ភ្នំពេញ៖ បុរសម្នាក់ត្រូវបាននគរបាលប៉ុស្តិ៍រដ្ឋបាលព្រៃសធ្វើការឃាត់ខ្លួន កាលពីវេលាម៉ោង១៧ និង៣០នាទី ថ្ងៃទី១៩ ខែកុម្ភៈ ឆ្នាំ២០១៤ នៅចំណុចក្នុងភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ ពីបទបង្កហឹង្សា ដោយយកដកស្រាវាយក្បាលអ្នកភូមិដូចគ្នា បណ្តាលឲ្យរងរបួសហូរឈាមពេញផ្ទៃមុខ ហើយត្រូវបានក្រុមគ្រួសារដឹកបញ្ជូនទៅពេទ្យដេរអស់ ចំនួន ៥ថ្នេរ។
លោក អ៊ុល សំអុល នាយនគរបាលប៉ុស្តិ៍រដ្ឋបាលព្រៃសប្រាប់ឲ្យដឹងថា ជនរងគ្រោះមានឈ្មោះ តូច សុក ភេទប្រុស អាយុ៣៥ឆ្នាំ មុខរបររត់ម៉ូតូកង់បី ចំណែកជនសង្ស័យ ឈ្មោះ រុន កុសល ហៅ សោម វណ្ណា ភេទប្រុស អាយុ៣៩ឆ្នាំ ជាកសិករ ទាំងពីរនាក់រស់នៅក្បែរគ្នា ស្ថិតក្នុងភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ។ លោកនាយនគរបាលប៉ុស្តិ៍រដ្ឋបាលព្រៃសបញ្ជាក់ឲ្យដឹងថា មុនពេលកើតហេតុពួកគេទាំងពីរនាក់បានអង្គុយផឹកស្រាជាមួគ្នានៅមុខរបស់ជនរងគ្រោះ ដោយមានម៉ូតូរ៉ឺម៉កកង់បីរបស់ជនរងគ្រោះចតនៅជិតកន្លែងផងដែរ ។
លុះនៅពេលកំពុងផឹក ស្រាប់តែកូនប្រុសរបស់ជនបង្កបានរត់លេងចុះឡើងៗលើរ៉ឺម៉កកង់បីនោះ ហើយជនរងគ្រោះ ក៏បានស្រែកប្រាប់ទៅកូនប្រុសរបស់ជនបង្កហេតុថា កុំរត់ចុះឡើងលើរ៉ឺម៉កប្រយ័ត្នធ្លាក់។ នៅពេលឮដូច្នោះ ជនបង្កហេតុបានងើបពីកន្លែងផឹក រួចដើរទៅចាប់កូនរបស់ខ្លួនវ៉ៃ ហើយជនរងគ្រោះបាននិយាយទៅ កាន់ជនបង្កហេតុថា វ៉ៃកូនធ្វើស្អី។
ស្រាប់តែជនបង្កហេតុទាញដបស្រាវាយមកលើជនរងគ្រោះ បណ្តាលឲ្យបែកក្បាលរងរបួសយ៉ាងធ្ងន់ធ្ងរ ហើយត្រូវបានក្រុមគ្រួសារជនរងគ្រោះ នាំទៅកាន់ពេទ្យក្នុងភូមិ ដើម្បីព្យាបាលរបួស។
លោក អ៊ុល សំអុល ប្រាប់បន្តថា ក្រោយពីកើតហេតុកម្លាំងប៉ុស្តិ៍រដ្ឋបាលព្រៃសរបស់លោកនិងកម្លាំងព្រហ្មទណ្ឌខណ្ឌបានចុះទៅឃាត់ខ្លួនជនសង្ស័យខាងលើ រូចនាំមកសួរនាំនៅទីស្នាក់ការប៉ុស្តិ៍ និងបន្តធ្វើការសាកសួរនៅអធិការដ្ឋាននគរបាលខណ្ឌដង្កោ ក្នុងការកសាងសំណុំរឿងបញ្ជូន តុលាការរាជធានីភ្នំពេញ ផ្តន្ទាទោសតាមផ្លូវច្បាប់៕ 
