ខេត្តកំពតះ អ្នកធ្វើអាជីវកម្មភ្នាលបាល់និងល្បែងកន្ទុយលេខស្ថិតតាមបណ្តាស្រុកនានាក្នុងអាណាចក្រខេត្តកំពត កាន់តែរីកដុះដាលពីមួយថ្ងៃទៅមួយថ្ងៃ ហើយល្បែងទាំងនេះបើតាមសំដីអ្នកស្រុកអះអាងថា គឺជាល្បែងមួយប្រភេទកំពុងពេញនិយមរបស់ពលរដ្ឋខ្មែរ។ ប្រជាពលរដ្ឋទាំងចាស់ទាំងក្មេងរស់នៅក្នុងតំបន់នានាពិសេសក្រុងកំពតបាននាំគ្នាលើកឡើងថា ការលេងភ្នាល់បាល់ឬចាក់កន្ទុយលេខវាពិតជាស្រួលម្យ៉ាងដែរ ព្រោះពេលពួកគាត់នាំគ្នាទស្សទាយក្រុមបាល់ទាត់ឬដេកយល់សបិ្តឃើញអ្វីក៏នាំគ្នាកាត់ចាក់គ្រប់ៗគ្នា ជួនកាលត្រូវ
ជួនកាលខុសតែ១លេខ២លេខប៉ុណ្ណោះ ម្លោះហើយទើបធ្វើឲ្យពួកគាត់មិនអាចបោះបង់នូវប្រភេទល្បែងខាងលើនេះបានឡើយ ដោយពួកគាត់ត្រូវរកលុយទៅចាក់ផ្សងសំណាងមិនដែលលួសថ្ងៃ ទោះបីចាក់ខុសសីុអស់លុយរាប់ភ្លេចក៏មិនតូចចិត្តនោះដែរ។បើតាមប្រភពពីអ្នកដែលមិនចូលចិត្តល្បែងខាងលើបាននិយាយថា តាមពិតការប្រព្រឹត្តល្បែងសីុសង ទោះជាប្រភេទល្បែងអ្វីក៏ដោយបើលេងហើយមិនដែលមានកំណើតនោះទេ គឺសុទ្ធតែចាញ់អស់គូទខោដូចតែគ្នាតែធ្វើម្តេចបើញៀនទៅហើយ ណាមួយស្រួលដែរតើបើចាក់ត្រូវវិញប្រមូលលុយស្រួលជាងអ្វីៗទាំងអស់។
ចំពោះការងប់ងល់នឹងល្បែងអបាយមុខនេះ គេកត់សម្គាល់ឃើញអ្នកប្រព្រឹត្តមួយចំនួនធំ តែងតែជំពាក់គេជុំទិសព្រោះតែការញៀនល្បែងដកមិនរួចនោះ។ ទាក់ទិននឹងល្បែងភ្នាល់កន្ទុយលេខនេះដែរ ប្រភពជាច្រើនបានបញ្ជាក់អះអាងថា គ្រាន់តែក្នុងក្រុងកំពតមួយ មានមេប្រមូលសីុសងបាល់និងកន្ទុយលេខ៥-៦កន្លែង ដូចជាផ្ទះហ៊ា គីម ជាដើម ចុះទម្រាំនៅក្នុងទីប្រជុំជនឬបណ្តាស្រុកនានាទៀតនោះតើមានប៉ុន្មានកន្លែងទៅ។
ប្រភពដដែលបានបន្តថា បើមានល្បែងខុសច្បាប់គ្រប់ប្រភេទកំពុងបើកលេងពេញបន្ទុកបែបនេះតើទិសស្លោកភូមិ ឃុំ មានសុវត្ថិភាពនៅឯណា ហើយល្បែងខាងលើបានបើកលេងស្ថិតក្នុងក្រុងនិងទីប្រជុំជនបែរជាសមត្ថកិច្ចមិនអើពើមិនបង្ម្រាប។ប្រភពបានបញ្ជាក់ថាឥឡូវនេះមេៗធំៗដែលបើកចាក់ភ្នាល់បាល់និងសីុសងល្បែងកន្ទុយលេខស្ថិតក្នុងតំបន់និមួយៗសុទ្ធតែដុះស្លែ ថែមទាំងរកសីុកាក់កបដោយសារអាជីវកម្មខាងលើនេះម្នាក់ៗចង់ក្លាយជាមហាសេដ្ឋីអស់ហើយ។
គួរបញ្ជាក់ថា ច្មីៗនេះក៏មានករណីបង្ក្រាបមេល្បែងសីុសងកន្ទុយលេខនៅក្នុងខេត្តកំពតប៉ុន្មានកន្លែងដែរ ដោយសមត្ថកិច្ចបានឃាត់មេសីុសងកន្ទុយលេខធ្វើកំណត់ហេតុបញ្ជូនទៅតុលាការចាត់ការតាមនិតិវិធីហើយដែរ ប៉ុន្តែក្រុមមេសីុសងកន្ទុយលេខស្ថិតតាមបណ្តាស្រុកនានាក្នុងអាណាចក្រខេត្តកំពត មិនដឹងពេលណាត្រូវបានបង្ក្រាបនោះទេ ម្យ៉ាងទៀតគេដឹងថាសព្វថ្ងៃនេះក៏មានមេល្បែងសីុសងជើងខ្លាំងប្រចាំក្រុងកំពត ដែលកំពុងប្រកបអាជីវកម្មយ៉ាងកក្រើកមេឃក្បែរច្រមុះក្រុងថែមទៀតផងប៉ុន្តែបែរជាគ្មានអាជ្ញាធរឬសមត្ថកិច្ចណាឈឺក្បាលវិលមុខបន្តិចឡើយ ហើយការបើកល្បែងសីុសងនោះមានភ្នាល់បាល់ធំៗ ល្បែងបៀអាប៉ោង ចាក់ខ្លាឃ្លោកនិងសីុសងកន្ទុយលេខ ដែលមានទីតាំងស្ថិតកែងផ្លូវផ្សារដីហុយ នៃសង្កាត់អណ្តូងខ្មែរ ក្រុងកំពត៕