ក្លិបតោខៀវ Chelsea ត្រូវបានគេរាយការណ៍ថា កំពុងតែមានចំណាប់អារម្មណ៍លើការនាំយកខ្សែការពារ Miranda ពីក្លិបជើងឯកអេស្ប៉ាញ Atletico Madrid ។ ក្លិបតោខៀវកំពុងតែត្រៀមសំណើរទឹកប្រាក់ប្រមាណ១៩លានផោនដើម្បីទិញយកខ្សែការពារកណ្តាលសញ្ជាតិប្រេស៊ីលរូបនេះក្នុងគោលបំណងដើម្បីយកមកជំនួសតំណែងរបស់កីឡាករ David Luiz ដែលបានផ្លាស់ទៅកាន់ ក្លិបមហាសេដ្ឋី Paris Saint-Germain កាលពីដើមរដូវក្តៅនេះ ។
Miranda បានដើរតួនាទីយ៉ាងសំខាន់ក្នុងការជួយឲ្យក្លិប Atletico ឈ្នះជើងឯក La Liga កាលពីរដូវកាលមុន ហើយបើយោងតាមសារព័ត៌មាន Marca បានចុះផ្សាយថា គ្រូបង្វឹក Chelsea គឺលោក Jose Mourinho បានកោតសរសើរចំពោះទម្រង់លេងរបស់កីឡាកររូបនេះមិនដាច់ពីមាត់ និងមានគម្រោងនាំយករូបគេមកកាន់ទឹកដី នៃប្រទេសអង់គ្លេស ។ គួរបញ្ជាក់ថា នៅរដូវក្តៅនេះ Chelsea ទិញបានកីឡាករពីក្លិប Atletico បាន២នាក់ហើយដែលក្នុងនោះ មានដូចជាខ្សែប្រយុទ្ធ Diego Costa និងខ្សែការពារ Filipe Luis ៕
