ស្ទឹងត្រែង៖ ប្រជាពលរដ្ឋ ក៏ដូចជាអ្នកទេសចរណ៏ បាននាំគ្នាត្អូញត្អែ ពីការធ្វើដំណើរ និងដឹកកសិផលនានា ឆ្លងកាត់កំណាត់ផ្លូវជាតិមួយខ្សែ ដែលកំពុងរងនូវការគម្រាមកំហែងយ៉ាងធ្ងន់ធ្ងរ ពីសំណាក់រថយន្តដឹកទំនិញធំៗ ធ្វើឲ្យទ្រូងផ្លូវជាតិនោះប្រេះរហែកចេញពីគ្នា បង្កឲ្យ
ពួកគាត់ពិបាកធ្វើដំណើរ ដោយសារការចំណាយពេលវេលាយូរ និងថវិកាច្រើន និងអ្វីដែលសំខាន់នោះ គឺមន្ត្រីរាជការមកបំពេញការងារ សិស្សមកសិក្សានៅសាលា អ្នកជម្ងឺរមកកាន់មន្ទីរពេទ្យ ការដឹកកសិផល របស់ប្រជាកសិករ មកលក់នៅទីផ្សារខេត្ត មិនបានទាន់ពេលវេលា ។ កំណាត់ផ្លូវជាតិ ដែលកំពុងរងនូវការរអ៊ូរទាំ ពីប្រជាពលរដ្ឋ និងភ្ញៀវទេសចរណ៏នោះ គឺជាកំណាត់ផ្លូវ ជាតិលេខ៧ ស្ថិតក្នុងដែនដីរដ្ឋបាលក្រុងស្ទឹងត្រែង មានចម្ងាយប្រមាណជា៥០គីឡូម៉ែត្រ ចាប់ពីគល់ស្ពាន មិត្តភាពកម្ពុជា-ចិនសេកុងស្ទឹងត្រែង រហូតជិតដល់ព្រំដែនកម្ពុជា-ឡាវ ផ្លូវបំបែកចូលទៅកាន់ទីរួមស្រុកសៀមប៉ាង ។
មន្ត្រីរាជការមួយចំនួន ដែលបានធ្វើដំណើរឆ្លងកាត់ផ្លូវនេះ មកបំពេញភារកិច្ចក្នុងខេត្តបានត្អូញត្អែរពីការលំបាកក្នុងការធ្វើដំណើរឆ្លងកាត់កំណាត់ផ្លូវនេះណាស់ ដោយពីមុន ពួកគាត់ជិះម៉ូតូ ឬរថយន្ត ចំណាយប្រេង និងពេលវេលាតិចតែឥឡូវ ខាតទាំងពេលវេលា និងថវិការ។ហើយអ្វីដែលសំខាន់ជាងនេះទៀតនោះ គឺ ប្រជាពលរដ្ឋ ដែលដឹកកសិផលនានាមកពីឆ្ងាយ យកមកលក់ក្នុងទីផ្សារខេត្ត។ លោកថាជាពិសេស អ្នកមានជម្ងឺរ ស្ត្រីពោះធំឆ្លងទន្លេ ត្រូវមកកាន់មន្ទីរពេទ្យនិងសិស្សមកសាលារៀន មន្ត្រីមកបំពេញការងារជាដើម ។លោកចោទថា ការខកខានទាំងនេះ ដោយសាររថយន្តធន់ធ្ងន់ របស់ក្រុមហ៊ុនធំៗមួយចំនួនក្នុងខេត្ត ដឹកទំនិញលើសទម្ងន់កម្រិតកំណត់ ផ្ទុយពីការណែនាំរបស់ក្រសួង ក៏ដូចជាមន្ទីរសាធារណៈការ និងដឹកជញ្ជូនខេត្ត។
ប្រជាពលរដ្ឋក្នុងស្រុកសៀមប៉ាង អ្នករស់នៅអមសងខាងផ្លូវ និងភ្ញៀវទេសចរណ៏ បានលើកឡើងស្រ ដៀងៗគ្នាថា កំណាត់ផ្លូវជាតិមួយខ្សែនេះ ពីមុនស្រួលធ្វើដំណើរណាស់ ព្រោះអ្នកប្រើប្រាស់ផ្លូវនេះ គឺជាអ្នកជិះម៉ូតូ និងរថយន្តតូចៗ ប្រភេទទេសចរណ៏ ។ហើយផ្លូវនេះរងនូវការគម្រាមកំហែង ខូចខាតខ្លាំង គឺចាប់ពីមានក្រុមហ៊ុនថ្មីមួយ ដែលសមត្ថកិច្ចនាំគ្នានិយាយថា ជាក្រុមហ៊ុនយក្ស ចូលមកដឹកជញ្ជូនទំនិញពីក្នុងស្រុកសៀមប៉ាង ឆ្លងកាត់ក្រុងស្ទឹងត្រែង ឆ្ពោះទៅក្រចេះ នាប៉ុន្មានខែដើមឆ្នាំនេះ ។
មន្ត្រីរាជការ សិស្សសាលា ប្រជាពលរដ្ឋ និងអ្នកទេសចរណ៏ខាងលើ បានសំណូមពរដល់អាជ្ញាធរ ខេត្ត មេត្តាពិនិត្យមើល រថយន្តដឹកទំនិញធំៗរបស់ក្រុមហ៊ុនយក្ស ខាងលើនោះផង បើមិនមានវិធានការទប់ ស្កាត់ ការដឹកទំនិញលើសទម្ងន់កម្រិតកំណត់នោះទេ នោះរថយន្តទាំងនេះ នឹងធ្វើឲ្យជាតិខាតបង់នូវថវិកា យ៉ាងច្រើនសន្ធឹកសន្ធាប់ ពីការចំណាយថវិកា សម្រាប់ស្តារ និងស្ថាបនាផ្លូវនេះឡើងវិញ ។
ប្រធានមន្ទីរសាធារណៈការ និងដឹកជញ្ជូនខេត្ត លោកស គឹមណាត ត្រូវគេឃើញ បាននិងកំពុងចាត់ វិធានការយ៉ាងតឹងរឹង ដល់ក្រុមដឹកជញ្ជូនទំនិញលើកទម្ងន់កម្រិតកំណត់ ដោយតម្រូវឲ្យបង់ពិន័យជាថវិកាចូលរដ្ឋតាមរយះការចាប់រថយន្តទាំងនោះថ្លឹង។ចំពោះកំណាត់ផ្លូវជាតិលេខ៧មួយខ្សែនេះ ត្រូវគេរាយការណ៏ថា ថ្នាក់ដឹកនាំក្រសួងសាធារណៈការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ បានចុះពិនិត្យ និងធ្វើ ការសិក្សារួចហើយ ផ្លូវនេះ នឹងត្រូវលើកគម្រោងស្ថាបនាឡើងវិញ នៅដើមឆ្នាំ២០១៥ខាងមុននេះ ។ហើយមន្ទីរសាធារណៈការ និងដឹកជញ្ជូនខេត្ត មានតួនាទីថែទាំផ្លូវនេះ ដោយចាក់ដីលុបកន្លែងណាខូចខាតខ្លាំង ក្នុងរយះពេល៦ខែ រហូតដល់ក្រសួង ចុះមកស្ថាបនាជាថ្មីឡើងវិញ ៕ ងិន លីម
