ក្លិបអ្នកមានបុណ្យ Barcelona បានសម្រេចចិត្តអនុញ្ញាតឲ្យកីឡាករ Cristian Tello ផ្លាស់ទៅ កាន់ក្លិប Porto របស់ព័រទុយហ្គាល់ជាលក្ខណៈខ្ចីជើង ។ បើយោងតាមលក្ខ័ណ្ឌរវាងក្លិបទាំងពីរបានបង្ហាញថា ខ្សែបម្រើស្លាបសញ្ជាតិអេស្ប៉ាញរូបនេះនឹងចំណាយពេលចំនួន២រដូវកាលលេងឲ្យក្លិបបាល់ទាត់របស់ប្រទេសព័រទុយហ្គាល់ហើយកិច្ចព្រមព្រៀងលើការទិញយកពេញសិទ្ធិនឹងត្រូវបានគេធ្វើឡើងក្រោយពេលការខ្ចីជើងត្រូវបានបញ្ចប់ ។ ទោះបីជាយ៉ាងណាក៏ដោយ កីឡាកររបស់ក្លិប Barcelona រូបនេះមានសិទ្ធិអាចលុបចោលលើ កិច្ចសន្យាក្រោយពេលលេងបាន១រដូវកាលដែលមានន័យថា កីឡាករវ័យ២២ឆ្នាំរូបនេះអាចនឹងវិលមកកាន់ទឹកដី Camp Nou វិញ ។ គួរបញ្ជាក់ថា Tello ចូលលេងបាន៣០ប្រកួតឲ្យក្លិបអ្នកមានបុណ្យកាលពីរដូវកាលមុនហើយ រូបគេក៏ស៊ុតបញ្ចូលទីបាន៥គ្រាប់ផងដែរ ៕