ក្រុងកំពង់ឆ្នាំង សេវាសុខាភិបាល ដីសម្បទានសង្គមកិច្ច គ្រឿងញៀន និងវប្បធម៌ប្រពៃណីជាតិធ្លាក់ចុះ កំពង់ឆ្នាំង៖ ប្រជាពលរដ្ឋនៅក្នុងសង្កាត់ផ្សារឆ្នាំងបានសំដែងនូវទុក្ខកង្វល់ដែលពាក់ព័ន្ធ នឹងសេវាសុខាភិបាលមានតម្លៃខ្ពស់ ដីសម្បទានសង្គមកិច្ចដែលស្នើសុំសំរាប់ប្រជាពលរដ្ឋក្រីក្រពុំទាន់ឃើញដោះស្រាយអោយពួកគាត់ អ្នកប្រកបមុខរបរចាក់ធុងបាស់តាមរោងបុណ្យរោងការ បានកំពុងធ្វើអោយតម្លៃវប្បធម៌ប្រពៃណីខ្មែរត្រូវធ្លាក់ចុះនិងបង្កអោយមានអំពើហឹង្សា នៅក្នុងពិធី។
ពួកគាត់បានសំដែងក្តីព្រួយបារម្ភនេះ នៅក្នុងវេទិការសាធារណៈមួយនៅក្នុងវត្តយាយទេព ស្ថិតក្នុងភូមិផ្សារ ឆ្នាំង សង្កាត់ផ្សារឆ្នាំង ក្រុងកំពង់ឆ្នាំង នៅព្រឹកថ្ងៃទី១៧ ខែកក្កដា ឆ្នាំ២០១៤ ដែលមានលោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាប្រធានក្រុមការងារចុះជួយក្រុងកំពង់ឆ្នាំង ចូលរួមជាគណៈអធិបតី និងមានមន្ត្រីរាជការគ្រប់មន្ទីរអង្គភាពជុំវិញខេត្តនិងមានប្រជាពលរដ្ឋចូលរួមជាង២០០នាក់ផងដែរនៅក្នុងពិធីនេះ។
នៅក្នុងវេទិការនេះប្រជាពលរដ្ឋបានឡើងសំដែងនូវក្តីបារម្ភរបស់ពួកគាត់ថា៖ក្នុងការព្យាបាលជម្ងឺឯកជនមានខថ្លៃខ្ពស់គ្រាន់តែដាក់សេរ៉ូម១ស្បោង និងអោយថ្នាំបន្តិចបន្តួចមានតម្លៃចាប់ពី៨ទៅ១០ម៉ឺនរៀល ពេលទៅមន្ទីរខេត្តជនក្រីក្រមួយចំនួនមិនត្រូវបានទទួលការព្យាបាលព្រោះតែគ្មានលុយបង់អោយថ្លៃសេវា។ដីសម្បទានសង្គមកិច្ចសំរាប់ជនក្រីក្រស្នើសុំ មិនទាន់ឃើញដោះស្រាយអោយទេ។វប្បធម៌ប្រពៃណីខ្មែរត្រូវបានធ្លាក់ចុះដោយសារអ្នកមានធុងបាស់ជួលចាក់តែបទបរទេស ធ្វើអោយយុវវ័យភ្លើតភ្លើនរាំប៉ះគ្នាបន្តិចបន្តួចវាយកាប់ចាក់គ្នាស្ទើរតែគ្រប់រោង។
ទុក្ខកង្វល់ទាំងអស់ខាងលើនេះត្រូវបានលោកជំទាវ ជូ ប៊ុនអេង ជាប្រធានអង្គប្រជុំ អញ្ជើញតំណាងមន្ទីរពាក់ព័ន្ធនីមួយៗឡើងដោះស្រាយនូវក្តីកង្វល់របស់ពួកគាត់។លោក ថោង ចំរើន ប្រធានមន្ទីរសង្គមកិច្ចខេត្តបានឡើងជំរាបជូនប្រជាពលរដ្ឋថា៖ មន្ទីរសង្គមកិច្ចអាចដោះស្រាយគោលនយោបាយដីសម្បទានបានតែចំពោះអតីតយុទ្ធេជនតែប៉ុណ្ណោះ ហើយមន្ទីរកំពុងដាក់សំណើរសុំដីសម្បទានសង្គមកិច្ចជូនអតីតយុទ្ធជនប្រមាណ៣៥០គ្រួសារ ជូនថ្នាក់លើសំរេច។ចំណែកដីសម្បទានសំរាប់ដោះស្រាយជូនជនក្រីក្រវិញ ជាតួនាទីរបស់មន្ទីរសុរិយោដីខេត្តជាអ្នកស្នើសុំទៅអន្តរក្រសួងសំរេច។
ដោយឡែកតំណាងមន្ទីរសុរិយោដីខេត្តបានឡើងបកស្រាយថា៖ដីសម្បទានសង្គមកិច្ចសំរាប់ប្រជាពលរដ្ឋក្រីក្រ មន្ទីរកំពុងរៀបចំ ជាមួយអង្គការLWDជាដៃគូនៅតំបន់ជើងភ្នំជំរាយក្នុងស្រុកសាមគ្គីមានជ័យ និងបានដាក់សំណើរទៅអន្តរក្រសួងជួយសំរេចហើយ តែពុំទាន់ទទួលបានលទ្ធផល។ តំណាងមន្ទីរសុខាភិបាលខេត្តបានអោយដឹងថា៖សេវាព្យាបាលនៅក្នុងមន្ទីរពេទ្យខេត្ត សំរាប់ជនក្រីក្រគឺមិនយកប្រាក់ទេ អោយតែអ្នកជម្ងឺនោះប័ណ្ឌក្រីក្រពីអង្គការរ៉ាក់។ប័ណ្ណក្រីក្រនេះគឺអង្គការបានចុះស្រង់ស្ថិតិជាក់ស្តែងជាមួយអាជ្ញាធរមូលដ្ឋានរៀងរាល់ឆ្នាំ តដើម្បីចេញប័ណ្ណក្រីក្រពិប្រាកដអោយជនក្រីក្រ (អាជ្ញាធរមូលដ្ឋានមិនអាចចេញលិខិតបញ្ជាក់ជូនក្រីក្រតែឯងដោយគ្មានការទទួលស្គាល់ពីអង្គការរ៉ាក់នោះទេ)។ទាក់ទងនឹងគ្រឿងញៀនលោក ឡុច វណ្ណរ៉ា ស្នងការរង នគរបាលខេត្តបានថ្លែងអោយដឹងថា៖កន្លងមកមានម្ចាស់ផ្ទះសំណាក់មួយចំនួនមិនសហការជាមួយសមត្ថកិច្ចឡើយនិង បានលាក់បាំងអ្នកចែកចាយនិងប្រើប្រាស់ថ្នាំញៀននៅក្នុងផ្ទះសំណាក់។
ដោយឡែកអាណាព្យាបាលមួយចំនួន ពេលសមត្ថ កិច្ចចាប់ខ្លួនកូនចៅដែលប្រើប្រាស់ថ្នាំញៀន បែរជាចេញមុខមកធានាអះអាងដោះសារថាកូនខ្លួនមិនប្រើប្រាស់ថ្នាំញៀនទេ ធ្វើអោយកិច្ចប្រតិបត្តិការបង្ក្រាបគ្រឿងញៀនរបស់សមត្ថកិច្ចជួបការលំបាក។ លោកជំទាវ ជូ ប៊ុនអេង បានធ្វើការបកស្រាយបន្ថែមនូវចំណុចខាងលើថា៖ចំពោះជនក្រីក្រពិតប្រាកដ អាជ្ញាធរមូលដ្ឋានត្រូវជួយសំរួលធ្វើប័ណ្ណក្រីក្រជូនពួកគាត់អោយបានស្មើភាពទាំអស់គ្នា មិនត្រូវរើសអើងឡើយ។ ចំពោះសេវាព្យាបាលជម្ងឺតាមគ្រូពេទ្យឯកជន ជាសិទ្ធឯកជនរបស់គេ អ្នក្រីក្រត្រូវមកព្យាបានជម្ងឺនៅមន្ទីរពេទ្យខេត្ត។ចំពោះដីសម្បទានសង្គមកិច្ច រដ្ឋបានគិតគូ ផ្តល់អទិភាពជូនអតីតយុទ្ធជននិងក្រុមគ្រួសារមុនគេ ព្រោះពួកគាត់មានគុណបំណាច់ចំពោះជាតិមាតុភូមិ ចំពោះប្រជាពលរដ្ឋក្រីក្រនិងត្រូវដោះស្រាយបន្តបន្ទាប់តាមក្រោយ។
ចំពោះការអនុវត្តគោលនយោបាយភូមិឃុំមានសុវត្ថិភាពទាំង៩ចំណុច វាមិនមែនជាតួនាទីរបស់សមត្ថកិច្ចនិងអាជ្ញា ធរនោះទេ ដើម្បីសំរេចបានដោយជោគជ័យលុះត្រាណាមានការចូលរួមអនុវត្ត និងគាំទ្រពីប្រជាពលរដ្ឋនៅគ្រប់មូលដ្ឋាន។ហេតុនេះប្រជាពលរដ្ឋគ្រប់រូប ត្រូវចូលរួមផ្តល់ព័ត៌មានអោយបានទាន់ពេលវេលាជូនសមត្ថកិច្ច និងអាជ្ញាធរមូលដ្ឋាន ដើម្បីរួមគ្នាទប់ស្កាត់ និងបង្ក្រាបអោយបានបទល្មើសផ្សេងៗដែលកើតមានឡើងនៅក្នុងភូមិឃុំរបស់ខ្លួនអោយមានប្រសិទ្ធភាព៕
