ភ្នំពេញ ៖ កម្មការិនីសំណង់ម្នាក់បានប្រសូតបុត្រយ៉ាងលំបាកលើរទេះរុញឥដ្ឋនៅក្នុងការដ្ឋានសំណង់បុរីពិភពថ្មី ស្ថិតនៅតាមផ្លូវបេតុង (ម្តុំផ្សារគគីរ). ភូមិគោកឃ្លៀង សង្កាត់ភ្នំពេញថ្មី ខណ្ឌសែនសុខ កាលពីវេលាម៉ោងប្រមាណ៦និង១០នាទីព្រឹកថ្ងៃទី១៩កុម្ភះនេះ បង្កឲ្យមានការភ្ញាក់ផ្អើល ហើយត្រូវបានក្រុមគ្រូពេទ្យជួយសង្គ្រោះម្តាយទាន់ពេលវេលា តែអកុសលកូនដែលកើតក្នុងអាយុ៧ខែបានស្លាប់។ ប្រភពពីកន្លែងកើតហេតុបានឲ្យដឹងថា ស្ត្រីរងគ្រោះឈ្មោះម៉ុង ចាន់ថា អាយុ៣១ឆ្នាំនិងប្តីឈ្មោះគង់ សុខ អាយុ៣៥ឆ្នាំ មានស្រុកកំណើតនៅភូមិ-ឃុំដូងស្រុករមាសហែក ខេត្តស្វាយរៀង បច្ចុប្បន្នពួកគាត់ទាំងពីរនាក់ប្តីប្រពន្ធជាកម្មករសំណង់។
លោកគង់ សុខ បានឲ្យដឹងថា នៅវេលាម៉ោងប្រមាណ៤កន្លះទៀបភ្លឺប្រពន្ធគាត់ដែលមានផ្ទៃពោះ៧ខែ ស្រាប់តែឈឺពោះយ៉ាងខ្លាំង ។. ដោយគ្មានមធ្យោបាយគាត់រួមជាមួយមិត្តភក្ត្រក៏លើកប្រពន្ធដាក់លើរទេះដឹកឥដ្ឋឆ្ពោះមកផ្លូវធំរកគ្រូពេទ្យ។ ខណ:ពេលធ្វើដំណើរបានបន្តិចស្រាប់តែកូនគាត់កើតចេញជើងមកមុន…។
ភ័យពេកក៏រត់ទៅទាក់ទងសន្តិសុខយាមការដ្ឋានទាក់ទងប៉ូលិស ហើយប៉ូលិសក៏ទាក់ទងគ្រូពេទ្យមកជួយ។ លោកគង់ សុខបន្តថា ភ្លាមៗនោះរថយន្តសង្គ្រោះនិងក្រុមគ្រូពេទ្យនៃមន្ទីរពេទ្យបង្អែកពោធិ៍ចិនតុងក៏បានមកដល់ ហើយបង្កើតទារកនៅលើរទេះរុញតែម្តង។
ការបង្កើតកូនដោយគ្មានឧបករណ៍អាចជួយសង្គ្រោះម្តាយរួចផុតពីគ្រោះថ្នាក់ តែអកុសលកូនដែលកើតមិនគ្រប់ខែបានស្លាប់ រួចដឹកមកមន្ទីរពេទ្យសង្គ្រោះបន្ថែមទៀត។ លោកក៏បានថ្លែងអំណរគុណដល់ក្រុមគ្រូពេទ្យដែលបានជួយសង្គ្រោះប្រពន្ធរបស់លោករួចផុតពីគ្រោះថ្នាក់ដល់ជីវិត ទោះបីកូនរបស់លោកបានស្លាប់ក៏ដោយចុះ៕ 
