ភ្នំពេញ៖ បុរសជនជាតិបរទេសម្នាក់កំពុងធ្វើដំណើរថ្មើរជើងតាមបណ្ដោយផ្លូវលេខ១៩ ហើយលើកទូរស័ព្ទនិយាយស្រាប់តែមានជនសង្ស័យម្នាក់បានជិះម៉ូតូមួយគ្រឿងម៉ាកឌ្រីមសង់C125 ស៊េរី២០១៤ គ្មានស្លាកលេខ រួចក៏ធ្វើសកម្មភាពឆក់ទូរស័ព្ទពីជនជាតិបរទេសខាងលើនេះក៏ប៉ុន្តែដោយជនជាតិបរទេសមិនព្រមក៏បានប្រទាញប្រទង់តោងម៉ូតូអូសជាមួយជនសង្ស័យប្រហែលជា៣០ម៉ែត្រខណៈនោះក៏ស្រាប់តែមានបក្ខពួកជនសង្ស័យចំនួន២ម៉ូតូទៀតបានមកទាក់បុរសជនជាតិបរទេសអោយចេញពីម៉ូតូគ្នាគេ រួចជនសង្ស័យខាងលើជិះគេចខ្លួនបាត់ស្រមោលតែម្ដង។ ហេតុការណ៍ខាងលើនេះបានកើតឡើងកាលពីវេលាម៉ោង៨និង២០នាទីយប់ថ្ងៃទី១៩ខែកុម្ភៈឆ្នាំ២០១៤ តាមបណ្ដោយផ្លូវលេខ១៩ ក្នុងសង្កាត់ផ្សារកណ្ដាល២ ខណ្ឌដូនពេញ។
ប្រភពព័ត៌មាននៅកន្លែងកើតហេតុបានអោយដឹងថា ចំពោះហេតុការណ៍ខាងលើនេះពួកគាត់បានឃើញផ្ទាល់ពីភិនភាគជនសង្ស័យខាងលើនេះមានរាងធាត់ ហើយជិះម៉ូតូមួយគ្រឿងម៉ាកឌ្រីមសង់C125 ពណ៌ខ្មៅ គ្មានស្លាកលេខ និងបក្ខពួករបស់គេជិះម៉ូតូ២គ្រឿងសុទ្ធតែស៊េរីទំនើបចាំមកបិតគូទពីក្រោយ បន្ទាប់ពីពួកគេធ្វើសកម្មភាពឆក់ទូរស័ព្ទគេហើយ។ ទាក់ទិននិងករណីឆក់ខាងលើនេះដែរជនរងគ្រោះដែលជាជនជាតិបរទេសខាងលើត្រូវបានសមត្ថកិច្ចយកមកសួរនាំនៅប៉ុស្តិ៍នគរបាលផ្សារកណ្ដាល២ ដើម្បីដាក់ពាក្យបណ្ដឹងផងដែរ៕