែល Newcastle ទិញមករួមក្រុម នៅរដូវក្តៅនេះ ។ គួរបញ្ជាក់ថា មកដល់ពេលនេះ Newcastle ទិញបានកីឡាករចំនួន៥នាក់ហើយដែលក្នុងនោះមានដូចជាៈ រ៉េមី ខាបេឡា (Remy Cabella), អាយ៉េហ្សេ ប៉េរ៉េស (Ayoze Perez), ជេក ឃូលបេក (Jack Colback) និង ស៊ីម ឌឺ ជុង (Siem de Jong) ៕