ទ្រីប៉ូលីៈ ការប្រយុទ្ធគ្នាយ៉ាងសាហាវនៅព្រលានយន្តហោះក្រុងទ្រីប៉ូលី ប្រទេសលីប៊ី កាលពីយប់ថ្ងៃទី១៤ កក្កដា ២០១៤ បានបណ្តាលឲ្យមានចលាចលថ្មីៗ ដោយអង្គការសហប្រជាជាតិ បានបង្ខំចិត្តជម្លៀសបុគ្គលិករបស់ខ្លួនចេញពីលីប៊ី។ នេះបើតាមវេបសាយបរទេសចិន ឆាយណាដេលី ផ្សាយកាលពីថ្ងៃពុធនេះ។
ប្រភពនេះបានបន្តថា ការបាញ់គ្រាប់រ៉ុក្កែតថ្មីៗក្រោយការប៉ះទង្គិចគ្នាយ៉ាងសាហាវនៅព្រលានយន្តហោះទ្រីប៉ូលី រវាងបណ្តាក្រុមប្រដាប់អាវុធនានា បានជំរុញឱ្យ អ.ស.ប ជម្លៀសបុគ្គលិករបស់ខ្លួនចេញពីប្រទេសលីប៊ី ។ សូម្បីតែទីក្រុងធំទី២ របស់លីប៊ី គឺទីក្រុងបេនហ្គាហ្ស៊ី ក៏មានអំពើហិង្សាថ្មីៗបណ្តាលឱ្យមនុស្សស្លាប់យ៉ាងតិច៣ នាក់ ញ៉ាំងឱ្យមានការភ័យខ្លាចចំពោះជម្លោះដែលរីកកាន់តែធំផងដែរ។ បើគិតចាប់ពីថ្ងៃអាទិត្យ មកដល់ថ្ងៃពុធ មនុស្ស១៥នាក់ត្រូវបានសម្លាប់ និងរបួសជាច្រើននាក់។ 
លោករដ្ឋមន្ត្រីការបរទេសសហរដ្ឋអាមេរិក លោកចន ឃើរី បាននិយាយកាលពីថ្ងៃអង្គារ (US Secretary of State John Kerry said on Tuesday) ថា ត្រូវនាំគ្នាជួយបញ្ចប់អំពើហិង្សានៅលីប៊ី។ចាប់តាំងពីការដួលរលំនៃរបបលោកមូអាម៉ា កាដាហ្វី កាលពីឆ្នាំ២០១១មក ពួកជីវពលទាំងឡាយក្លាយជាអ្នកធ្វើច្បាប់ក្នុងប្រទេសលីប៊ី ដែលធ្លាក់ក្នុងភាពជ្រួលច្របល់មិនស្រាកស្រាន្ត។ នៅក្នុងសេចក្តីប្រកាសមួយ បេសកកម្ម អ.ស.ប ប្រចាំលីប៊ី UNSMIL ប្រកាសថា ក្រោយការប្រយុទ្ធគ្នាកាលពីថ្ងៃទី១៣ កក្កដា និងដោយសារការបិទព្រលានយន្តហោះអន្តរជាតិក្រុងទ្រីប៉ូ
លី UNSMIL យល់ថា ខ្លួននឹងពុំអាចបន្តការងារបានទៀតទេ ព្រោះគ្មានការធានាសន្តិសុខដល់បុគ្គលិកដែលគ្មានទាំងសេរីភាព ក្នុងការដើរហើរថែមទៀតផង។ កាលពីយប់ថ្ងៃទី១៤ កក្កដា ព្រលានយន្តហោះក្រុងទ្រីប៉ូលី ជាគោលដៅនៃការបាញ់គ្រាប់រុ៉ក្កែតជាច្រើនសិបគ្រាប់ទៀត ។ យន្តហោះប្រមាណជា១០គ្រឿងរបស់ក្រុមហ៊ុនរដ្ឋលីប៊ី រងការខូចខាតរួចហើយដោយសារការប្រយុទ្ធគ្នានាពេលមុននេះ៕
