កោះកុង ៖ តៃកុងរថយន្តម្នាក់បានស្លាប់ និងព្រូរថយន្តត្រូវរងរបួសធ្ងន់ នៅក្នុងហេតុការណ៍រថយន្តស៊ីទែនដឹកហ្គាសមួយគ្រឿងរបស់ក្រុមហ៊ុន LPG បុកជាមួយរថយន្តទួរីសដឹកផ្លែឈើ កាលពីវេលាម៉ោង១០ព្រឹកថ្ងៃទី១៦ ខែកក្កដា នៅចំណុចខាងកើតស្ពានតាតៃចម្ងាយ១០០ម៉ែត្រ ក្នុងឃុំតាតៃ ស្រុកកោះកុង ខេត្តកោះកុង។
លោក ម៉ែន ឈា នាយប៉ុស្ត៏រដ្ឋបាលប៉ូលិសឃុំតាតៃបានឲ្យដឹងថា ឧប្បតិ្តហេតុនេះ បានកើតឡើងក្នុងពេលដែលរថយន្តដឹកហ្គាសបានចុះចំណោតក្នុងល្បឿនលឿនខុសពីធម្មតា ចំណែកអ្នកបើករថយន្តទួរីសដែលធើ្វដំណើរបញ្ច្រាសទិស ពេលឃើញហេតុការណ៏មិនស្រួល ពួកគេក៏ឈប់ឡានរួចចុះចេញមិនទាន់ផុតឆ្ងាយផង ស្រាប់តែរថយន្តដឹកហ្គាសនោះបានជ្រុលចង្កូតមកបុកចំពីមុខរថយន្តតែម្តង តែសំណាងល្អតៃកុងនិងព្រូរថយន្តទួរីសដឹកផ្លែឈើគ្រាន់តែរងរបួសស្រាល រីឯឡានវិញខូចខាតសើ្ទរតែទាំងស្រុង។
ដោយឡែករថយន្តដឹកស៊ីទែនហ្គាសវិញធ្លាក់ចូលទៅស្រែផ្ទុះឆេះតែម្តង។ នាយប៉ុស្ត៏រដ្ឋបាលដដែលបានឲ្យដឹងបន្ថែមថា តៃកុងឡានដឹកហ្គាសដែលបាត់បង់ជីវិតមានឈ្មោះ ឱម សុភ័ត្រា អាយុ៤០ឆ្នាំ ចំណែកព្រូរងរបួសធ្ងន់ពុំទាន់បានស្គាល់ឈ្មោះទេ ហើយត្រូវបានគេបញ្ជូនទៅកាន់មនី្ទរពេទ្យឯរាជធានិភ្នំពេញដើម្បីព្យាបាល។ រហូតមកដល់ម៉ោង៣រសៀលថ្ងៃទី១៦ កក្កដា ទៅហើយ រថយន្តដឹកហ្គាសដែលក្រឡាប់ខាងលើ នៅតែបន្តឆាបឆេះ ត្បិតអីរថយន្តពន្លត់អគ្គីភ័យមិនអាចចូលទៅជួយពន្លត់បាន ព្រោះខ្លាចមានការផ្ទុះស៊ីទែនហ្គាសដែលកំពុងតែឆេះនោះកើតឡើង៕