ប៊ែរឡាំងៈ មនុស្សជិតកន្លះលាននាក់បានអបអរសាទរក្រុមបាល់ទាត់ជម្រើសជាតិអាល្លឺម៉ង់ដែលបានឈ្នះពានរង្វាន់បាល់ទាត់ពិភពលោក World Cup 2014 ដោយពួកគេបានបង្ហាញនូវ សេចក្តីស្រឡាញ់ ការចូលចិត្ត និងបង្ហាញដួងចិត្តជាច្រើនទៀតកាលពីថ្ងៃទី១៥ ខែកក្កដា ២០១៤ ហើយត្រូវបានវេបសាយបរទេសដេលីមែលចុះផ្សាយកាលពីម្សិលមិញ។ 
តាមប្រភពនេះ ក្បួនដង្ហែដែលចូលរួមដោយមនុស្សប្រមាណជាង៤០ម៉ឺននាក់ បានអបអរតាម ដងផ្លូវ ខណៈពេលក្រុម បាល់ទាត់ជម្រើសជាតិអាល្លឺម៉ង់ដែលបានឈ្នះពានរង្វាន់បាល់ទាត់ពិភពលោក World Cup 2014 ក្នុងព្រឹត្តិការណ៍នៃការប្រកួតនៅប្រេស៊ីលថ្មីៗនេះ បន្ទាប់ពីបាន បំបាក់ក្រុមជម្រើសជាតិអាហ្សង់ទីនរួចមក។ លោក Joachim Loew គ្រូបង្វឹកបានថ្លែងអំណរគុណដល់អ្នកគាំទ្រ និងបាននិយាយថា នេះជាព្រឹតិ្តការណ៍នៃការប្រកួតថ្នាក់ពិភពលោក បើគ្មានអ្នកទាំងអស់គ្នាក៏គ្មានថ្ងៃនេះដែរ។ 
ដោយសារការចូលរួមពីអ្នកទាំងអស់គ្នា ពីកីឡាករគ្រប់រូប និងគ្រួសារទើបយើងអាចមានថ្ងៃនេះ។ ចំណែកក្រុមកីឡាករជម្រើសជាតិក៏បានសម្តែងក្តីសប្បាយរីករាយយ៉ាងខ្លាំង ជាពិសេស ប្រធានក្រុមបានលើកពានបង្ហាញក្រុមអ្នកគាំទ្រ ហ្វូងមនុស្សដ៏កុះករផងដែរ។ ពួកគេនិយាយ ថា សូមអរគុណដល់សេចក្តីស្រឡាញ់ទាំងអស់នេះ នេះជាមោទនភាពនៃយើងទាំងអស់គ្នា៕ 
