រតនគិរីៈ កាលពីវេលាម៉ោង២២និង១០នាទី ថ្ងៃទី១៥ខែកក្កដា ឆ្នាំ២០១៤ ស្ថិតក្នុងភូមិ៣ ឃុំត្រពាំងក្រហមស្រុកកូនមុំ មានករណីគ្រោះធម្មជាតិ រន្ទះបាញ់ស្ត្រីម្នាក់ស្លាប់ខណៈពេលដែលអង្គុយមើលទូរទស្សន៍នៅក្នុងលំនៅដ្ឋាន ក្នុងក្រុមហ៊ុនហូទី។ តាមការអោយដឹងពីលោក រស់ វណ្ណា មេបញ្ជាការកងរាជអាវុធហត្ថស្រុកកូនមុំ ថាស្ត្រីវ័យចំណាស់ត្រូវបានរន្ទះបាញ់ស្លាប់ភ្លាមៗនៅនឹងកន្លែង។ ស្ត្រីម្នាក់នោះមានឈ្មោះ សុខ ទូច អាយុ៥១ឆ្នាំ មានស្រុកំណើតនៅខេត្តកំពង់ស្ពឺ ។
លោកបានបន្តទៀតថាមនុស្សដែលអង្គុយមើលទូរទស្សន៍មានគ្នាចំនួន៧នាក់អកុសល់ស្លាប់តែម្នាក់ ចំពោះអ្នកទាំង៦នាក់ទៀតមិនមានអ្នកណារងរបួសនោះទេ។ ប្រភពពីកន្លែងកើតហេតុបានអោយដឹងថា ខណៈពេលពួកគាត់កំពុងមើលទូរទស្សន៍មានខ្យល់ភ្លៀង ផ្គរ រន្ទះ យ៉ាងខ្លាំងធ្វើអោយជនរងគ្រោះដួលស្លាប់ភ្លាមៗនៅនឹងកន្លែង។ 
សូមបញ្ជាក់ក្រសួងធនធានទឹក និងឧតុនិយមកន្លងមកធ្លាប់បានចេញសេចក្តីជូនដំណឹងដល់សាធារណៈមិនអនុញ្ញាតិអោយបើកវិទ្យុ ឫទូរទស្សន៍នៅពេលដែលមេឃកំពុងភ្លោង ផ្គរ រន្ទះនោះទេ ឫកាន់ឧបករណ៍ដែលងាយចំលងចរន្តអគ្គីសនីធម្មជាតិ ជាដាច់ខាង ព្រោះអាចឆ្លងចរន្ត និងអាចបណ្តាលអោយមានគ្រោះថ្នាក់ដល់ជីវិត ជាក់ស្តែងដូចស្ត្រីរូបនេះជាដើម៕
