ខេត្តប៉ៃលិន ៖ ភ្នំធម្មជាតិមួយកន្លែង ត្រួវបានបំភ្លេចបំផ្លាញដោយក្រុមហ៊ុនជីកកកាយដីឯកជនឈ្មោះ ឈុន ឆាង បានឃុបឃិតជាមួយអាជ្ញាធរដែនដី កាយដីភ្នំលក់យ៉ាងអាណាធិបតេយ្យ ស្ទើរបាត់បង់ទម្រង់ភ្នំទាំងមូល តែអាជ្ញាធរពាក់ព័ន្ធបានត្រឹមតែឆ្លើយដាក់គ្នាទៅវិញទៅមក ដោយមិនទទួលខុសត្រូវចំពោះបញ្ហាការបាត់បង់ភ្នំនេះឡើយ ។ ភ្នំដែលពួកឈ្មួញជីកកកាយដីលក់ ស្ទើរតែបាត់បង់ស្ថិតនៅជាប់ផ្លួវក្រវ៉ាត់ក្រុងដែលទើបតែធ្វើរួចថ្មីៗ ខាងក្រោយ សាលាបឋមសិក្សាអូរ តាវ៉ៅ ក្នុងភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពពីប្រជាពលរដ្ឋបានលើកឡើងថា៖ ភ្នំនេះកាលដំបួងជាកម្មសិទ្ធរបស់ឈ្មោះ និល ប៉ុន្តែជាង២ខែកន្លងមកនេះ ត្រួវបានខាងមន្ទីរសាធារណៈការខេត្ត បានប្រើគ្រឿងចក្រជីកកកាយដីភ្នំទាំងមូល យកមកធ្វើផ្លួវក្នុងខេត្ត ។ប្រភពបន្តថា៖ ក្រោយមកឃើញមានក្រុមហ៊ុនឯកជនឈ្មោះឈុន ឆាង មកកាយម្តង ដោយដឹកក្នុងមួយថ្ងៃៗ រាប់សិបជើង ហើយភ្នំទាំងមូលស្ទើរតែរលាយអស់ មិនតែប៉ុណ្ណោះក្នុងការដឹកដីម្តងៗ ក៏មានការហ៊ុយដីខ្លាំង ចូលក្នុងផ្ទះសម្បែង និងប៉ះពាល់ដល់សុខភាពប្រជាពលរដ្ឋ ក្នុងតំបន់នោះផងដែរ ។ 
ក្រុមហ៊ុនដឹកដីឯកជនឈ្មោះ ឈុន ឆាង បានបញ្ជាក់ប្រាប់អ្នកឆ្លើយឆ្លងព័ត៌មានកម្ពុជាថ្មី ដោយផ្ទាល់ថា៖ ការដែលគាត់ប្រើគ្រឿងចក្រជីកកកាយដីភ្នំនេះ គឺគាត់បានទិញពីម្ចាស់ម្នាក់ ឈ្មោះ សៅ ប៊ុននិល ភេទប្រុស អាយុ៤៦ឆ្នាំ រស់នៅភូមិកូនភ្នំ សង្កាត់អូរតាវ៉ៅ ក្រុង-ខេត្តប៉ៃលិន ដោយក្នុង១រថយន្តតម្លៃ៤ពាន់រៀល ហើយគាត់ជីកកកាយដីដែលមានប្លង់ត្រឹមត្រួវ មិនមែនកាយដីភ្នំនោះទេ ។ លោកបន្តថា៖ ប្រសិនបើដីដែលមិនមានប្លង់ត្រឹមត្រូវ គាត់ហ៊ានដាក់គ្រឿងចក្រជីកកកាយយកដីទៅលក់បែបនេះទេ ព្រោះអាចប៉ះពាល់ផ្លួវច្បាប់ និងការរកស៊ីរបស់គាត់ ។ ចំណែកម្ចាស់ដី ឈ្មោះ សៅ ប៊ុននិល បានអះអាងថា ដីគាត់មានប្លង់ត្រឹមត្រូវ ហើយ គាត់លក់ឱ្យគេតែត្រឹមជើងភ្នំប៉ុណ្ណោះ ។ 
ចំណែកនៅខាងលើភ្នំគាត់មិនបានលក់ទេ ព្រោះ គេមិនបានធ្វើប្លង់ឱ្យគាត់ ហើយការកកាយលើភ្នំនេះគាត់មិនបានដឹងទេ ពីមុនខាងមន្ទីរសា ធារណការនិងដឹកជញ្ជូនខេត្ត យកគ្រឿងចក្រទៅកាយលើភ្នំនេះ ។ ទាក់ទិនបញ្ហានេះដែរ លោក សួន អ៊ន់ ចៅសង្កាត់អូរតាវ៉ៅ បានឱ្យដឹងតាមទូរស័ព្ទថា៖ ពាក់ព័ន្ធទៅនឹងបញ្ហាការជីកកកាយភ្នំស្ទើរតែរលាយអស់នេះ លោកមិនបានដឹងទេ ព្រោះពួកគេមិនបានទាក់ទងមកខាងសង្កាត់នោះទេ ប្រហែលជាគេ មានអំណាចជាងយើង, គេអាងមានច្បាប់អនុញ្ញាតិពីមន្ទីររ៉ែនិងថាមពលខេត្ត ហើយចំពោះបញ្ហានេះខាងសង្កាត់ក៏អត់មានវិធានការអ្វីដើម្បីទប់ស្កាត់ ផងដែរ ។ 
ពាក់ព័ន្ធករណីខាងលើមន្ត្រីមន្ទីររ៉ែ និងថាមពលខេត្តប៉ៃលិនម្នាក់ បានបញ្ជាក់ប្រាប់អ្នកឆ្លើយឆ្លងព័ត៌មានកម្ពុជាថ្មីតាមទូរស័ព្ទឱ្យដឹងថា៖ ខាងលោកមានសិទ្ធិត្រឹមចេញលិខិត អនុញ្ញាតិអាជីវកម្មធនធានរ៉ែគ្រប់ប្រភេទតែប៉ុណ្ណោះ អញ្ចឹងទោះបីក្រុមហ៊ុនទៅធ្វើ ទៅដឹក ទៅទិញបានពីណា វាជារឿងរបស់ក្រុមហ៊ុនទេ អាស្រ័យទៅលើអាជ្ញាធរដែនដី ប៉ុន្តែ ពេលដឹកត្រូវតែបង់សួយសារចូលមន្ទីរ ។ ប្រភពបន្តថា៖ ការដែលពួកគាត់ទៅកាយ ទៅដឹកពីកន្លែងណាមក គឺខាងមន្ទីរអត់ដឹងទេ ហើយខាងលោកគ្មានសិទ្ធិទៅបញ្ជារកាយដីនោះទេ មានសិទ្ធិត្រឹមចេញអាជ្ញារប័ណ្ណអាជីវកម្មឲ្យទេ ហើយការដែលក្រុមហ៊ុនទៅកាយដីភ្នំ ឫជីកកកាយអ្វីៗផ្សេងនេះ វាជាសិទ្ធិរបស់អាជ្ញាធរដែនដីនោះទេ ៕
